पेसी चढ्छ, न्यायाधीशको इजलासमा मात्रै घुम्छ

A+ A A-

प्रधानन्यायाधीश चोलेन्द्र शमशेर जबराले पदबहाल गरेलगत्तै अब अदालतले द्रुतगतिमा काम अगाडि बढाउने प्रतिबद्धता जनाएका थिए । भ्रष्टाचारका मुद्दा छिटो सक्ने आफ्नो योजना रहेको पनि सुनाए । सोहीबमोजिम उनले एनसेलको करछली विवादको फैसला गरे । तर, वर्षोदेखि अदालतमा अल्झिएका राजनीतिक पहुँचका भ्रष्टाचारको मुद्दा फस्र्योटमा भने ढिलाइ भइरहेको छ ।

अदालतमा बर्सेनि भ्रष्टाचारको मुद्दाको चाङ कछुवाको गतिमा अगाडि बढिरहेको छ । अकुत सम्पत्ति आर्जन, घुस, नक्कली प्रमाणपत्र, गैरकानुनी कर्जा, सार्वजनिक सम्पत्ति हिनामिना, ठेक्कापट्टामा गोलमाल, बैंक घोटालालगायत भ्रष्टाचारका ६ सयभन्दा बढी मुद्दाको पेसी अगाडि बढ्न सकेको छैन । मुद्दाको पेसी चढ्ने, न्यायाधीशको इजलासमा घुम्ने क्रम चलिरहेको छ । यो गति कहिलेसम्म चल्छ सर्वसाधरणको सरोकारको विषय बनिरहेको छ । आजको राजधानी दैनिकले अघिल्लो पृष्ठमा समाचार छापेको छ ।

त्यस्तै राजधानीले एक डाक्टरको भरमा १ हजार २ सय नागरिकले उपचार सेवा लिनुपर्ने बाध्यता छ । दूरदराजका गाउँमा त अझै डाक्टर उपलब्ध हुनै मुस्किल छ । उपलब्ध भएका ठाउँमा पनि बिरामीले डाक्टरको उपचार पाउन निकै कठिन हुने गरेको छ । नेपाल मेडिकल काउन्सिलका अनुसार देशभर २३ हजार ७५१ डाक्टर छन् । जसअन्तर्गत २१ हजार ३३ मेडिकल डाक्टर, २ हजार ७१८ डेन्टल डाक्टर छन् । पुरुष डाक्टरको संख्या १४ हजार १२६ र महिला डाक्टरको संख्या ६ हजार ९०७ छ ।

केन्द्रीय तथ्यांक विभागको पछिल्लो तथ्यांकअनुसार नेपालको कुल जनसंख्या ३ करोड बढी छ । यसरी हेर्दा एउटा डाक्टरको भरमा १ हजार २ सय नागरिक पर्छन् । बिरामीको अनुपातमा डाक्टरको संख्या न्यून हुँदा बिरामीहरूलाई उपचार सेवामा समस्या हुने गरेको समाचार पनि छापेको छ ।

पहिलो पृष्ठमा राजधानीले ट्राफिक प्रहरीले गर्ने सवारी चेकजाँचका क्रममा चालकले बढी घुस दिन खोज्ने गरेको पाइएको छ । प्रहरी तथा सर्वसाधारणका यस्ता व्यवहारमा नियन्त्रण गर्न भन्दै प्रहरीले सुरु गरेको घुस लिने र दिने दुवैलाई कारवाहीमा ल्याउने अभियानले यस्तो देखाएको समाचार पनि छापिएको छ ।

आज राजधानीले विचारपृष्ठमा दाहाल अभिव्यक्तिको तरंग शीर्षकमा विनोद नेपाल, तोडिन नसकेको कुशासनको चक्र शीर्षकमा सागर पण्डित र समायोजन पछिको सेवा प्रवाह शीर्षकमा नगेन्द्र पौडेलको लेख प्रकाशन गरेको छ भने स्वास्थ्यमा मनपरी लाइसेन्स रोक शीर्षकमा सम्पादकीय लेखेको छ ।

अन्तिम पृष्ठमा नेपाली महिला फुटबल टोलीले भारतलाई हिरो गोल्डकपमा घरेलु मैदानमै हराएको लगायतका खेलसम्बन्धि समाचार छापेको छ ।

प्रकाशित मिति: मंगलबार, माघ २९, २०७५ १६:५२