उपत्यकाका सात सम्पदा, विश्वसम्पदा सूचीबाट हट्ने उच्च जोखिममा

A+ A A-

विश्वसम्पदा सूचीमा सूचीकृत सम्पदाहरूको पुनर्निर्माणमा आवश्यक मापदण्डलाई ख्याल नगरी जथाभावी निर्माण गरिँदा ती महत्वपूर्ण सम्पदाहरू उच्च जोखिमा परेका छन् । जसकारण विश्वसम्पदा सूचीबाटै हट्ने खतरा बढेको छ । पुनर्निर्माणमा सरकारी निकायको लापार्बाही र चरम बेवास्ताले गर्दा ती सम्पदा विश्वसम्पदा सूचीबाट हट्ने खतरा बढेको हो ।

यसरी, उच्च जोखिममा परेका सम्पदामा काठमाडौं दरबार स्क्वायर, भक्तपुर दरबार स्क्वायर, पाटन दरबार स्क्वायर, स्वयम्भूनाथ, पशुपतिनाथ, बौद्धनाथ र चाँगुनारायण रहेका छन् । यो समाचार आजको राजधानी दैनिकमा छापिएको छ ।

त्यस्तै राजधानी दैनिकले नेपाल विद्यार्थी संघ वर्तमान कार्यसमितिको म्याद सकिएर कामचलाउ बनिरहेका बेला पुनः म्याद थप्ने कि तदर्थ समिति बनाएर महाधिवेशनको जिम्मा दिने भन्ने विषयमा कांग्रेसभित्र विवाद देखिएको छ । भ्रातृ संगठनमध्येका चलायमान संगठन मानिएको नेविसंघलाई माउ पार्टी कांग्रेसले २ भदौबाट म्याद थप गर्दै विघटनबाट जोगाउँदै आइरहेको छ ।

कांग्रेसको जारी केन्द्रीय समितिको बैठकमा नेविसंघकै विषयलाई लिएर पार्टीभित्र नेताहरू विभाजित देखिएका छन् । यस्तै, पार्टीको संस्थापन पक्षसमेत यस विषयमा विभाजित देखिएको समाचार पनि छापेको छ ।

स्वच्छता मेरो पहिचानः सफाइ मेरो योगदान’ भन्ने नारासहित बाग्मती सफाइ महाअभियानको ३००औं साताको विशेष कार्यक्रम शनिबार सम्पन्न भएको छ । तीन दिनदेखिको वर्षा र हिमपातले जनजीवन अस्तव्यस्त भइरहेका बेला महाअभियानको ३००औं साताको विशेष कार्यक्रम सम्पन्न भएको हो । झरी र उपत्यका आसपासका डाँडामा हिउँ परेर मौसम प्रतिकूल बने पनि शनिबार बिहान बाग्मती सफाइमा सहभागी हुनेको संख्या उल्लेख्य रहेको समाचार पनि आज राजधानीमा छापिएको छ ।

आज राजधानीले सरकारले संघीय सरकारको निजामती प्रशासन हाँक्ने गरी बनाउन प्रस्ताव गरेको संघीय निजामती सेवा ऐनको मस्यौदामा समावेशीसम्बन्धी व्यवस्थामा हेरफेर गरिएको छ । पछिल्लोपटक बसेको मन्त्रिपरिषद् बैठकले संघीय निजामती सेवासम्बन्धी विधेयकलाई संघीय संसद्मा पठाउने निर्णय गरेको थियो । हाल सो विधेयक संसद्मा दर्ता भइसकेको छ ।
संघीय निजामती सेवाको गठन, सञ्चालन र सेवाका शर्तका सम्बन्धमा व्यवस्था गर्न बनेको सो विधेयकमा हालको समावेशी प्रावधानमा केही संशोधन गरिएको समाचार पनि छापेको छ ।

प्रकाशित मिति: आइतबार, माघ २७, २०७५ १९:०१