साउदी राजकुमारले अवरोध गर्नेलाई मार्न आदेश दिएको नियोम प्रोजेक्ट के हो ?

A+ A A-

साउदी अरबले सञ्चालन गर्न लागेको नियोम नामको प्रोजेक्टको विरोधमा आउनेलाई मार्ने आदेश दिएको छ । हालसम्म साउदीमा यो प्रोजेक्टका कारण ५ जनाको मृत्यु भइसकेको छ भने ३ वटा गाउँ ध्वस्त भएका छन् ।

निकै कठोर कानुन भएको मुस्लिम राष्ट्र साउदीले आखिर आफ्नै जनता मारेर कस्तो प्रोजेक्ट सञ्चालन गर्दै छ ? जनतालाई नै मार्ने आदेश दिएको यो प्रोजेक्ट कसरी साउदीका राजकुमार सलमानको ड्रिम प्रोजेक्ट बन्यो ? साउदी अरबले मरुभूमिमा नयाँ शहर बसाउँदै छ । नियोम नाम दिइएको यो प्रोजेक्ट पश्चिमी देशका दर्जन कम्पनीले तयार गर्दै छन् ।

साउदी युवराज सलमानले प्रोजेक्ट सञ्चालन हुने क्षेत्रमा कडा कदम चाल्न निर्देशन दिएका छन् । यो उनको ड्रिम्प प्रोजेक्ट हो । जसले यो प्रोजेक्टको विरोध गरिरहेका छन्, उनीहरूलाई राजकुमारले मार्ने आदेश दिएका छन् ।साउदीबाट भागेर ब्रिटेनमा बसिरहेका कर्णेल राबिह अलेनेजीले सन् २०२० मा अल-खुरायबाहमा रहेका हुवैतात समुदायका मानिसलाई हटाउने जिम्मा पाएका थिए । यस क्रममा एक जनाको गोली हानी हत्या गरियो । स्टेट सेक्युरिटी विभागले भने सुरक्षा अधिकारीमाथि फायरिङ गरेपछि जवाफी फायरिङमा मारिएको दाबी गरेको थियो ।

बेलायती मानव अधिकारवादी संस्थाका अनुसार साउदीले अल हुवैतात समुदायका करिब ४७ जनालाई इलाका खाली नगरेकोमा पक्राउ गरिएको थियो । जसमध्ये धेरैलाई आतंक फैलाएको आरोपमा मुद्दा चलाइयो । अहिलेसम्म उनीहरूमध्ये ५ जनाको मृत्यु भइसकेको छ भने ४० जना जेलमा छन् । कर्णेल राबिहलाई दिएको आादेशमा यो समुदाय विद्रोही मिलेर बनेको र सो इलाका खाली नगरे उनीहरूलाई मार्न निर्देशन दिइएको थियो ।

यो इलाकाबाट हालसम्म ६ हजार मानिसलाई हटाइएको छ भने खुरायबाह, शर्मा र गयाल गरी तीन गाउँ उठाइएको छ । त्यहाँ रहेको स्कुल, अस्पतालसमेत हटाइएको छ । साउदी सरकारले भने नियोम प्रोजेक्टका लागि उठाइएका जनतालाई मुआब्जा दिएको दाबी गरेको छ । साउदी सरकारले मानव अधिकारको उल्लंघन गरेको भन्दै यसप्रति गम्भीर चिन्ता व्यक्त गरेका छन् ।

साउदी भिजन-२०३० को हिस्साका रूपमा रहेको यो परियोजनाका लागि साउदीले ५ सय विलियन डलर खर्च गर्दै छ । यसका माध्यमबाट साउदी तेलमाथिको निर्भरता कम गर्न चाहन्छ । यहाँ २०० मिटर चौडा र १७० किलोमिटर लामो शहर बसाइनेछ । अलग-अलग चरणमा पूरा गर्ने लक्ष्य राखिएको यो प्रोजेक्टको २.४ किलोमिटर सन् २०३० सम्म पूरा हुनेछ । सुरुमा यहाँ बसाउने भनिएको द लाइन शहर १६८ किलोमिटर लामो हुने भनिएको थियो ।

सिसाका दुई पर्खालको बिचमा बसाइने यो शहरको एक छेउबाट अर्को छेउमा पुग्न २० मिनेटमात्रै लाग्नेछ । आवश्यक हरेक वस्तु साढे २ किलोमिटरभित्र उपलब्ध हुने यो शहरमा कार र सडक हुने छैनन् । जुन नवीकरणीय ऊर्जामार्फत सञ्चालन हुनेछ । साउदी राजकुमार सलमानले यसलाई संसारको भविष्यको ‘ब्लु प्रिन्ट’ को संज्ञा दिएका छन् ।

नियोम दुई शब्द मिलेर बनेको छ । ग्रीक भाषामा नियोको अर्थ नयाँ र अरबीमा मोस्ताकबालको अर्थ भविष्य हुन्छ । दुवैलाई मिलाएर नयाँ भविष्य हुन्छ । द लाइन शहर यही नियोम प्रोजेक्टको हिस्सा हो । देशलाई हरियाली बनाउने योजनामा रहेको साउदीले अकाबाको खाडी क्षेत्र रेड सीको मरुभूमिमा विमानस्थल र रिसोर्ट बनाइसकेको छ ।

अर्कोतिर इजिप्टको शर्म–एल–शेख शहर छ । जुन संसारकै चर्चित र महँगो रिसोर्टका लागि प्रख्यात छ । इजिप्टसँग जोड्न साउदीले तिरान र सनाफिर द्विपमा एउटा पुल पनि बनाइरहेको छ । तीन लेयरमा बन्ने द लाइन शहरको ग्राउन्ड लेभल पैदल यात्राका लागि हुनेछ । यसको मुनि पसल र व्यापारिक गतिविधि हुने सर्भिस लेभल र सबैभन्दा तल अस्ट्रा ट्रान्सपोर्ट सिस्टमसहितको स्पाइन लेयर हुनेछ ।

प्रकाशित मिति: शुक्रबार, वैशाख २८, २०८१ १७:३०