छुवाछुत आरोपितप्रति शिक्षामन्त्रीको अस्वाभाविक चिन्ता, मन्त्रीकै अगाडि पीडितविरुद्ध नाराबाजी

छुवाछुत आरोपितप्रति शिक्षामन्त्रीको अस्वाभाविक चिन्ता, मन्त्रीकै अगाडि पीडितविरुद्ध नाराबाजी

A+ A A-

छुवाछुत आरोपमा समातिएकी सरस्वती प्रधानलाई लिन शिक्षामन्त्री कृष्णगाेपाल श्रेष्ठ आज झण्डावाला गाडी लिएर महानगरीय प्रहरी वृत सिंहदरबार पुगे । सञ्चारकर्मी रुपा सुनारले आफूलाई दलित भएकै कारण घरमा कोठा नदिएको भन्दै उजुरी हालेपछि पक्राउ परेकी प्रधान तीन दिनदेखि हिरासतमा थिइन् । तर, प्रमाण नपुगेकाे भन्दै सरकारी वकिल कार्यालयले हाजिरी जमानीमा छाेड्न भनेपछि उनी रिहा हुँदै थिइन् । उनै सरस्वतीलाई लिन मन्त्री श्रेष्ठ सरकारी गाडी लिएर शानका साथ प्रहरी कार्यालय पुगेका हुन् ।

प्रहरी कार्यालयअगाडि भीडभाड थियाे । थुनामुक्त भएकी घरबेटी अनि उनलाई छुटाउन पुगेका शिक्षामन्त्रीको टोली निस्कनासाथ बाहिर भेला भएकाहरूले होहल्ला गर्दै पीडित युवतीविरुद्ध नै नाराबाजी गरे । साइसाइ सुइसुइ पार्दै घरबेटीका समर्थकले खुसीयाली मनाए भने शिक्षामन्त्री पनि ठूलै जित मिलेजस्तै हात हल्लाउँदै बाहिरिए । र, सँगसँगै मन्त्रीकै गाडीमा चढेर घरतिर लागिन् आरोपित घरबेटी सरस्वती ।

उनीहरू गाडी चड्नासाथ घरबेटीकाे समर्थनमा मानिसहरूले हुटिङ गरे । उनीहरू यतिमै राेकिएनन्, ‘रुपा सुनार मुर्दावाद ! रुपा सुनारलाई कारबाही गर' जस्ता नारा पनि लगाए । यी सबै दृश्यलाई बहालवाला मन्त्रीले मुकदर्शक बनेर हेरे । यसरी मन्त्री स्वयंले छुवाछुत आरोप लागेकी घरबेटीलाई आफ्नो झण्डावाला गाडीमा राखेर घरसम्म पुर्‍याइदिए ।

महानगरीय प्रहरी वृत सिंहदरबारका अनुसार हिरासतमा लिइएको तीन दिन पुगिसकेकाले शिक्षामन्त्री नआए पनि घरबेटी छुट्ने थिइन् । त्यसमाथि सरकारी वकिल कार्यलयको आदेशअनुसार हाजिरी जमानीमै छोड्ने तयारी प्रहरीको थियो ।

'मन्त्रीज्यू नआउँदा पनि प्रक्रियाअनुसार हाजिरी जमानीमा घरबेटी छुट्थिन्', महानगरीय प्रहरी वृतका एक अधिकारीले शिलापत्रसँग भने, ‘किन आउनुभएको हो हामीलाई जानकारी भएन । उहाँ आउँदा सामान्य भीड र होहल्ला भएको थियो ।'

घटनालाई लिएर मन्त्री नै छुवाछुतकाे पक्षधर देखिएकाे भन्दै सामाजिक संजालमा आलोचना भइरहेकाे छ । ट्विटरमा विशाल भट्टले शिक्षामन्त्रीले नस्लवादी चरित्र देखाएको टिप्पणी गरेका छन् । ‘शिक्षामन्त्री श्रेष्ठको दबाबमा जातीय छुवाछुत गर्ने घरबेटी थुनामुक्त भइछिन् । समय आएपछि सबैले नस्लवादी चरित्र देखाउने रैछन्', उनले लेखेका छन् ।

त्यस्तै निर्मल प्रसाईं लेख्छन्, ‘आरोपितलाई मालाले स्वागत गरेको धेरै देखिएको थियो, आजकल मन्त्री आफैँ जेलदेखि घरसम्म पुर्‍याउन जान लागे । कति फुर्सदिला, कति लाज गुमाएका ?'

नवीन तिवारीले फेसबुकमा लेखेका छन्- विभेद गरेको आरोपितलाई मुलुकको शिक्षामन्त्रीले छुटाएर आफ्नै गाडीमा हालेर लैजान्छ । मेरो समाजको सक्कली रूपको उदाहरण यही हो ।

प्रकाशित मिति: बुधबार, असार ९, २०७८ २०:५१