समाज कल्याणमा पदाधिकारीको ब्रह्‍मलुट

A+ A A-

आजको अन्नपूर्ण पोस्ट दैनिकले समाज कल्याण परिषद् कार्यालयमा भएको चरम आर्थिक दुरुपयोगको समाचारलाई प्रमुख समाचार बनाएको छ । कार्यालयको भित्तामा लेखिएको छ– मन, वचन र कर्मले सेवा गरौं। सामाजिक सेवा गर्न भनेरै परिषद् स्थापना गरिएको हो। तर यसको नेतृत्व गर्नेहरूले भने आफ्नो सेवामा स्रोतसाधन खर्चिरहेका छन्। संस्थाको हित बिर्सेर सुविधामा ब्रह्‍मलुट मञ्चाइरहेको समाचारमा उल्लेख छ ।

परिषद्का पदाधिकारीले गाडी खरिददेखि कर्मचारी भर्ना र सेवा सुविधा तोक्नेसम्मका काममा आफ्नै हात जगन्नाथ गरिरहेका छन्। अन्नपूर्णको खोजबिनमा उनीहरूले नियमविपरीत र संस्थालाई व्ययभार बढाउने गरी सुविधा लिइरहेको पाइएको छ।

०७३ सालमा परिषद्मा नयाँ पदाधिकारी चयन भएका थिए। तत्कालीन महिला, बालबालिका तथा जेष्ठ नागरिक मन्त्री सीपी मैनालीले उपाध्यक्षमा नीलमणि बराल, सदस्य सचिवमा डिल्ली भट्ट, कोषाध्यक्षमा वीरबहादुर ठगुन्ना, र इन्द्रकुमार झा नियुक्त गरे। पुष्पकमल दाहाल सरकारको पालामा सदस्य गोकर्ण भट्ट नियुक्त भए।

त्यस्तै,प्रधानमन्त्री केपी शर्मा ओलीले देश विकासको बाटोमा अगाडि बढेको बताएको समाचारलाई पनि अन्नपूर्णले प्राथमिकता दिएको छ । शनिबार सिरहा सदरमुकाममा आयोजित कार्यक्रमलाई सम्बोधन गर्दै प्रधानमन्त्री ओलीले यस्तो बताएका हुन्।

तत्कालीन एमाले सिरहाका नेता तथा पूर्वसांसद स्वर्गीय हेमनारायण यादवको १५ औँ स्मृति सभामा बोल्दै प्रधानमन्त्री ओलीले गरिबी, बेरोजगारी अन्त्य गरी मुलुकलाई समृद्ध बनाउने योजनाका साथ सरकारले काम अगाडि बढाएको उल्लेख गरे।

अन्नपूर्ण पोस्टले विराटनगर महानगरपालिका–८ बलुवाईकी ११ वर्षीया बालिका गुडिया भनिने रुपमती दासको बलात्कारपछि हत्या भएको भनिएको घटना थप पेचिलो बन्दै गएको भन्दै समाचार प्रकाशित गरेको छ । घटना भएको एक सातासम्म पनि दोषी पक्राउ नपरेपछि घटनामा संलग्नलाई तत्काल पक्राउ गरेर कारवाही अघि बढाउनु पर्ने माग गर्दै स्थानीय बासिन्दा आन्दोलित बनेका छन् ।

आन्दोलनमा उत्रिएका स्थानीय बासिन्दाले शनिबार विराटनगरमा घटनाको विरोधमा प्रदर्शन पनि गरेका छन् । उनीहरुले घटना अनुसन्धानमा प्रहरी प्रशासनको लापरवाही रहेको भन्दै तत्काल दोषी पत्ता नलगाए आन्दोलनलाई थप चर्काएर लैजाने चेतावनी दिएका छन् ।

प्रकाशित मिति: आइतबार, माघ २०, २०७५ ०७:५१