महान्यायाधिवक्ताको राय, ‘पाठकमाथि छानबिन गर्न मिल्छ’

A+ A A-

घुस प्रकरणमा मुछिएका अख्तियार दुरुपयोग अनुसन्धान आयोगका तत्कालीन आयुक्त राजनारायण पाठकमाथि छानबिन गर्न संवैधानिक र कानुनी अड्चन नरहेको राय महान्यायाधिवक्ताको कार्यालयले दिएको आजको अन्नपूर्णमा समाचार छ। आफ्नै आयुक्तमाथि छानबिन गर्न मिल्ने–नमिल्ने विषयमा दुविधा भएपछि आयोगले सोमबार महान्यायाधिवक्ता कार्यालयसँग राय मागेको थियो। महान्यायाधिवक्ता कार्यालयका प्रवक्ता सञ्जीव रेग्मीले अख्तियारलाई राय दिइएको पुष्टि गरे। ‘अख्तियारबाट राय माग भएको थियो। सोमबारै राय पठाइएको छ। रायको व्यहोरा भने गोप्य छ’, रेग्मीले भने ।

त्यस्तै आजको अन्नपूर्णले नेकपा बैठकका बारेमा दोस्रो प्रमुख समाचार प्रकाशित गरेको छ । तल्लो तहसम्मको एकतालाई टुंग्याउन नेकपा अध्यक्षद्वयले देखाएको अग्रसरताप्रति पार्टी नेताहरूले असन्तुष्टि जनाएका छन्। सोमबार बसेको नेकपा सचिवालय बैठकमा एकता प्रस्ताव तयार पार्ने जिम्मेवारी पाएको कार्यदललाई काम गर्न थप समय दिने÷नदिनेमा नेताबीच मत बाझिएको छ। एकता प्रस्ताव तयार पार्न नेकपाले कार्यदल बनाएको थियो।

कार्यदलले जिम्मेवारी पूरा गर्न नसकेको भन्दै केही दिनयता अध्यक्षद्वय केपी ओली र पुष्पकमल दाहाल आफैं प्रस्ताव तयार पार्न क्रियाशील भएका छन्। अध्यक्षद्वयको सक्रियताप्रति नेताहरूले असन्तुष्टि जनाएका हुन्। अध्यक्ष ओली एकता प्रस्ताव सचिवालयमै टुंग्याएर स्थायी समितिमा लैजानुपर्ने पक्षमा रहेको समाचारमा उल्लेख छ ।

भारतबाट म्यानमार हुँदै इराक लैजान लागिएका १ सय ७९ जना नेपालीलाई मंगलबार नेपाल ल्याइने भएको समाचार अन्नपूर्णले प्रकाशित गरेको छ। माइती नेपालले १ सय ४७ महिला र ३२ पुरुषलाई आइतबार उद्धार गरेको हो। अवैध बाटो प्रयोग गरी इराक लैजान लागिएका नेपाली महिला तथा पुरुष एकै पटक ठूलो संख्यामा फर्काइएको यो नै पहिलो घटना भएको माइती नेपाल काँकडभिट्टाका प्रमुख तथा पूर्वाञ्चल प्रमुख गोविन्द घिमिरेले बताएको समाचारमा छ।

त्यस्तै अन्नपूर्णले सार्वजनिक विद्यालय लथालिंग शीर्षकमा सम्पादकीय लेखेको छ भने बाकसभित्रको मान्छे शीर्षकमा सुशीला कार्कीको अग्रलेख प्रकाशित छ ।