'राष्ट्रिय परिचयपत्र बनाउन गा'को, माथिको आदेश भन्दै कर्मचारीले ढाकाटोपी खोल्न लगाए' (भिडियाेसहित)

'राष्ट्रिय परिचयपत्र बनाउन गा'को, माथिको आदेश भन्दै कर्मचारीले ढाकाटोपी खोल्न लगाए' (भिडियाेसहित)

A+ A A-

रबिन चाम्लिङले ट्विटरमा हिजाे एउटा भिडियाे पाेस्ट गरे, जहाँ खोटाङ नेर्पाका अर्जुन राई गुनासाे गरिरहेका छन्, 'राष्ट्रिय परिचयपत्र बनाउन गा'काे, माथिको आदेश भन्दै ढाकाटोपी खोल्न लगाए ।'

परिचयपत्र बनाउन ढाकाटाेपी खाेल्न बाध्य पारिएकाे गुनासाेसहितकाे भिडियाे धेरैले धमाधम रिट्विट गरिरहेका छन् । याे स्टाेरी तयार पार्दासम्म १ सय ५ जनाले भिडियाे रिट्विट गरिसकेका छन् । भिडियाेकाे कमेन्टमा टाेपी खाेल्न लगाएकाे भन्दै कर्मचारीलाई गाली गरेका छन् ।

‘राष्ट्रिय परिचयपत्र बनाउन बोलायो, बोलाएपछि म गएँ । त्यहाँ फोटो खिच्न लाग्दा टोपी झिक्नु भनेर भन्यो’, दिक्तेल रुपाकोट मझुवागढी नगरपालिकाका ६८ वर्षीय राईले भिडियाेमा भनेका छन्, ‘टोपी खोल्नैपर्छ भनेपछि मैले किन भनेर साेध्दा उनीहरूले माथिको आदेश भन्ने जवाफ दिए ।’

परिचयपत्रमा नेपाली टोपी बिनाको फोटो खिच्न लगाउदा जनताको गुनासो। - अर्जुन राई खोटाङ नेर्पा pic.twitter.com/fxZT3PGZyd
— rabin chamling (@ChamlingRabin) April 10, 2021

राष्ट्रिय परिचयपत्र नभए पनि नागरिकताबाट काम चलिहाल्छ नि भन्ने ठानेपछि उनले टोपी झिकेर फोटो नखिच्ने निर्णय गरे । तर, जबर्जस्ती टोपी झिक्न बाध्य बनाइएकोमा उनको गुनासो छ । ‘टोपी भनेको मेराे चिनारी हो, म झिक्दिनँ भनेँ’, उनले भने, ‘उबेला टोपी लगाएर, दुइटा कान देखाएर पासपोर्ट फोटो खिचिन्थ्यो ।’

परिचयपत्रका लागि फाेटाे खिच्नुअघि नागरिकलाई शीरकाे टोपी खाेल्न लगाइएकै हाे त ? नेर्पा- ६ का वडा अध्यक्ष माधव राईले याे कुरा स्वीकारे । तर, राष्ट्रिय परिचयपत्र बनाउन खटिएका कर्मचारीले नै त्यस्तो ह्वीप जारी गरेकोले आफूलाई यसबारे धेरै कुरा थाहा नभएको उनकाे जिकिर छ । राईले शिलापत्रसँग भने, ‘परिचयपत्र बनाउन खटिएका कर्मचारीले नै भनेपछि सबैलाई टोपी खोल्न लगाइएको हो ।’

त्यसाे भए कर्मचारीले यसाे किन गरे त ?

खोटाङका सहायक प्रमुख जिल्ला अधिकारी विकल श्रेष्ठले जवाफमा प्राविधिक कारण देखाए । ‘टोपी लगाउँदा अनुहार फोकस नहुने भएकाले पछि अनुहार चिन्न अप्ठेराे हुन्छ भनेर खोल्न अनुरोध गरिएको हो’, उनले भने, ‘टोपी नै लगाउन नपाउने भनेर ह्वीप जारी गरिएकोचाहिँ हाेइन ।'

प्रकाशित मिति: आइतबार, चैत २९, २०७७ १८:४०