नेपाली क्रिकेटको ऐतिहासिक उपलब्धी

A+ A A-

नेपाली क्रिकेटले एकपछि अर्को सफलता हात पार्दै गइरहेको छ। नेपाली क्रिकेटको सर्वोच्च संस्था नेपाल क्रिकेट संघ (क्यान) निलम्बनमा परेको ३ वर्ष भइसक्यो। तरपनि नेपाली राष्ट्रिय क्रिकेट टोलीले हात पारेको सफलताले क्रिकेट प्रेमीमात्र नभएर देशबासीलाई समेत खुशी पार्दै आइरहेको छ। आजको नागरिक दैनिकले यसलाई प्रमुख समाचार बनाएको छ ।

२०७३ सालमा क्यानभित्र साधारणसभा तथा नयाँ नेतृत्व चयनको विषयमा उग्र विवाद भएपछि अन्तर्राष्ट्रिय क्रिकेट परिषद् (आइसीसी)ले क्यानलाई निलम्बन गरेको थियो। त्यसयता नेपाली टोलीले जति सफलता हात पारेको छ, त्यो सब आफ्नो परिश्रम र मिहिनेतको फल हो।

त्यस्तैगरी, चालु आर्थिक वर्षको मंसिरसम्म उच्च आयातका कारण वैदेशिक मुद्रामा चाप परेपछि सरकारले विलासी वस्तुको आयात रोक्ने तयारी गरेको समाचार नागरिक दैनिकमा छ। मुलुकको मौद्रिक जिम्मेवारी सम्हालेको राष्ट्र बैंकले आयात उच्च हुँदा मुलुकको शोधनान्तर बचत खुम्चिँदै गएको भन्दै विलासीसहित अन्य केही वस्तुको आयातमा परिमाणात्मक बन्देज लगाउन सरकारलाई सुझाव दिएको हो।

राष्ट्र बैंकका कार्यकारी निर्देशक एवं अनुसन्धान विभाग प्रमुख गुणाकर भट्टले आयातित वस्तुले अर्थतन्त्रमा पारेको असरबारे विश्लेषण गरेर सरकारलाई आयातमा परिमाणात्मक बन्देज लगाउन सुझाव दिएको जानकारी दिए।

आजको नागरिक दैनिकले सरकारले सशस्त्र द्वन्द्व सकिएको १२ वर्षपछि संक्रमणकालीन न्याय प्रक्रिया टुंग्याउन आफ्नै ‘मोडल’ बनाउने तयारी थालेको समाचारलाई पनि प्राथमिकताका साथ पहिलो पृष्ठमा प्रकाशित गरेको छ। सरकार र राजनीतिक दलबीचको सहमतिपछि सत्यनिरुपण तथा मेलमिलाप आयोग र बेपत्ता पारिएका व्यक्तिको छानबिन आयोग ऐन संशोधन गरी नेपाली ‘मोडल’ मा संक्रमणकालीन न्याय टुंग्याउने प्रक्रिया थालिएको हो।

नेकपाका अध्यक्ष एवं प्रधानमन्त्री केपी शर्मा ओली, नेकपाका अर्का अध्यक्ष पुष्पकमल दाहाल, प्रमुख विपक्षी दल नेपाली कांग्रेस सभापति शेरबहादुर देउवासहितको संयुक्त बैठकमा दुईटा आयोगको ऐन संशोधनका लागि सहमति प्रक्रिया अघि बढेको हो।

प्रकाशित मिति: सोमबार, माघ २१, २०७५ ०७:४०