त्रिभुवन विश्वविद्यालयले जब ‘पारलैङ्गिक’ चिन्दैनौँ भनेर रजिस्ट्रेसन नम्बर दिएन

त्रिभुवन विश्वविद्यालयले जब ‘पारलैङ्गिक’ चिन्दैनौँ भनेर रजिस्ट्रेसन नम्बर दिएन

A+ A A-

त्रिचन्द्र क्याम्पसको स्नातक तह दोस्रो वर्षमा अध्ययनरत रुक्सना कपाली रजिस्ट्रेसन नम्बर पाउनबाट वञ्चित भएकी छन् । क्याम्पसले कपालीलाई पारलैङ्गिक भएकै कारण त्रिभुवन विश्वविद्यालयमा रजिस्ट्रेसन फारम पठाउन नमिल्ने बताएकाे आराेप छ ।

रुक्सना पारलैङ्गिक महिला हुन् । उनी हाल त्रिचन्द्र क्याम्पसमा मानविकी संकायको ‘भाषा विज्ञान’ विषय पढिरहेकी छन् । त्यसो त उनले रजिस्ट्रेसन नम्बर नपाएको यो नयाँ विषय होइन । उनले यसअघि पनि पहिलो वर्षको परीक्षा दिँदा रजिस्ट्रेसन नम्बरबिना नै परीक्षा दिएकी थिइन् ।

०७४ मंसिर २५ गते त्रिचन्द्रमा भर्ना भएकी रुक्सनाले रजिस्ट्रेसन फाराम २५ फागुनमा भरेकी थिइन् । प्रमाणपत्र बुझाएको चार महिनापछि २६ असार २०७५ मा त्रिचन्द्र क्याम्पसले कपालीलाई पारलैङ्गिक भएकै कारण त्रिभुवन विश्वविद्यालयको फारम पठाउन नमिल्ने बतायो ।

त्यसो त उनको ‘एसएलसी’ र ‘प्लस टु’मा लैङ्गिक परिचय फरक छ । दुवै प्रमाणपत्रमा एउटै लैङ्गिक परिचय नबनाएसम्म क्याम्पसले कुनै पनि परीक्षामा बस्न नदिने अडान लिएपछि रुक्सना क्याम्पसकै सल्लाहमा परीक्षा नियन्त्रण कार्यालय, बल्खु पनि गएकी थिइन् ।

कार्यालयमा उनले आफू पारलैङ्गिक महिला भएकाले लैङ्गिक परिचय फरक पर्न गएको बारे लिखित निवेदन बुझाइन् । तर, कुनै प्रतिक्रिया नआएपछि २९ चैतमा रुक्सनाले सर्वोच्च अदालतमा रिट हालिन् । सर्वोच्च अदालतमा उनले एसएलसीमा भएको आफ्नो लैङ्गिक परिचय सच्याउनका लागि मात्रै रिट हालेकी हुन् ।

असार १४ गते रुक्सनाको परीक्षा फारम भर्ने अन्तिम मिति हो । तर, सर्वोच्चको मुद्दाको पेसी भने असार २० गतेलाई तोकिएको छ । यस कारण रजिस्ट्रेसन नम्बरबाट वञ्चित हुने भएपछि रुक्सनाले परीक्षा दिन नपाउने अवस्था सिर्जना भएकाे छ । आत्मसम्मानका साथ हरेक नागरिकले नैसर्गिक रूपमा पाउनुपर्ने शिक्षाको अधिकार आफूले पाउनुपर्ने उनको माग छ ।

प्रकाशित मिति: आइतबार, जेठ २९, २०७९ १४:३६