उदयपुर २ : कांग्रेसका राम राईकाे उम्मेदवारीले अप्ठेराेमा जगन्नाथ खतिवडा

A+ A A-

प्रतिनिधिसभा सदस्य चुनावका लागि उदयपुर- २ मा सत्ता गठबन्धनका तर्फबाट एकीकृत समाजवादीका उपमहासचिव जगन्नाथ खतिवडा मैदानमा छन् । आफ्नै पूर्वपार्टी एमालेका अम्बरबहादुर रायामाझीलाई चुनौती दिँदै अघि सरेका खतिवडालाई चाहिँ गठबन्धनमै रहेको दल नेपाली कांग्रेसका रामकुमार राईले चुनौती दिइरहेका छन् ।

कटारी नगरपालिका- ५ का राईले पार्टी निर्णयविपरीत उदयपुर- २ मा स्वतन्त्र उम्मेदवारी दिएपछि कांग्रेसले उनलाई साधारण सदस्यसमेत नरहने गरी कारबाही गरेको छ । साथमा राईका प्रस्तावक कटारी- ४ का लिलाराज अधिकारी र समर्थक कटारी- ६ का मीनकुमार दाहाल पनि कांग्रेसबाट निकालिएका छन् ।

गत स्थानीय चुनावमा प्रतिनिधिसभा वा प्रदेशसभा सदस्यको टिकट दिने सर्तमा पार्टी नेतृत्वले राईलाई थमथमाएको थियो । तर, सिट बाँडफाँड गर्दा उदयपुर- १ कांग्रेस र २ नेकपा एसकाे भागमा पर्‍याे । प्रदेशको समेत टिकट नपाएपछि राईले विद्रोह गरे ।

जगन्नाथलाई गाह्रो

रामकुमार राई आफूले चुनाव जित्ने दाबी गरिरहेका छन् । नजिते पनि उनले जगन्नाथ खतिवडालाई जानसक्ने कांग्रेसी भोट काट्नेछन् । यसको फाइदा एमालेका रायामाझीलाई पुग्न सक्छ ।

९३ हजार मतदाता रहेको उदयपुर- २ मा ५ वटा स्थानीय तह पर्छन्, जसमा ४ गाउँपालिका र एक नगरपालिका छन् । गत स्थानीय चुनावमा वडाध्यक्षका उम्मेदवारले पाएको मतको हिसाब निकाल्दा यो क्षेत्रमा एमाले अगाडि देखिन्छ, जसले १८ हजार ५ सय ७३ मत पाएको छ । दोस्रो नम्बरमा रहेको कांग्रेसको मत ११ हजार ३ सय ४४ छ । ८ हजार २ सय २ मतका साथ माओवादी केन्द्र तेस्रो, ३ हजार ४ सय २७ मतका साथ नेकपा एस चौथो र १ हजार ४ सय ३४ मत पाएको जसपा पाँचौँ स्थानमा छ । उदयपुर- २ मा जसपाले सिद्धान्त राईलाई उम्मेदवार बनाएको छ ।

यसरी हेर्दा सत्ता गठबन्धनसँग २२ हजार ९ सय ७३ मत देखिन्छ, जुन एमालेकाे भन्दा ४ हजार ४ सय बढी हाे । यही मत मात्रै हेर्ने हो भने जगन्नाथको जित सुनिश्चित छ । तर, उदयपुर- २ को एक मात्र नगरपालिका कटारीका रामकुमार राईको उम्मेदवारीले खतिवडालाई असर गर्न सक्छ । अर्कातिर, उदयपुरमा कांग्रेस पार्टीपङ्क्ति दुई समूहमा विभाजित छ । शेखर समूहको नेतृत्व पूर्वसभापति विदुर बस्नेतले गरेका छन् । आफ्नो सहमतिबेगर संस्थापन पक्षले गरेका निर्णयहरूमा अक्सर उनकाे असहयोग हुने गरेको छ । त्यसैले बस्नेत प्यानलले के गर्छ, त्यसले पनि खतिवडालाई हुनसक्ने घाटानाफा निर्धारण गर्नेछ ।

यद्यपि, केन्द्रीय राजनीतिमा दखल राख्ने नेता भएकाले यसपल्ट खतिवडाकाे जित सुनिश्चित रहेको दाबी गठबन्धनका नेताहरूको छ । हुन पनि, उदयपुर २ मा उम्मेदवारी दिएकामध्ये सबैभन्दा राजनीतिक उचाइमा रहेका नेता खतिवडा नै हुन् ।

२०५६ सालमा खतिवडाले उदयपुर- २ बाट चुनाव जितेका थिए । उदयपुरमा ३ वटा निर्वाचन क्षेत्र हुँदा २०७० मा उनी ३ नम्बर क्षेत्रबाट कांग्रेसका नारायण कार्कीसँग पराजित भए । २०७४ मा पाइसकेको टिकट उनले माओवादीलाई बुझाउनुपरेको थियो । त्यस बेला उनी एमालेमा थिए । र, एमालेकै नेतृत्वमा वाम गठबन्धन बनेको थियो । भागवण्डा गर्दा उदयपुर- २ माओवादीको भागमा पर्‍यो । अनि, पाइसकेको टिकट फिर्ता गरेर माओवादी केन्द्रका सुरेश राईलाई भोट माग्नु पर्‍यो ।

एमालेका रायामाझी पार्टी राजनीतिसँगै मूलतः शैक्षिक क्षेत्रमा क्रियाशील व्यक्ति हुन् । हाल एमालेका प्रदेश कमिटी सदस्य रहेका उनी पार्टीको अञ्चल कमिटी सदस्य भएर काम गरिसकेका नेता हुन् । रायमाझी पहिलाेपल्ट संसदीय चुनावमा प्रतिस्पर्धीका रूपमा उत्रिएका छन् । एमालेको चुस्त संगठनका साथै सत्ता गठबन्धनभित्रको बेमेलको फाइदासमेत आफूलाई मिल्ने विश्वास उनको छ । तर निकै अगाडिदेखि चुनावकाे तयारी गरिरहेका खतिवडामाथि जित निकाल्न उनलाई पनि सजिलोचाहिँ छैन ।

प्रकाशित मिति: बिहीबार, असोज २७, २०७९ १४:५९