‘विद्यालयहरू कमिसनको चक्करमा फस्दा ३० प्रतिशत विद्यार्थीका पुस्तक जनक शिक्षामै थन्किए'

‘विद्यालयहरू कमिसनको चक्करमा फस्दा ३० प्रतिशत विद्यार्थीका पुस्तक जनक शिक्षामै थन्किए'

A+ A A-

नयाँ शैक्षिकसत्रको एक महिना बित्नै लागिसक्दा पनि अझै अधिकांश विद्यार्थीले पुस्तक पाएका छैनन् । जनक शिक्षा सामग्री केन्द्रका अनुसार कुल विद्यार्थी संख्याको ३० प्रतिशत पाठ्यपुस्तक अझै बिक्री नभएको हो ।

शैक्षिकसत्र सुरु हुनुअगावै जनक शिक्षाको नौवटै केन्द्रमा पाठ्यपुस्तक पुर्‍याए पनि हालसम्म ७० प्रतिशत विद्यार्थीका पुस्तक बिक्री भएको प्रवक्ता चित्रकुमार आचार्यले बताए । यद्यपि अझै पुस्तक लाने क्रम जारी रहेको उनको भनाइ छ ।

‘उनीहरूले पुस्तक नपाएको हो या विद्यालयले अन्य पब्लिकेसनका किताबहरू चलाएका हुन् भन्न सकिन्न,' उनले भने, ‘यद्यपि किताब पाइएन भन्ने गुनासो आएको छैन । सायद महामारीका कारण भर्ना दरमै कमी आएको हो कि ?'

शैक्षिकसत्र सुरु हुँदै गर्दा सरकारले भने सबै विद्यार्थीलाई घरघरै पुस्तक पुर्‍याउने वचन दिएको थियो । अन्तत : विगतकै नियती यस वर्ष पनि दोहोरियो, अधिकांश विद्यार्थीले पुस्तक अहिलेसम्म पाएका छैनन् ।

कोरोना महामारीका कारण भर्नादर कम भएको र पुस्तक सोचेजस्तो नगएको हुन सक्ने सरोकारवालाको अनुमान रहे पनि त्यस्तो नभएको बताउँछ, शिक्षा तथा मानव स्रोत विकास केन्द्र । ‘भर्नाको अभिलेख केलाएर यति नै भयो भन्न केही समय लाग्छ । तर, पछिल्लो वर्षको भन्दा यसवर्ष केही मात्रामा भर्नादर बढेकै छ,' केन्द्रका महानिर्देशक वैकुण्ठ अर्यालले भने ।

स्कुलहरूले सरकारी पुस्तक नलग्नुको कारण भने कतिपय विद्यालयले निजी प्रकाशनबाट लग्नु रहेको अर्यालको अनुमान छ । अंग्रेजी माध्यमबाट पढाउने ट्रेण्ड पछ्याउँदै कतिपय विद्यालयले निजी प्रकाशनका किताबहरू लगेको उनी बताउँछन् । उनका अनुसार अंग्रेजी माध्यमबाट सरकारी विद्यालयले पनि पढाउने भएपछि निजी विद्यालयले चलाउने पुस्तक उनीहरूले किन्ने गरेका हुन् । जुन पुस्तक निजी पब्लिकेसनले छाप्ने गरेका छन् ।

त्यसमाथि कतिपय ठाउँमा जनक शिक्षाको लोगो हालेर अनधिकृत रूपमा पुस्तक बेचेको पाइएको उनले सुनाए । ‘काभ्रेलगायतका केही ठाउँमा हामीले अनुगमनका क्रममा सो कुरा पत्ता लगायौँ,' उनले भने, ‘यसबारे अनुसन्धान गरेका छौँ । पत्ता लागेपछि कारबाही गरिन्छ ।'

त्यस्तै, कतिपय सरकारी विद्यालय कमिसनको चक्करमा फसेकाले यस्तो अवस्था आएको बताउँछन्, अभिभावक संघका अध्यक्ष सुप्रभात भण्डारी । अनुगमनका क्रममा कर्णाली भेगका विद्यार्थीले अझै पुस्तक नपाएको भेटिएको भण्डारी सुनाउँछन् । त्यस्तै, अन्य विभिन्न स्थानमा समेत पुस्तक नपुगेको उनी बताउँछन् ।

निजी छापाखानाले समेत केही किताब छापेकाले कमिसनको खेलमा पुस्तक विद्यार्थीसम्म पुग्न नसकेको उनको दाबी छ ।

‘स्कुलहरू किन्न नआउने, आए पनि समयमा विद्यार्थीलाई उपलब्ध नगराएकाले समस्या भएको छ । सरकारी स्कुलले पनि कमिसन खोज्दा रहेछन्,' उनले भने, ‘जनक शिक्षाले दिने कमिसनभन्दा प्राइभेटले बढी दिएकाले पुस्तक नपुगेको हो । विद्यालयहरू कमिसनको चक्करमा फस्दा ती ३० प्रतिशत विद्यार्थीका पुस्तक जनक शिक्षामै थन्किनुपरेको छ ।'

प्रकाशित मिति: सोमबार, असार २८, २०७८ १९:३६