सचेतकहरूसँग सभामुखकाे छलफल बिनानिष्कर्ष टुंगियाे, कांग्रेस संसदीय छानबिनमा अडिग

सचेतकहरूसँग सभामुखकाे छलफल बिनानिष्कर्ष टुंगियाे, कांग्रेस संसदीय छानबिनमा अडिग

सभामुख देवराज घिमिरे

A+ A A-

सभामुख देवराज घिमिरे, संसदीय दलका प्रमुख सचेतक र सचेतकहरूको छलफल बिनानिष्कर्ष सकिएको छ ।बिहीबार सिंहदरबारमा बसेको बैठकमा शुक्रबारबाट सुरु हुने वर्षे अधिवेशन व्यवस्थित बनाएर लैजाने बारेमा छलफल भएको हो ।

बैठकमा प्रमुख प्रतिपक्ष दल नेपाली कांग्रेसले उपप्रधान एवं गृहमन्त्री रवि लामिछानेमाथि सहकारीको रकम हिनामिनाको आरोप लगेको भन्दै संसदीय छानबिन समिति बनाउनुपर्ने अडान कायमै राखेको छ । जसका कारण पनि आजको बैठक संसद निर्वाध सुचारु गर्ने सहमतिबिनै टुंगिएको हो । बैठक पुनः शुक्रबार बस्नेछ ।

बैठकपछि सञ्चारकर्मीहरूसँग कुरा गर्दै नेकपा एमालेका प्रमुख सचेतक महेशकुमार बर्तौलाले बैठकमा शुक्रबारको प्रतिनिधिसभाको बैठकमा शीर्ष नेताहरूले सम्बोधन गर्ने कार्यसूची तय भएको र शीर्ष नेताहरूको सम्बोधनमा प्रमुख प्रतिपक्ष दल नेपाली कांग्रेसले सहजतापूर्वक सभा सञ्चालन गर्न दिनुपर्ने बारेमा छलफल भएको बताए ।

उनले बैठकमा व्यवस्थापनसँग सम्बन्धित कुनै पनि कार्यसूची नराख्ने र शीर्ष नेताहरूले बैठकमा सम्बोधन गर्ने भएकाले कांग्रेसले सभा अवरुद्ध नगर्नेमा विश्वस्त रहेको बताए । संसदको बैठकमा शीर्ष नेताहरूले महत्त्व दिएर सम्बोधन गर्ने कुरा जरुरी रहेको र यसले राजनीतिक अर्थ दिनुका साथै देशभरका समस्या शीर्ष नेताबाट उजागर हुने अपेक्षा उनको थियो ।

बैठकपछि नेकपा (माओवादी केन्द्र) का प्रमुख सचेतक हितराज पाण्डेले शुक्रबारको प्रतिनिधिसभा बैठक सञ्चालनका लागि प्रमुख प्रतिपक्ष र प्रतिपक्ष सबैले सहयोग गर्नुपर्ने बताए । बजेट अधिवेशन भएकाले सुरु हुने र राम्रोसँग व्यवस्थित हुनेमा आशावादी रहेको उनको भनाइ थियो ।

उनले भने, ‘भोलि बस्ने संसद बैठकका बारेमा सम्माननीय सभामुखज्यूले भोलिको बैठक व्यवस्थित गर्न गृहकार्य गर्नुभएको हो । सदन भोलि सुरु हुन्छ । त्यसमा प्रमुख प्रतिपक्ष र प्रतिपक्ष सबैले सहयोग गर्नुपर्छ । बजेट अधिवेशन भएकाले सुरु हुन्छ र बोल्नुहुन्छ ।’

राष्ट्रिय स्वतन्त्र पार्टीका प्रमुख सचेतक सन्तोष परियारले नेपाली कांग्रेस र नेकपा एमालेको संसदीय दलको बैठक शुक्रबार नै बस्ने भएकाले थप निर्णय नभए पनि संसद सामान्य हिसाबमा नै अघि बढ्ने बताए । उनले शुक्रबारको प्रतिनिधिसभा बैठकमा उपप्रधान एवं गृहमन्त्री रवि लामिछानेले संसदमा सम्बोधन गर्ने जानकारी पनि उनले दिए । संसदप्रति सबै राजनीतिक दल गम्भीर बन्नुपर्ने उनको भनाइ छ ।

परियारले भने, ‘भोलिको सदनका बारेमा सामान्य के हुन्छ भन्ने कुरा भयो । नेपाली कांग्रेस र नेकपा एमालेको संसदीय दलको बैठक भोलि नै बस्ने भएकाले यो भन्ने आज नै केही भएको छैन । सामान्य हिसाबमा यो अधिवेशन सुरु गर्ने भन्नेमा छलफल भएको छ । संसद चल्छ । संसदको विषयमा सबै पार्टी गम्भीर छन् । रविजीले भोलि सम्बोधन गर्नुहुन्छ ।’

राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीले दलका प्रमुख सचेतक र सचेतकहरूसँग शुक्रबारको संसद बैठक सञ्चालनसम्बन्धी छलफल भएको बताए । उनले बैठक सञ्चालनमा अझै कुरा नमिलेको र कांग्रेसको संसदीय दलको बैठकपछि थप निर्णय हुने बताए ।

शाहीले भने, ‘दलका प्रमुख सचेतक र सचेतकहरूसँग सम्माननीय सभामुखज्यूले भोलि चल्ने बैठकको विषयमा छलफल भएको छ । कुरा मिलेको छैन । कांग्रेसको संसदीय दलको बैठक नसकिएकाले यसमा फाइनल भएको छैन । भोलि फेरि बैठक बस्ने भनिएको छ ।’ बैठकमा भन्सारको महसुलसम्बन्धी विधेयक अघि बढाउनेबारेमा पनि छलफल भएको उनको भनाइ थियो ।

प्रकाशित मिति: बिहीबार, वैशाख २७, २०८१ १९:४६