समृद्धि र सुख स्वैरकल्पना

A+ A A-

आजको नागरिक दैनिकले सरकारको एक बर्षको समिक्षा गर्दै प्रमुख समाचार प्रकाशित गरेको छ । सरकारले समृद्धिका सपना बाँडेपनि व्यवहारमा कार्यान्वयन गर्न नसकेको समाचारमा उल्लेखछ ।

यस्तै नागरिकले न्यायपालिकामाथि कार्यपालिका हावी शीर्षकमा अर्काे प्रमुख समाचार प्रकाशित गरेको छ । नेपाल कम्युनिस्ट पार्टी (नेकपा) को बहुमतको सरकार बनेपछि न्यायालयमा नेतृत्वका लागि संसद्मा दुई वरिष्ठ न्यायाधीशको नाम पुग्यो। संवैधानिक परिषद्ले सिफारिस गरेका एक वरिष्ठ न्यायाधीश दीपकराज जोशी संसदीय सुनुवाइ समितिबाट अस्वीकृत भए। दोस्रोपटक वरिष्ठ न्यायाधीश चोलेन्द्रशमशेर राणा संसदीय समितिबाट स्वीकृत भएर प्रधानन्यायाधीश बने। प्रधानन्यायाधीश राणालाई संसदीय सुनुवाइमा तलमाथि गरे ‘महाभियोग’ लगाउने डर देखाइयो।

प्रधानमन्त्री केपी शर्मा ओलीको निर्देशनपछि मानवहत्या अभियोगमा पुर्पक्ष थुनामा रहेका रेशम चौधरीलाई प्रतिनिधिसभा सदस्यको शपथ गराइयो। ज्यान मार्ने उद्योगमा दोषी ठहर भई जेल सजाय भोगेर निस्केका राजीव गुरुङ (दीपक मनाङे) लाई प्रदेशसभा सदस्यको शपथ गराइयो। यसबाट राज्यका प्रमुख तीन अंग कार्यपालिका, न्यायपालिका र व्यवस्थापिकाबीचको शक्ति सन्तुलन हुनुपर्नेमा कार्यपालिकाले अन्य दुई अंगमा हस्तक्षेप गर्न खोजेको देखिएको विश्लेषक बताउँछन्। नागरिकले प्रधानमन्त्री स्वरोजगार कार्यक्रमका बारेमा पनि पहिलो पृष्ठमा समाचार प्रकाशित गरेको छ ।

यस्तै आज प्रणय दिवसका अवसरमा नागरिकले नेकपा अध्यक्षद्वय केपी शर्मा ओली र पुष्पकमल दाहालबीचको सम्बन्धबारे सम्पादकीय लेखेको छ । ओली–दाहाल प्रणय शीर्षकमा सम्पादकीय प्रकाशित छ । यस्तै जनयुद्धको जनादेश र यो निराशा शीर्षकमा लेख पनि प्रकाशित छ ।

प्रकाशित मिति: बिहीबार, फागुन २, २०७५ १७:४५