मधेश ओर्लियो चीन, विद्यार्थी र समुदायका लागि चिनियाँ एडको सहायता परियोजना सुरु

मधेश ओर्लियो चीन, विद्यार्थी र समुदायका लागि चिनियाँ एडको सहायता परियोजना सुरु

A+ A A-

चीनको सहयोगमा सञ्चालित चाइना एडले मधेश प्रदेशका विद्यालयको शिक्षा सुधार तथा बालबालिकाको क्षमता विकासका लागि परियोजना सुरु गरेको छ । संयुक्त राष्ट्र विकास कार्यक्रम (युएनडीपी) सँगकाे सहकार्यमा चाइना एडले परियोजना सुरु गरेको हाे ।

चाइना एडले सुरु गरेको परियोजना मधेश प्रदेशका सर्लाही र रौतहट जिल्लाका विभिन्न सरकारी विद्यालय तथा समुदायमा सञ्चालन हुनेछ । सर्लाहीको बरहथवा नगरपालिकामा बिहीबार ‘विद्यालय र समुदायका लागि महामारी रोकथाम र ग्रिन रिकभरीका लागि दुर्गम क्षेत्रका विद्यालय र समुदायलाई सहयोग’ परियोजनामार्फत चाइना एडले युएनडीपीसँग सहकार्य सुरु गरेको हो । चाइना एडका अनुसार याे परियोजना सर्लाही र रौतहटका २५ वटा सरकारी विद्यालयमा सञ्चालन हुनेछ ।

प्रदेशका भौतिक पूर्वाधार तथा विकासमन्त्री सरोजकुमार यादवले चाइना एडको परियोजनाबाट मधेशको समृद्धिमा महत्वपूर्ण योगदान पुग्ने बताए । उनले मधेश प्रदेश छनोट गरी परियोजना सुरु गरेकोमा चाइना एडलाई धन्यवाद पनि दिए । त्यसैगरी, नेपालका लागि चिनियाँ राजदूत छन् सोङले परियोजनामार्फत विद्यार्थी र समुदायका लागि अतिविपत्ति, विपद् र चरम प्रकोपबाट सुरक्षित रहन तथा स्वस्थ सिकाइको वातावरण सिर्जना हुने बताए ।

उनले मधेश प्रदेशबाट सुरु हुने ‘स्वच्छ खानेपानी’ र ‘गाउँ उज्यालो’ लगायतका दुई ठूला परियोजनाको घोषणा पनि गरे । बरहथवा नगरपालिकाकी मेयर कल्पनाकुमारी कटुवालले चाइना एडको सहयोग स्थानीय समुदायका लागि निकै फाइदाजनक हुने बताइन् । उनले भनिन्, ‘मलाई विश्वास छ कि यो नयाँ सुरुवात हो, र साझेदारहरूसँग मिलेर गरिब र पिछडिएका समुदायहरूको जीवनमा उज्यालो परिवर्तन ल्याउन सक्छौँ ।’

युएनडीपी नेपालका उपआवासीय प्रतिनिधि जुलियन चेभिलर्डले जलवायु परिवर्तनको असरलाई सम्बोधन गर्न र दिगो विकास लक्ष्यहरू हासिल गर्न शिक्षा र हरित पुनःप्राप्तिमा लगानी महत्त्वपूर्ण भएको बताइन् । चाइना फाउण्डेशन फर रुरल डेभलपमेन्ट (सीएफआरडी) को अन्तर्राष्ट्रिय विकास विभागका निर्देशक वु पेङले सात प्रदेशका ६० भन्दा बढी जिल्लालाई सहयोग गरेको र ५० लाख भन्दा बढी जनसंख्या प्रत्यक्ष लाभान्वित भएको दाबी गरिन् ।

उनले भनिन्, ‘संयुक्त साझेदारीको साथ, हामी समुदायहरूलाई महामारी र प्रकोपबाट पुनर्स्थापित गर्न र नेपाली जनतालाई राम्रो जीवनयापन गर्न मद्दत गर्न चाहन्छौँ ।’ परियोजनामार्फत विद्यालयका विद्यार्थीलाई सिकाइ वातावरण अभिवृद्धि गर्न डेस्क, टेबल र पुस्तक र्‍याकहरू, स्टेशनरी प्याकेजका साथै, समुदायहरूलाई आवश्यक वस्तुहरू म्याट र सुधारिएको चुलोजस्ता आवश्यक उपकरणहरू उपलब्ध गराइनेछ ।

प्रकाशित मिति: बिहीबार, वैशाख २७, २०८१ १७:१९