आईपीएलमा मुम्बईलाई ९ विकेट पराजित गर्दै राजस्थानले निकाल्यो सातौँ जित

A+ A A-

इन्डियन प्रिमियर लिग (आईपीएल) अन्तर्गत गए राति भएको खेलमा राजस्थान रोयल्सले मुम्बई इन्डियन्सलाई ९ विकेटले पराजित गरेको छ । पहिले ब्याटिङ गरेको मुम्बईले निर्धारित २० ओभरमा ९ विकेट गुमाउँदै १७९ रन बनाएको थियो ।

१८० रनको विजय लक्ष्य पछ्याएको राजस्थानले १८.४ ओभरमा १ विकेटको क्षतिमा १८३ रन बनाउँदै लक्ष्य पूरा गर्‍यो । यससँगै राजस्थानले मुम्बईलाई ९ विकेटले पराजित गरेको हो ।

मुम्बईका लागि रोहित शर्माले ६ रन बनाए भने इशान किसन शून्यमा आउट भए । त्यस्तै सूर्यकुमार यादव १० रनमा पेभेलियन फर्किंदा तिलक बर्माले ६५ रनको अर्धशतकीय पारी खेलेका थिए ।

त्यस्तै मोहम्मद नवी २३ तथा नेहाल बडेरा ४९ रनमा आउट हुँदा हार्दिक पाण्ड्याले १० र टिम डेभिडले ३ रन जोडे । जेराल्ड कोट्जी शून्यमा आउट हुँदा पियुस चाउला १ र जसप्रित बुमराह २ रनमा नटआउट रहे ।

बलिङतर्फ राजस्थानका सन्दीप शर्माले ५ विकेट लिए । त्यस्तै ट्रेन्ट बोल्टले २ विकेट लिँदा आवेश खान र युजवेन्द्र चहलले १/१ विकेट लिए ।

जवाफी ब्याटिङमा उत्रिएको राजस्थानका यशस्वी जयसवालले अविजित १०४ रनको शतकीय पारी खेलेका थिए । जोश बट्लर ३५ रनमा आउट हुँदा सन्जु सामसन ३८ रनमा नटआउट रहे ।

बलिङतर्फ मुम्बईका पियुस चावलाले १ विकेट लिए भने अन्य सबै बलरहरू विकेटविहीन रहे ।

यससँगै जारी सिजनमा ८ खेल खेलेको राजस्थानले सातौँ जित निकालेको छ । यो सिजनमा राजस्थानले गुजरातसँग मात्र पराजय व्यहोरेको छ । राजस्थान १४ अंकका साथ अंकतालिकाको शीर्ष स्थानमा छ ।

उता ८ खेल खेलेको मुम्बईले योसहित पाँचौँ हार व्यहोरेको हो । ३ खेलमा जित निकालेको मुम्बई अंकतालिकाको सातौँ स्थानमा छ ।

आईपीएलमा आज चेन्नई सुपर किङ्स र लखनउ सुपर जायन्ट्सबीचको खेल राती पौने ८ बजे सुरु हुनेछ ।

प्रकाशित मिति: मंगलबार, वैशाख ११, २०८१ ०६:१९