पार्टी विवादका बीच ओलीले पहिलोपटक डाके आफ्नो गुट भेला

A+ A A-

सत्तारूढ दल नेपाल कम्युनिस्ट पार्टी (नेकपा) भित्रको विवाद उत्कर्षमा पुगेको बेला प्रधानमन्त्री एवं अध्यक्ष केपी शर्मा ओलीले पहिलो पटक आफूनिकट कार्यकर्तासँग अन्तर्क्रिया गरेका छन् ।

बुधबार दिउँसो उनले जुममार्फत प्रदेश- १ का आफूनिकट नेता कार्यकर्तासँग अन्तर्क्रिया गरेका हुन् । उनी पार्टी अध्यक्ष भएयता प्रदेश र जिल्लास्तरका आफूनिकट कार्यकर्तासँग यसरी छलफल गरेका थिएनन् ।

अन्तर्क्रियाका क्रममा पार्टी अफ्ठ्यारो अवस्थामा आइपुगेको उल्लेख गर्दै उनले एकता जोगाउन आफू प्रयासरत रहेको कार्यकर्तालाई जानकारी गराए । उनले जुनसुकै स्थितिको पनि सामना गर्न तयार रहन पनि नेता कार्यकर्तालाई निर्देशन दिएका छन् ।

ओलीनिकट मानिने नेकपा प्रदेश - १ कमिटी अध्यक्ष देवराज घिमिरेले भने, 'प्रधानमन्त्री ओलीले एकताको डोरी छिन्न नदिने हरदम प्रयास गरिरहेको कार्यकर्तालाई बताउनुभयो । हामी कार्यकर्ताले पनि भदौ २६ गतेको निर्णय किन कार्यान्वयन हुन सकेन भनेर सोध्यौँ, उहाँले भदौ २६ गतेको निर्णय कार्यान्वयन नहुनुमा आफू जिम्मेवार नरहेको तर अरूले भूमिका खेलेको बताउनुभयो ।'

गत २६ भदौको स्थायी कमिटी बैठकले पार्टीको आन्तरिक विवादलाई समाधान गर्दै मन्त्रिमण्डल पुनर्गठन, केन्द्रीय कमिटी बैठक र एकताको महाधिवेशन गर्ने निर्णय पारित गरेको थियो । तर सो निर्णय अहिलेसम्म कार्यान्वयन हुन सकेको छैन ।

नेकपा स्रोतका अनुसार ओलीले भोलिदेखि अरू प्रदेशका कार्यकर्तासँग पनि यसरी नै छलफल गर्ने भएका छन् । आजको छलफलमा माधव ने‍पाल पक्षका कार्यकर्ता भने सहभागि थिएनन् । नेपाल पक्षसँग छलफलका लागि कोशिस भइरहेको र छलफल समझदारीतिर गएको ओलीले कार्यकर्तालाई बताएका थिए ।

यसबारेमा नेता घिमिरसेसँग सोध्दा पार्टिभित्र फरक मत राख्नेसँग निरन्तर छलफल भइरहेको जानकारी दिए । तर, माधव नेपालसँग कुराकानी भएको हो/होइन भन्नेबारे उनले खुलाउन चाहेनन् ।

ओलीसँगको अन्तर्क्रियाका क्रममा केही नेता कार्यकर्तारले पार्टी सहज तरिकाले अगाडि बढ्न नसक्ने भए विकल्प खोज्नुपर्ने सुझाएका थिए । त्यस्तै, कतिपय कार्यकर्ताले भने पार्टी एकता बचाइराख्न ओलीलाई आग्रह गरेका थिए ।

नेकपा झापा कमिटी अध्यक्ष चिन्तन पाठकले अध्यक्ष ओली र कार्यकर्ताबीच आज विशुद्ध आन्तरिक भेला भएकाले मिडियामा ल्याउन आवश्यक नभएको बताए । 'यो मिडियामा ल्याउन गरिएको मिटिङ होइन,' उनले भने ।

प्रकाशित मिति: बुधबार, कात्तिक १९, २०७७ १८:२०