सत्ता गठबन्धनमा माधव नेपालको कचकचलाई एमालेले सुदूरपश्चिमबाट फर्काएकाे जवाफ

सत्ता गठबन्धनमा माधव नेपालको कचकचलाई एमालेले सुदूरपश्चिमबाट फर्काएकाे जवाफ

केपी ओली र माधव नेपाल

A+ A A-

सत्ता गठबन्धनलाई घुर्क्याएर सुदूरपश्चिम प्रदेश सरकारको नेतृत्व पाएको एकीकृत समाजवादीले त्यही रवैयाका साथ विश्वासको मत लिन खोजेपछि एमालेले रोकेको छ । गठबन्धनका मुख्य दलहरू एमाले र माओवादी केन्द्रसँग सल्लाहसमेत नगरी मुख्यमन्त्री दीर्घ सोडारीले शुक्रबार विश्वासको मत लिन खोजेका थिए । तर, एमालेले सत्ता गठबन्धनमा सल्लाह नभई विश्वासको मत नदिने अडान लिएपछि प्रदेशसभा बैठक स्थगित भएको छ ।

सोडारी एमालेको रुचिका मुख्यमन्त्री होइनन् । एस अध्यक्ष माधव नेपालले कांग्रेस सभापति शेरबहादुर देउवासँग सहयोग माग्न थालेपछि बाध्य भएर मात्र एमालेले उनलाई मुख्यमन्त्रीमा सघाएको हो । विश्वासको मत लिन पनि उनले सोही रणनीति लिएका थिए । तर, कांग्रेसले मुख्यमन्त्रीको नियुक्ति असंवैधानिक रहेको दाबी गर्दै प्रतिवाद गर्ने निर्णय गरेपछि उनी पछाडि फर्केका हुन् । त्यसमाथि नागरिक उन्मुक्ति पार्टीका बहुमत सांसद रहेको रेशम चौधरी समूहले उनको विपक्षमा भोट दिन ह्वीप जारी गरिसकेको थियो ।

सत्ता गठबन्धनमा विवाद नभएको भए उनले विश्वासको मत पाउने सम्भावना भने थियो । एमालेका ११, माओवादी केन्द्रका सभामुखबाहेक १०, नेकपा एसका ४, नागरिक उन्मुक्ति पार्टीका २ र स्वतन्त्र सांसद डा तारा जोशीको मत पाउँदा सजिलै बहुमत पुग्थ्यो । एमालेले चर्को असन्तुष्टि पोखेपछि सोडारीले जोखिम मोल्न चाहेनन् ।

एमालेको असन्तुष्टि पछाडि भर्खरै सम्पन्न उपनिर्वाचनको ‘ह्याङ ओभर’ पनि देखिएको छ । एमाले स्थायी कमिटी सदस्य कर्ण थापाले बझाङको चुनावमा एसले धोका दिएकाले उसलाई विश्वासको मत दिन गाह्रो भएको बताएका छन् । ‘एमालेले जित्दा प्रदेशसभामा मुख्यमन्त्रीलाई नै सजिलो हुने स्थिति हो । तर, उहाँहरू एमालेलाई सघाउनेभन्दा कांग्रेस जिताउन लाग्नुभयो । त्यसैले मुख्यमन्त्रीलाई विश्वासको मत नदिन एमालेमा चर्को दबाब छ,’ बझाङको चुनावी कमान्ड हाँकेका थापाले भने, ‘शुक्रबारै विश्वासको मत दिने त सम्भावनै थिएन ।’

कांग्रेससँग कडा प्रतिस्पर्धा हुने देखिएपछि एमालेले नेकपा एस र माओवादी केन्द्रसँग सहयोग मागेको थियो । माओवादी केन्द्र तयार भए पनि जिल्ला नेतृत्वले मानेन । एसका महासचिव घनश्याम भुसाल र नेता भानुभक्त जोशीले सहमति जनाए पनि धोका दिएको थापाको दाबी छ । बझाङको चुनावमा नेकपा एसको जमानत जफत भएको छ ।

उपनिर्वाचन जितेर प्रदेशसभामा सामर्थ्य बढाएको एमालेसँग सामान्य परामर्शसमेत नगरेर मुख्यमन्त्री सोडारीले विश्वासको मत लिने मिति तोकेका थिए । त्यसैको प्रतिक्रियास्वरुप एमालेले शुक्रबार कुनै हालतमा विश्वासको मत दिन नसक्ने अडान लिएको थियो । ‘हामीले विश्वासको मत नदिने भनेको होइन । तर, सत्ता गठबन्धनसँग सल्लाहसमेत नगरेर एकलौटी हिँड्न खोजेपछि आज दिन सकिँदैन भनेको हो,’ एमाले संसदीय दलका नेता राजेन्द्र रावलले भने ।

यसलाई सत्ता गठबन्धनमा बारम्बार बखेडा झिकेर नेकपा एसले पारेको अप्ठेरोको जवाफका रूपमा पनि लिइएको छ । नेकपा एसले प्रधानमन्त्री पुष्पकमल दाहाल प्रचण्डले विश्वासको मत लिँदा होस् वा बागमती र लुम्बिनी प्रदेश सरकारमा अनावश्यक बार्गेनिङ गरिरहेको एमाले र माओवादी केन्द्रको समान बुझाइ छ । एकीकृत समाजवादी सत्ता गठबन्धनमा छ, तर अध्यक्ष माधवकुमार नेपाल गठबन्धनभित्रका प्रतिपक्षजस्ता छन् । एमालेसहितको सत्ता गठबन्धनमा उनी असन्तुष्ट र बेचैन छन् । प्रधानमन्त्री पुष्पकमल दाहाल प्रचण्डसमेत सहभागी सार्वजनिक सभामै उनले भनी पनि सकेका छन्, ‘गठबन्धन सहज लागिरहेको छैन ।’

एमालेलाई बझाङमा नेकपा एसले काटेको २५ सय भोटको रिस त छँदै छ, एउटा खुट्टा सत्तामा राखेर वैकल्पिक गठबन्धनबाट प्रधानमन्त्री बन्ने दौडमा रहेका एस अध्यक्ष नेपालको रवैया मन परेको छैन । मुख्यमन्त्री सोडारीले चाहेकै दिन विश्वासको मत नदिने अडान लिएर एमालेले सुदूरपश्चिमबाट माधव नेपाललाई जवाफ फर्काएको रूपमा पनि विश्लेषण गरिएको छ ।

आज साँझ ५ बजेका लागि ताेकिएकाे बैठक स्थगित गरी शनिबार साँझ साढे ५ बजे बाेलाइएकाे छ । ६ वैशाखमा मुख्यमन्त्री नियुक्त भएका साेडारीलाई विश्वासको मत लिन ५ जेठसम्मकाे समय छ । ५३ सदस्यीय सुदूरपश्चिम प्रदेशसभामा मुख्यमन्त्रीले विश्वासकाे मत आर्जन गर्न २७ सांसद आवश्यक पर्छन् । यहाँ एमाले, माओवादी, नेकपा एकीकृत समाजवादी, नाउपा रञ्जिता पक्षका दुई सांसद र स्वतन्त्र सांसदले विश्वासको मत दिँदा बहुमत पुग्छ ।

प्रदेशसभामा हाल नेपाली कांग्रेसका १८, माओवादी केन्द्रका सभामुखसहित ११, एमालेका ११, नागरिक उन्मुक्तिका सात, एकीकृत समाजवादीका चार, राप्रपाका एक र स्वतन्त्र एक सांसद छन् ।

प्रकाशित मिति: शुक्रबार, वैशाख २१, २०८१ १९:१२