अछाम २ मा भूपदेव शाहले गराए उम्मेदवारी दर्ता

शिलापत्र संवाददाता मंगलबार, माघ ६, २०८२

A+ A A-

राष्ट्रिय स्वतन्त्र पार्टी (रास्वपा) बाट प्रतिनिधिसभा अछाम क्षेत्र नं २ का उम्मेदवार भूपदेव शाहले औपचारिक रूपमा मनोनयन दर्ता गरेका छन् । पार्टी कार्यकर्ता, समर्थक तथा स्थानीय नागरिकहरूको उल्लेखनीय सहभागितामा सम्पन्न कार्यक्रममा वैकल्पिक राजनीति, सुशासन र जवाफदेही नेतृत्वप्रति शाहले स्पष्ट दृष्टिकोण प्रस्तुत गरेका थिए ।

कार्यक्रममा शाहले भदौ २३ र २४ मा देशभर देखिएको जेन–जेड विद्रोहलाई नयाँ राजनीतिक चेतनाको ऐतिहासिक अभिव्यक्ति भन्दै, युवापुस्ताले उठाएको प्रश्न पारदर्शिता, जवाफदेहिता र परिणाममुखी शासन आफ्नो राजनीतिक एजेन्डाको केन्द्रमा रहेको बताए। परम्परागत राजनीतिक अभ्यासबाट आजित जनताका लागि अब नयाँ सोच, स्पष्ट नीति र इमानदार प्रतिबद्धतासहितको नेतृत्व अपरिहार्य भएको उनको भनाइ थियो ।

कार्यक्रममा बोल्ने वक्ताहरूले जेन–जेड विद्रोहले राजनीतिमा पुस्तागत परिवर्तनको संकेत दिएको उल्लेख गर्दै, भूपदेव शाहजस्ता स्पष्ट एजेन्डा र दृढ इच्छाशक्ति बोकेका नेताबाट अछाममा वैकल्पिक राजनीतिक अभ्यासको सशक्त सुरुवात हुने विश्वास व्यक्त गरे ।

कार्यक्रमलाई सम्बोधन गर्दै रास्वपाका केन्द्रीय सदस्य तथा युवा नेता प्रदीप ज्ञवालीले जनताको विश्वासलाई पार्टीको प्रमुख पूँजी ठान्दै पारदर्शी, उत्तरदायी र परिणाममुखी राजनीतिका लागि आफू र आफ्नो पार्टी दृढतापूर्वक अघि बढ्ने प्रतिबद्धता व्यक्त गरे। उनले भदौ २३ र २४ को जेन–जेड विद्रोहले दिएको जनादेशलाई संस्थागत सुधार र सुशासनमार्फत व्यवहारमा उतार्ने दृढ संकल्प पनि दोहोर्‍याए ।

प्रकाशित मिति: मंगलबार, माघ ६, २०८२ १६:०३

शिलापत्र संवाददाता

प्रतिक्रिया दिनुहोस्