निरुताको कम ब्याकः जम्ला त हरिवंशसंगको जोडी

A+ A A-

निरुता सिंह फेरि चलचित्रमा फर्किएकी छन् । उनी हरिवंश आचार्यको जोडी बनेर चलचित्र ‘दाल, भात, तरकारी’ मार्फत दर्शकमाझ आएकी हुन् । ‘दाल, भात, तरकारीकै हरिवंश र निरुताको नृत्य रहेको गीत भिजिट भिसामा‘को भिडियो शुक्रबार काठमाडौंमा एक समारोहबीच सार्वजनिक गरियो ।

गीतमा हरिवंश र निरुताको नृत्य निकै आकर्षक छ । त्यसो त अभिनेता पुष्प खडका, अभिनेत्रीद्वय वर्षा राउत, आँचल शर्मा र राजाराम पौडेलको नृत्य पनि आकर्षक छ ।

यी सबै कलाकारलाई कविराज गहतराजले सय जनाभन्दा बढी नृत्यकलाकारसँग सफल रूपमा नचाएका छन् । अग्रज संगीतकार शम्भुजित बाँसकोटाले यो गीतमा संगीत गरेका हुन् । गीत पनि कर्णप्रिय बनेको छ । जसमा निशान भट्टराई र अन्जु पन्तको स्वर रहेको छ गीतलाई हरिवंश आचार्यले लेखेका हुन् ।

कार्यक्रममा अग्रज हास्यव्यंग्य कलाकार मदनकृष्ण श्रेष्ठले गीत नृत्य आकर्षक बनेको र हरिवंश, निरुतालगायत सबै कलाकारको नृत्य हेरेर आफूलाई लोभ लागेको बताए । आफू स्वास्थ्यस्थितिका कारण सो गीतमा नाच्न नसकेको पनि उनले बताए ।

पछिल्लो समय नेपाली चलचित्रको बजार राम्रो भएकाले आफूहरूले शत्रु गतेपछि चलचित्र दाल, भात, तरकारी निर्माण गरेको अर्का हास्यव्यंग्य अभिनेता हरिवंश आचार्यले बताए । उनले फिल्मको गीत मात्र नभएर आफूहरूले समग्र फिल्ममा मेहनत गरेकाले दर्शकले दाल, भात, तरकारी मन पराउने विश्वास व्यक्त गरे ।

सुदन केसीको निर्देशनमा तयार भइरहेको यो चलचित्रलाई मह सञ्चारको प्रस्तुतिमा किरण केसीले निर्माण गरेका छन् । कार्यक्रममा बोल्दै संगीतकार शम्भुजित बाँसकोटाले आफूलाई दाल, भात, तरकारीको तीनवटै गीतमा संगीत सिर्जना गर्न दिएर किरण केसीसँगै मह जोडीले फेरि संगीत सिर्जनामा सक्रिए बनाएको बताए ।
निर्माता कलाकार किरण केसीले विभिन्न देशका यो फिल्मको अत्यधिक माग भएको बताउँदै अघिल्लो चलचित्रजस्तै राम्रो बनाउन दाल, भात, तरकारीमा पनि कुनै कसर बाँकी राखेको छैन भने । फिल्मलाई आफूहरूले १३ वैशाखबाट प्रदर्शनमा ल्याउने उनले जानकारी गराए ।

प्रकाशित मिति: आइतबार, माघ १३, २०७५ १०:४०