भीमफेदी–कुलेखानी सुरुङमार्ग निर्माण कार्य सुरू हुँदै

A+ A A-

बागमती प्रदेशको गौरव योजना पोष्टबहादुर बोगटी भीमफेदी–कुलेखानी सुरुङमार्ग निर्माण हुने भएको छ ।प्राविधिक अध्ययन जारी रहेको सुरुङमार्गको काम २०७७ बाटै सुरू हुने भएको हो ।

प्रदेश सरकारले पोष्टबहादुर बोगटी भीमफेदी–कुलेखानी सुरुङमार्ग नामाकरण गरेर यसको निर्माणको तयारी थालेको २ वर्ष भइसकेको छ । प्रदेश सरकारले वैशाखमा टेण्डर आह्वान गर्ने योजना बनाएको थियो ।

सुरुङमार्ग निर्माणका लागि स्रोत सुनिश्चितता गरेको पत्र आर्थिक मामिला तथा योजना मन्त्रालयले आज आइतबार भौतिक पूर्वाधार विकास मन्त्रालयलाई पठाएको छ । स्रोत सुनिश्चित भएसँगै बागमती प्रदेश सरकारले सुरुङमार्ग निर्माणको काम अगाडि बढाउने भएको हो ।

अर्थ मन्त्रालयले पठाएको पत्रमा तीनवटा आर्थिक वर्षमा मार्गको निर्माण गर्न बजेट उपलब्ध गराएको छ । जसमा सुरुङमार्ग निर्माण गर्न १८ करोड ७२ लाख ७ सय ७६ रुपैयाँ लाग्ने अनुमान गरिएको छ ।

मन्त्रालयले आर्थिक वर्ष २०७७/०७८ मा २ करोड, आव २०७८/०७९ र २०७९/०८० मा ६/६ करोड र आव २०८०/०८१ मा ४ करोड ७२ लाख ७ सय ७६ रुपैयाँ उपलब्ध गराउने उल्लेख गरेको छ । खरिदको विधि अन्तर्राष्ट्रिय शिलबन्दी बोलपत्रमार्फत् गर्ने जनाइएको छ ।

भौतिक पूर्वाधार विकास मन्त्री रामेश्वर फुँयालले यसअघि वैशाखबाट सुरुङमार्गको काम सुरू हुने बताएका थिए । मन्त्री फुँयालले पटकपटक सुरुङमार्ग निर्माण स्थलको स्थलगत निरीक्षण गरेका छन् । उनले प्रदेश सरकारले सुरुङमार्ग बनाएर छाड्ने दृढता लिएको बताएका छन् ।

निजी क्षेत्रको नेपाल पूर्वाधार विकास कम्पनीले हेटौंडा–भीमफेदी–कुलेखानी–काठमाडौं सुरुङमार्ग बनाउन संघीय सरकारलसँग लिएको अनुमति खारेज गर्न बागमती सरकारले पहिले नै पत्राचार गरिसकेको छ । तर, संघीय सरकारले अनुमति खारेज गरेको छ्रैन् ।

२० भदौ २०६८ मा स्थापना भएको पूर्वाधार कम्पनीले १ जेठ २०६९ मा सरकारसँग प्रारम्भिक परियोजना सम्झौता गरि अनुसन्धान कार्यारम्भ गरेकोमा उक्त कम्पनीले काम गर्न सकेको छैन । प्रदेश सरकारले सुरुङमार्ग बनाउने घोषणा गरेपछि कम्पनीले सुरुङमार्ग निर्माणमा अवरोध गर्न खोजेको आरोप लगाउँदै आएको छ ।

भीमफेदीदेखि कुलेखानीसम्म ३ दशमलव २ सय १५ किलोमिटर सुरुङ निर्माण हुनेछ । अहिले सुरुङमार्गको डीपीआर अन्तिमचरणमा रहेको जनाइएको छ । सुरुङ निर्माणपछि भीमफेदीदेखि कुलेखानीसम्मको १५ किलोमिटर सडक ३ दशमलव २५ किलोमिटरमा सीमित हुनेछ ।

भीमफेदीदेखि कुलेखानीसम्म सुरुङमार्ग दुई लेनको हुनेछ । सुरुङमार्गभित्र एकातर्फ ग्यास र अर्कोतर्फबाट तेल लैजान पाइपलाइन राख्ने ठाउँसमेत छुट्टयाइने मन्त्रालयले जनाएको छ । सुरुङमार्ग निर्माण हुँदा हेटौंडा काठमाडौंको यात्र करिब २ घण्टामा गर्न सकिने छ ।

प्रकाशित मिति: आइतबार, वैशाख २८, २०७७ २०:३४