त्रिविले विद्यार्थीको शैक्षिक प्रमाणपत्र हुलाकमार्फत घरमै पुर्‍याइदिने

A+ A A-

त्रिभुवन विश्वविद्यालयले विद्यार्थीको शैक्षिक प्रमाणपत्र घरघरमै पुर्‍याइदिने तयारी थालेको छ । विद्यार्थीले अनलाइनमार्फत दिएको आवेदनका आधारमा हुलाकमार्फत प्रमाणपत्र पठाउने त्रिविको योजना छ ।

विश्वविद्यालयले यसको लागि सफ्टवेयर तयार गरिसकेको परीक्षा नियन्त्रक पुष्पराज जोशीले शिलापत्रलाई जानकारी दिए । उनका अनुसार बैंकले शुल्क लेनदेन गर्ने सफ्टवेयर बनाउने काम सकेको छैन । बैंकको तर्फबाट उक्त सफ्टवेयर निर्माण भइसकेपछि यो प्रक्रिया थप अघि बढ्नेछ ।

‘बैंकले सफ्टवेयर बनाइसकेपछि हामीले हुलाकसँग पनि सम्झौता गर्छौँ । हुलाकसँग सम्झौता भएपछि सबै काम सकेर मंसिरभित्रै यसलाई लागु गर्ने योजना छ', जोशीले भने ।

योसँगै विद्यार्थीले शैक्षिक प्रमाणपत्र लिन बल्खुसम्म धाउनुपर्ने बाध्यताको अन्त्य हुने जोशीको विश्वास छ ।

विद्यार्थीले गाउँका क्याम्पसहरूमा अध्ययन गरेपनि प्रमाणपत्रको लागि काठमाडौंसम्म धाउनुपर्ने बाध्यता छ । जसको लागि हप्तौँसम्म विद्यार्थीले झन्झट बेहोर्नुपर्नेसम्मको स्थिति थियो । बल्खु आएपछि पनि घण्टौँ लाइन बसेपछि मात्र विद्यार्थीले प्रमाणपत्र लिन पाउँथे । गाउँदेखि काठमाडौंसम्म आउनुपर्दा विद्यार्थीको लागि यो प्रक्रिया एकदमै खर्चिलो हुन जान्थ्यो ।

तर, अब विद्यार्थीले अनलाइनमार्फत त्रिविले मागेको कागजात पेश गरेपछि त्रिविले हुलाकबाटै प्रमाणपत्र पठाइदिने भएको हो । हुलाकबाट सम्बन्धित क्याम्पसमा प्रमाणपत्र पुग्ने र क्याम्पसमार्फत विद्यार्थीले सहजै प्रमाणपत्र पाउने भएका हुन् ।

यदि अनलाइनमा पेश गरेको कागजात अपुग भएमा त्रिविले नै विद्यार्थीसँग सम्पर्क गरी पुनः आवश्यक कागजात माग गर्नेछ । र, त्यसैको आधारमा प्रमाणपत्र विद्यार्थीको हातहातमा पठाइदिने जोशीले बताए ।

प्रकाशित मिति: बिहीबार, कात्तिक ४, २०७८ १२:१०