प्लास्टिकको सट्टा केराका पात

A+ A A-

प्लास्टिक वातावरणीय दृष्टिले निकै खराब मानिन्छ त्यसैले यतिबेला संसारभर नै प्लास्टिक विस्थापनको अभियान चलिरहेको छ । हालै मात्र दक्षिण कोरियाले प्लास्टिक प्रयोगमा रोक लगाएको छ ।

सिंगापुरका सुपरमार्केटमा प्लास्टिकको झोला प्रयोग कम गर्नेबारे अभियान नै सुरु गरेको छ भने ताइवानका पसलमा ग्राहकलाई प्लास्टिकको प्रयोगमा हतोत्साहित गर्न एकल उपयोगवाला प्लास्टिकको झोलामा शुल्क लिन सुरु गरेको छ । चीनले सन् २००८ मा प्लास्टिकको प्रयोगमा प्रतिबन्ध लगाएपछि यसको प्रयोगमा ६६ प्रतिशतले कमी आएको छ ।

नेपालका विभिन्न सहरलाई प्लास्टिक प्रयोगमा रोक लगाए पनि त्यसको पूर्ण कार्यान्वयन हुन सकेको छैन । तर, भियतनामका सुपर मार्केटमा भने प्लास्टिकलाई कडाइसाथ निषेध गर्न थालिएकाे छ ।

भियतनामी सुपरमार्केटमा यतिबेला प्लास्टिकको सट्टामा केराका पातलाई सामान प्याकिङमा प्रयोग गर्न थालिएको छ । सामान प्याकिङको यो वैकल्पिक उपाय भियतनामका सुपर मार्केटले पनि थाइल्यान्डबाट सिकेर भित्र्याएका हुन् ।

थाइल्यान्डको चियांगमाई सुपरमार्केटले यस्तो पद्धति प्रयोग गरेको तस्बिर फेसबुकमा राखेपछि वातावरणमैत्री प्याकेजिङको प्रशंसा भएको थियो । एउटा उपन्यासमा वर्णित यो पद्धतिले भियतनामी सुपरमार्केटलाई चाँडै नै आकर्षित गर्यो ।

भियतनामको लोटे मार्ट, साइगन को–सप, बिग सीजस्ता ठूला सुपरमार्केटले थाई स्टोरमा केराका पातलाई प्याकेजिङका लागि विकल्पका रुपमा गरेको प्रयोगलाई अनुसरण गर्न सुरु गरेका छन् । भीएन एक्सप्रेससँगको कुराकानीका क्रममा लोटे मार्टका एक प्रतिनिधिले आफूहरु अझै पनि यसबारे परीक्षणकै क्रममा रहेकाे बताएका छन् ।

तर, छिटोभन्दा छिटो राष्ट्रव्यापी रुपमा केराका पातलाई प्याकिङको वैकल्पिक उपायका रुपमा प्रयोग गर्ने बताए । साग सब्जीका साथै ताजा मासु प्याकिङका लागि पनि केराका पात प्रयोग गर्न सकिन्छ । ग्राहकले पनि प्लास्टिकको विकल्पमा प्रयोग गरिएको यो उपायको प्रशंसा गरेका छन् ।

पछिल्लो एक रिपोर्टमा भियतनाममा प्लास्टिक प्रयोगसम्बन्धी अपत्यारिलाे तथ्यांक सार्वजनिक भएकाे थियो । जसअनुसार प्रतिदिन २ हजार ५ सय टन प्लास्टिकजन्य फोहोर उत्पादन गर्ने गर्छन् ।