बिनास्वार्थ पार्टी जोगाएको पुस्ताले गुनासो गरेको छ, हामी सुध्रनुपर्छः पूर्णबहादुर खड्का

बिनास्वार्थ पार्टी जोगाएको पुस्ताले गुनासो गरेको छ, हामी सुध्रनुपर्छः पूर्णबहादुर खड्का

A+ A A-

नेपाली कांग्रेसका उपसभापति पूणर्बहादुर खड्काले बिनास्वार्थ पार्टी जोगाएको पुस्ताले गुनासो गरेको भन्दै अहंकार र घमण्डबाट मुक्त भएर अगाडि बढ्नुपर्ने बताएका छन् ।

नेपाल मुस्लिम संघ लुम्बिनीको प्रथम सम्मेलनलाई बुधबार बुटवलमा सम्बोधन गर्दै उनले अहिले कांग्रेसभित्र धेरै गुनासो, कमी कमजोरी भएको स्वीकारे । आवश्यकता अनुसार सच्चिनुपर्ने बेला आएको उनको भनाइ छ ।

‘बिनास्वार्थ कांग्रेस जोगाएको पुस्ताले गुनासो गरेको छ । पार्टी बचाएको पुस्तालाई सम्मान गरौँ, अहङ्कार र घमण्डबाट मुक्त भएर अगाडि बढौँ, धेरै विषय समाधान हुन्छ,’ उनले भने ।

पार्टी कार्यकर्ताले नै आफूलाई उपसभापति बनाएको भन्दै खड्काले आफ्नो कमजोरी भए सच्चिन तयार रहेको उल्लेख गरे । कमजोरी सच्याउँदै पार्टी पुनर्निर्माण गरेर जोगाउनुपर्ने अवस्था आएको उनको भनाइ छ । पार्टीको रूपान्तरण र पुनर्निर्माण जरुरी रहेको खड्काको भनाइ छ । पार्टी नेतृत्व चलायमान बनाउनुपर्ने र जीवन्त बनाउनुपर्ने उनले बताए ।

‘म सुध्रन तयार छु, म संकल्प गर्छु मेरा कमजोरी सुधार्न म तयार छु, म तपाईंहरूले बनाएको उपसभापति हुँ मैले भएका गल्ती स्वीकार्न तयार छु, सबैले गल्ती स्वीकारौँ, पार्टी आफ्नो ट्र्याकमा आउँछ,' उनले भने ।

शान्ति प्रक्रियाका काम पूरा गर्न र संविधानको कार्यान्वयन नेपाली कांग्रेसको नेतृत्वबाट मात्रै सम्भव भएको खड्काको दाबी छ । ‘विकास र समृद्धि पूरा गर्न कांग्रेसको नेतृत्व देशवासीले खोजेको छ, यसका लागि हामीले योजना बनाऔँ, आन्तरिक कमजोरी हटाएर अगाडि बढौँ,’ उनले भने ।

प्रकाशित मिति: बुधबार, वैशाख २६, २०८१ १८:१३