राष्ट्रिय सतर्कता केन्द्र भन्छ, अधिकांश निर्माणाधीन सडकमा प्राविधिक त्रुटि

राष्ट्रिय सतर्कता केन्द्र भन्छ, अधिकांश निर्माणाधीन सडकमा प्राविधिक त्रुटि

A+ A A-

सरकारकारले ठेक्का दिएका देशभरका अधिकांश निर्माणाधीन सडकखण्डमा त्रुटि नै त्रुटि भेटिएको छ । राष्ट्रिय सतर्कता केन्द्रको प्राविधिक टोलीले मुलुकका अधिकांश भागमा निर्माणाधीन सडकमा व्यापक लापर्बाही भइरहेको औंल्याएको छ ।

सतर्कता केन्द्रले प्रधानमन्त्री केपी शर्मा ओलीलार्ई बुझाएको आर्थिक वर्ष २०७४÷७५ को प्रतिवेदनमा निर्माणाधीन अधिकांश सडकमा ठेकेदारको गम्भीर लापर्बाही देखिएको भन्दै अनुगमन कार्यलाई सशक्त बनाउन सुझाव दिएको छ । सतर्कता केन्द्रका प्रवक्ता विष्णुराज लामिछानेले सडक निर्माणको क्रममा प्राविधिक रूपमा नै व्यापक त्रुटि देखिएको जानकारी दिएको समाचार आजको राजधानी दैनिकमा छापिएको छ ।

नेपाली कांग्रेसको महासमिति बैठकले पारित गरेको पार्टीको विधानमा परिमार्जन गरिने केही मुद्दामा शीर्ष नेताहरूबीच विमति देखिएको छ । विधानको पुरानो व्यवस्थाअनुसार केन्द्रीय सदस्य र पदाधिकारीहरू स्वतः महाधिवेशन प्रतिनिधि हुने व्यवस्थालाई हटाएर बुथ तहबाटै निर्वाचित भएर आउने गरी व्यवस्था गर्ने कि पुरानै व्यवस्था राख्ने भन्नेमा नेताहरू विभाजित भएका हुन् । जारी केन्द्रीय समिति बैठकमा महाधिवेशन प्रतिनिधि बन्नका लागि बुथ तहबाटै केन्द्रीय नेताहरूसमेत निर्वाचित भएर आउने गरी विधानमा व्यवस्था गर्न शीर्ष नेताबाटै आवाज उठेकोे हो ।

गत ८ पुसमा सम्पन्न पार्टी महासमिति बैठकमा जिल्ला सभापतिहरूले सो विषयलाई मुख्य एजेन्डाका रूपमा नै उठाएको भन्दै पूर्वमहामन्त्री कृष्णप्रसाद सिटौला र नेता डा। शेखर कोइरालाले महासमितिको म्यान्डेटभन्दा बाहिर गएर निर्णय नगर्न नेतृत्वलाई सुझाव दिएको समाचारपनि राजधानी दैनिकले आजको अंकमा छापेको छ ।

त्यस्तै आजको राजधानी दैनिकले सरकारी निकायमध्ये सबैभन्दा बढी भ्रष्टाचार मालपोत कार्यालयमा हुने गरेको समाचारलाइपनि प्राथमिकताका साथ छापेको छ । अख्तियार दुरुपयोग अनुसन्धान आयोगले भ्रष्टाचार बढी हुने सूचीमा राखेका विभिन्न १४ वटा सरकारी कार्यालयमध्ये मालपोत कार्यालयमा सबैभन्दा बढी भ्रष्टाचार हुने गरेको पाइएको हो ।