चैतमा परीक्षा सकेर वैशाखबाटै शैक्षिकसत्र सुरु गर्ने मन्त्रालयको तयारी, कति सम्भव ?

चैतमा परीक्षा सकेर वैशाखबाटै शैक्षिकसत्र सुरु गर्ने मन्त्रालयको तयारी, कति सम्भव ?

A+ A A-

चैतमा एसईईबाहेकका सबै परीक्षा सकेर वैशाखबाट नयाँ शैक्षिकसत्र सुरु गर्ने तयारीमा शिक्षा मन्त्रालय जुटेको छ । कोरोना महामारीले बिगारेको शैक्षिक क्यालेण्डर मिलाउन वैशाखबाटै नयाँ शैक्षिकसत्र सुरु गर्ने तयारी मन्त्रालयले गरेको हो ।

यता सीसीएमसीले १ फागुनबाट शैक्षिक संस्थाहरू खोल्ने निर्णय गरेसँगै योजनाअनुरुप काम गर्न मन्त्रालयलाई थप सहज भएको छ । मन्त्रालयका शिक्षासचिव यादव कोइरालाका अनुसार, ओमिक्रोन भेरियन्टले अझै स्कुलहरू खोल्ने स्थिति नआइदिएको भएचाहिँ शैक्षिकसत्र थप लम्बिन सक्थ्यो ।

‘फागुनबाट स्कुल खुल्ने भएपछि अब कोर्सहरू सक्न गाह्रो हुन्न । सकेसम्म चैतभित्रै कक्षा ९ सम्मका सबै परीक्षा सकेर वैशाखमा नयाँ शैक्षिकसत्र सुरु गर्छौं । एसईईचाहिँ वैशाखमा पुग्ला,’ कोइरालाले शिलापत्रसँग भने, ‘कक्षा ११ र १२ का लागि पनि सकेको छिटो नयाँ शैक्षिकसत्र सुरु गर्न आदेश दिएका छौँ ।’

यद्यपि यसबीचमा विद्यालयहरूमा चलिरहेको खोप अभियानले भने नयाँ शैक्षिकसत्र १५–२० दिन पर धकेलिन सक्ने संकेत कोइरालाको भनाइ छ । खोप अभियानका कारण अनलाइनबाट हुने पठनपाठनका कामहरू पनि ठप्प भएकाले भनेको भन्दा १५–२० दिन पढाइ गराउने समय थपिन सक्ने उनले बताए ।

परीक्षा गराउन तयार छौँ : बोर्ड

राष्ट्रिय परीक्षा बोर्डले मन्त्रालयले भनेको समयमा परीक्षा गर्न तयार रहेको बताएको छ । बोर्डका प्रवक्ता जङ्गबहादुर अर्यालका अनुसार एसईईको परीक्षा वैशाखको पहिलो या दोस्रो हप्तामै सञ्चालन गर्नेगरी तालिका सार्वजनिक हुनेछ ।

कक्षा ११ र १२ को हकमा भने स्थिति अझै अन्योल नै रहेको उनले बताए । स्थानीय निर्वाचनको मिति तोकिएदेखि कक्षा १२ को परीक्षा तालिका सार्वजनिक गर्न सहज हुने उनको भनाइ छ ।

‘एसईईको त वैशाखमै हुने गरी तालिका निकाल्छौँ । कक्षा १२ को हकमा चाहिँ हामी स्थानीय तहको चुनावको मिति सरकारले तोकिदिए परीक्षा तालिका निकाल्न सहज हुन्थ्यो भनेर पर्खिरहेका थियौँ । अब सरकारले ३० वैशाखमा स्थानीय तहको चुनाव गर्ने निर्णय गरिसकेको छ । अब त्यहीअनुसार हामी पनि छलफल गरेर परीक्षाको मिति तोक्छौँ । अहिले यति नै गते हुन्छ भन्न सक्दैनौँ,’ उनले भने ।

मन्त्रालयको योजनाअनुरुप चल्न हामी तयार छौँ : एनप्याब्सन

राष्ट्रिय निजी तथा आवासीय विद्यालय एसोसिएसन नेपाल (एनप्याब्सन) ले शिक्षा मन्त्रालयको योजनाअनुरुप आफूहरू चल्न तयार रहेको बताएको छ । एनप्याब्सनका अध्यक्ष रितुराज सापकोटा चैतमै परीक्षा सञ्चालन गरेर वैशाखबाट नयाँ शैक्षिकसत्र सुरु गर्ने कुरामा सकारात्मक रहेको बताउँछन् ।

‘अब बिग्रिएको शैक्षिक क्यालेण्डर सुधार्न पनि यताउता गर्नुपर्छ । चैतमै परीक्षा गराएर वैशाखमा नयाँ शैक्षिकसत्र सुरु गर्न हामी तयारी नै छौँ । अब सरकारी विद्यालयमा पनि शिक्षण सिकाइको काम कत्तिको भइरहेको छ भनेर ख्याल राख्नुपर्छ,’ उनले भने ।

चैतमा परीक्षा गर्दा हतारो हुन्छ : अभिभावक महासंघ

चैतमा परीक्षा सञ्चालन गरेर वैशाखमै नयाँ शैक्षिकसत्र सुरु गर्दा हतारो हुने अभिभावक महासंघले बताएको छ । महासंघका अध्यक्ष सुप्रभात भण्डारीले सरकारी विद्यालयहरूमा प्रभावकारी रूपमा कक्षा सञ्चालन नभएकाले चैतमा परीक्षा गर्न हतारो हुने बताएका हुन् ।

निजी विद्यालयको हकमा कोर्स सकिए पनि गाउँघरका विद्यालयमा पढाइ नभएको भण्डारी बताउँछन् । ‘चैतमै परीक्षा सकेर वैशाखमा शैक्षिकसत्र सुरु गर्न गाह्रो छ । योबीचमा एक महिना अवरोधजस्तै भयो । बरु एक महिना पछि धकेलेर जेठबाट नयाँ शैक्षिकसत्र सुरु गर्दा हुन्छ,’ उनले भने ।

कोर्स नै नसकी परीक्षाको हतारो मात्र गर्न नहुने भण्डारीले बताए । शहरी भेगमा अनलाइनबाट पठनपाठन भए पनि गाउँघरमा त्यस्तो स्थिति नरहेको भण्डारी बताउँछन् ।

वैशाखबाट उता नतन्काऊँ : शिक्षाविद् कोइराला

शिक्षाविद् विद्यानाथ कोइराला वैशाखबाटै नयाँ शैक्षिकसत्र सुरु गर्नुपर्ने बताउँछन् । वैशाखभन्दा पर धकेलिए थप एक वर्ष लथालिङ्ग हुने उनको भनाइ छ ।

‘वैशाखभन्दा पर धकेल्नु विद्यार्थीका लागि बेइमानी हो । कोर्स सकिएको छैन भने कसरी छिटो सकाउने भन्नेतिर सोचौँ । वैशाखबाट उता नधकेलौँ,’ कोइरालाले भने, ‘समय जति उता सार्‍यो, त्यसले अर्कोतिर असर गरिरहेको हुन्छ । अब ल्याङल्याङ गरेर बस्नु ठीक हैन ।’

प्रकाशित मिति: सोमबार, माघ २४, २०७८ १८:१३