मधेशमा गठबन्धन फेरेर उपेन्द्रलाई सरकार छाड्न बाध्य पार्ने रणनीतिमा प्रचण्ड

मधेशमा गठबन्धन फेरेर उपेन्द्रलाई सरकार छाड्न बाध्य पार्ने रणनीतिमा प्रचण्ड

A+ A A-

उपेन्द्र यादव नेतृत्वको जसपा नेपाल विभाजनको पहिलो प्रभाव मधेश प्रदेश सरकारमा पर्ने देखिएको छ । एमाले र माओवादी केन्द्रले मधेशमा नयाँ गठबन्धनको तयारी थालेका छन् । एमाले र माओवादी केन्द्रले सरकार छाड्ने निर्णय गरेसँगै सरोजकुमार यादव नेतृत्वको सरकार संकटमा पर्नेछ ।

प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले पार्टीलाई सरकारबाट फिर्ता बोलाइसकेका छन् । मधेश संसदीय दलका नेता भरत साहलाई फोन गरेर प्रचण्डले सरकारबाट फिर्ता हुन निर्देशन दिएका हुन् । सोही कारण सम्भवतः बिहीबार साँझसम्म सत्ता गठबन्धनका ठूला दल एमाले र माओवादी केन्द्रले मधेश सरकार छोड्नेछन् ।

नयाँ गठबन्धनको तयारीका लागि अहिले एमाले र माओवादी केन्द्र छलफलमा जुटेका छन् । मधेशमा जनमत र लोसपासँग मिलेर नयाँ गठबन्धन बनाउने तयारीमा यी दुई लागेका छन् । तर, मधेश सरकारको नेतृत्वमा भने जनमत, एमाले र माओवादी केन्द्रको दाबी छ । ‘नयाँ सरकार बनाउने करिब पक्कापक्की हो । मुख्यमन्त्री को हुने टुंगो लागिसकेको छैन,’ माओवादी केन्द्रका एक नेताले भने ।

मधेश सरकार ढालेर प्रधानमन्त्री प्रचण्डले जसपा नेपालका अध्यक्ष यादवलाई संघीय सरकार छोड्न बाध्य पार्ने रणनीति लिएका छन् । प्रतिनिधिसभामा १२ सांसद रहेको जसपा विभाजनपछि अशोक राई पक्षसँग ७ सांसद छन् । त्यसैले प्रचण्ड यादवभन्दा राईलाई प्राथमिकता दिन चाहन्छन् । दुवै जसपाले सरकार छोड्न चाहेका छैनन् ।

जसपा अध्यक्ष यादव कम्तीमा पनि निर्वाचन आयोगले प्रदेश सांसद र स्थानीय तहका पदाधिकारीको सनाखत नगरेसम्म सरकारमै रहन चाहन्छन् । मधेशमा नयाँ सरकार बन्ने स्थितिमा यादवतर्फ रहेका आधा दर्जनभन्दा धेरै सांसद राईको पक्षमा खुल्ने स्थिति छ । त्यसैले अशोक राई नेतृत्वको जसपा मधेश सरकार ढाल्न र संघीय सरकारबाट यादवको बहिर्गमन चाहन्छ । ‘हामी त सरकारमै छौँ । स्थिरताप्रति प्रतिबद्ध छौँ । उपेन्द्रजीलाई सरकारमा राख्ने वा नराख्ने प्रधानमन्त्रीको कुरा हो,’ अध्यक्ष राईले बिहीबार पत्रकार सम्मेलनमा भने ।

यादवलाई सरकार छोड्न सन्देश दिनका लागि पनि प्रधानमन्त्री प्रचण्ड मधेश सरकारमा तत्कालै नयाँ गठबन्धनको पक्षमा छन् । त्यसका लागि जनमत र लोसपासँग संवाद भइरहेको छ । यादव बाहिरिने स्थितिमा सत्ता गठबन्धनमा यी दुई दलको इन्ट्री गराएर आफू थप बलियो हुने रणनीतिमा प्रचण्ड देखिन्छन् ।

सत्ता गठबन्धनका दुई शीर्ष नेता प्रचण्ड र एमाले अध्यक्ष केपी ओलीले पार्टी विभाजन गराएको जसपाको भित्री बुझाइ छ । तत्कालै सरकारबाट बाहिरिन नपरोस् भन्नका लागि अध्यक्ष यादवले सार्वजनिक रूपमा आरोप लगाएका छैनन् । उल्टै सरकारलाई निरन्तर समर्थन रहने प्रतिबद्धता जनाइरहेका थिए ।

मधेशमा सरकार गठनका लागि ५४ सांसदको समर्थन चाहिन्छ । नयाँ विकसित घटनाक्रमले एमाले, माओवादी केन्द्र, जनमत, नेकपा एस र लोसपा मिलेर सरकार बन्ने स्थिति देखिन्छ । मधेशमा एमालेका सभामुखसहित २४, माओवादी केन्द्रका ९, लोसपाका ८, जनमतका १३, नेकपा एसका ७ जना सांसद छन् । नयाँ गठबन्धन बन्ने स्थितिमा अशोक राई नेतृत्वको नयाँ दलका कम्तीमा ६ सांसद हुने दाबी सो पार्टीका नेताहरूले गरेका छन् ।

प्रकाशित मिति: बिहीबार, वैशाख २७, २०८१ १७:२९