केन्द्रीय प्रशासन हाँक्ने कानुन नै ‘संघीयता विरोधी ’

A+ A A-

संघीय सरकारको स्थायी प्रशासन कमान्ड गर्ने मुख्य कानुन नै संघीयताविरोधी रहेको पाइएको छ । प्रदेश र स्थानीय सरकारको प्रमुख प्रशासनिक पदमा केन्द्रीय निजामती सेवाका कर्मचारी रहने गरी सरकारले संघीय निजामती सेवा ऐन बनाउने गृहकार्य अन्तिम चरणमा पुर्याएको छ ।

यो व्यवस्थाले प्रदेश र स्थानीय तहमा पनि केन्द्रकै कर्मचारीको हालीमुहाली चल्ने देखिएको छ ।
प्रदेशका मुख्यमन्त्री, मन्त्री तथा स्थानीय तहका जनप्रतिनिधिहरूले केन्द्रकै कर्मचारीलाई रिझाएर काम गर्नुपर्ने गरी संघीय निजामती सेवासम्बन्धी विधेयक बनाएको हो । अहिले प्रदेश मन्त्रालय र स्थानीय तहको प्रशासनिक अधिकृतलाई आर्थिक अधिकारसमेत दिइएको छ । ती सबै कर्मचारी केन्द्रीय सरकारकै खटनपटनमा छन् । यो समाचार आजको राजधानी दैनिकले मुख्य पृष्ठमा छापेको छ ।

त्यस्तै टिचिङको गेटमै मोलमोलाई, राम्ररी नहेरी निजीमा गरिन्छ सिधै रेफर शीर्षकमा आज राजधानीले समाचार बनाएको छ । अस्पतालको मूल ढोकाभित्र छिर्दा बिरामीहरू चिकित्सकको व्यग्र प्रतीक्षामा देखिन्छन् । तर निर्धारित समयमा अस्पतालमा आउनुपर्ने धेरै चिकित्सक अस्पतालमा देखिँदैनन् ।

अस्पतालका केही चिकित्सकहरू भने अस्पतालमा बेड नभएको बहाना बनाउँदै गम्भीर बिरामीलाई राम्ररी हेर्दै नहेरी निजी अस्पतालमा रेफर गर्न आतुर देखिएका छन् ।

अस्पतालमा उपचारका लागि आउने बिरामी र तिनका आफन्तले दिनहुँ भोग्ने यस्ता समस्याप्रति न चिकित्सक, न अस्पताल प्रशासन, न त सरकारले नै ध्यान दिएको पाइन्छ । अस्पतालका चिकित्सक र कर्मचारी सेवाको भावनाभन्दा पनि जागिर खाने र समय कटाउनेतर्फ बढी केन्द्रित भएको देखिन्छ ।

त्यस्तै नेपाल विद्यार्थी संघका नेताहरूले संघको तदर्थ समिति बनाउँदा ३२ वर्षे उमेर हद कायम गरी बनाउन पार्टी नेतृत्वलाई दबाब दिएका छन् । मंगलबार पार्टीको केन्द्रीय समिति बैठकका लागि नेताहरू पार्टी कार्यालय प्रवेश गर्दै गर्दा विद्यार्थी नेताहरूले ३२ वर्षे उमेर हद कायम गरी तदर्थ समिति बनाउन पार्टी पदाधिकारीसहितका नेतालाई दबाब दिएका हुन् । उनीहरूले विधानमा भएको व्यवस्थालाई टेकेर पार्टीले नेतृत्वबारे निर्णय लिइनुपर्ने भन्दै ३२ वर्षे उमेर हदबन्दीअनुसार तदर्थ समिति बनाउनुपर्ने माग गरेको समाचार पनि छापेको छ ।

आज राजधानीले भ्रष्टाचारको फाइल खोल शीर्षककमा सम्पादकीय लेखेको छ भने वैदेशिक रोजगारले निम्त्याएको विकृति शीर्षकमा श्रीप्रसाद प्रसाई, मन्त्र, मन्त्रणा र समृछि शीर्षकमा भागवत खनाल र कृषिः निर्वाहमुखी कि निर्यातमुखी शीर्षकमा रत्न प्रजापतिको विचारलाई स्थान दिएको छ ।

प्रकाशित मिति: बुधबार, फागुन १, २०७५ १६:२५