विघटन सिफारिसको विरोध गर्दा ओलीले प्रचण्ड-माधव गुटकाे आवाज आयो भनेपछि...

A+ A A-

राति १० बजे प्रधानमन्त्री कार्यालयअन्तर्गतको सचिवालयले 'भोलि बिहान मन्त्रिपरिषद् बैठक बस्छ, उपस्थित हुुनू' भनेर म्याेसेज पठाएकाे एक मन्त्रीले बताए । 'मन्त्रिपरिषद् बैठकमा ढिलो पुगेको थिएँ । म पुगेकाे २० मिनेटपछि प्रधानमन्त्री केपी शर्मा ओली बैठककक्षमा प्रवेश गर्नुभएको थियाे,' ती मन्त्रीले बताए ।

‘मन्त्रिपरिषद् बैठक ९:३० बजेलाई बोलाइएको थियो । प्रधानमन्त्री केपी शर्मा ओली १० बजे मात्र बैठकस्थलमा प्रवेश गर्नुभयाे । बैठकमा आउनुअघि प्रधानमन्त्री ओलीले कानुनविद् र राष्ट्रपति विद्यादेवी भण्डारीसँग फोनमा संवाद गरेर आउनुभएछ,’ ती मन्त्रीले भने, ‘मेरा प्यारा मन्त्रीहरू, ३ वर्ष पो भएछ सँगै यात्रा गरेको । कतिपयको अनुहार नै राम्रो चिन्दिनँ होला । बाटोमा भेट्दा तपाईं प्रधानमन्त्री हुँदा मन्त्री थिएँ भन्नुहोला भनेर बैठक सुरु गर्नुभयो ।’

प्रधानमन्त्री ओलीले पीएलाई फाइल मागेर निर्णय हतारमा सुनाए । प्रधानमन्त्री ओलीले निर्णय सुनाउन नपाउँदा मन्त्रीले विरोध गर्न थालेको उनको भनाइ छ । प्रधानमन्त्री ओली मन्त्रीको विरोधलाई पुष्पकमल दहाल 'प्रचण्ड' र माधव नेपालको आवाज आयो भन्दै वास्ता नगरेको उनले जानकारी दिए ।

मन्त्रीहरूको विरोधलाई वास्ता नगरी बैठककक्षबाट प्रधानमन्त्री बाहिरिएको ती मन्त्रीले बताए । ‘बैठकमा उपस्थित अर्का मन्त्री भन्छन्, ‘राजनीति उथलपुथल हुँदै छ भनेर थाहा थियो । तर, ससंद् नै विघटन हुन्छ भनेर कल्पनासमेत गरेको थिइनँ । प्रधानमन्त्री ओलीले ससद् विघटनको विरोध गर्ने मन्त्रीलाई औँलाले देखाए, पख्लास् भनेजस्तो गरेर । कतिपय मन्त्रीलाई के भइरहेको छ भनेर जानकारी पनि भएन ।’

प्रधानमन्त्रीले आफ्नो निर्णय सुनाए । मन्त्रीले के भनाइ राख्छन् भन्ने पनि वास्तै नगरी बाहिरिएको उनको भनाइ छ ।

मन्त्रिपषिद् बैठकमा कुन मन्त्रीले के बोले ?

संसद् विघटनका बारेमा सबैभन्दा चर्को विरोध गृहमन्त्री रामबहादुर थापा, कृषि तथा पशुपन्छीमन्त्री घनश्याम भुसाल, ऊर्जामन्त्री वर्षमान पुन, पराराष्ट्रमन्त्री प्रदीप ज्ञवाली र संघीय मामिला तथा सामान्य प्रशासनमन्त्री हृदयेश त्रिपाठीले विरोध गरेका थिए ।

लोकतन्त्रमाथि प्रश्न उठने र पार्टी निर्णय विपरीत संसद् विघटन गर्नु उचित नहुने धारणा कृषिमन्त्री भुसालले राखेका थिए । मन्त्री भुसालले संसद् विघटन गर्नुको कारणसमेत प्रधानमन्त्रीसँग बैठकमा मागेको एक मन्त्रीले बताए । यस्तै, गृहमन्त्री थापाले प्रधानमन्त्री ओलीले निर्णय सुनाउँदै गर्दा यस्तो निर्णय नलिन आग्रह गरेका थिए ।

संसद् विघटन गर्नुपर्ने केही कारण नभएको र पार्टीमा छलफल भइरहेका बेला यो निर्णयले अर्को राजनीतिक मोड लिने भन्दै प्रधानमन्त्रीलाई संसद् विघटन नगर्न सुझाव दिएको बैठक उपस्थित एक मन्त्री बताउँछन् । साथ, परराष्ट्रमन्त्री प्रदीप ज्ञवाली राजनीतिक सन्देश राम्रो नराम्रो भन्दै ससंद् विघटनको निर्णय रोक्न प्रधानमन्त्रीले आग्रह गरेका थिए ।

मन्त्री ज्ञवालीले संसद् विघटन गर्दा देश अझ संकटमा फस्ने भन्दै प्रधानमन्त्रीलाई यो निर्णय तत्काल नगर्न आग्रह गरेको ती मन्त्रीले जानकारी दिए ।

यसैगरी, 'प्रधानमन्त्रीज्यू तपाईंले को-कोसँग सल्लाह गरेर संसद् विघटनकाे सिफारिस गर्दै हुनुहुन्छ । यो निर्णय तत्काल रोक्नुहोस्' भन्दै ऊर्जामन्त्री पुनले विरोध गरेको ती मन्त्रीले जानकारी दिए । अर्को सामान्य प्रशासनमन्त्री त्रिपाठीले समेत संसद् विघटनको विरोध गरेको उनको भनाइ छ ।

मन्त्रीहरूले संसद् विघटनको विरोध गर्न थाले पनि प्रधानमन्त्री ओलीले 'मन्त्रीज्यूहरू कराउँदै विरोध गरिरहनुहोस्, बैठक सकियो । अन्तिम निर्णय यही हो । सम्बन्धित ठाउँमा खबर गर्नुहोला' भनेर बैठक कक्षबाट हात हल्लाउँदै बाहिरिएको बैठकमा उपस्थित मन्त्रीहरूले जानकारी दिए ।

प्रकाशित मिति: आइतबार, पुस ५, २०७७ १३:०३