तेन्जिङ नोर्गे स्मृति खुला आरोहण प्रतियोगिताको मिति परिवर्तन, अब २९ मेमा आयोजना हुने

शिलापत्र संवाददाता आइतबार, पुस २७, २०८२

A+ A A-

स्वर्गीय तेन्जिङ नोर्गे स्मृति खुला आरोहण प्रतियोगिता– २०२६ को मिति विशेष कारणवश: परिवर्तन गरिएको छ । नेपाल राष्ट्रिय पर्वतारोहण पथ प्रदर्शक संघ र यूएस नेपाल क्लाइम्बर एसोसिएसन इन्कको संयुक्त आयोजनामा सञ्चालन हुँदै आएको उक्त प्रतियोगिताको मिति सारेर अब २९ मेमा आयोजना गर्ने निर्णय गरिएको छ ।

यसअघि २९ जनवरी २०२६ मा आयोजना गर्ने तय भएको प्रतियोगिता विशेष कारणवश: आगामी २९ मेमा आयोजना गरिने भएको आयोजकले जनाएका छन् । आइतबार काठमाडौंस्थित क्रिम्पान्जी एड्भेन्चर हबमा आयोजित पत्रकार सम्मेलनमार्फत आयोजक संस्थाले प्रतियोगिताको नयाँ मिति सार्वजनिक गरेको हो ।

सगरमाथाका प्रथम सफल आरोही तथा विश्वभरका पर्वतारोहण पेसाकर्मीहरूका लागि प्रेरणाका स्रोत स्वर्गीय तेन्जिङ नोर्गे शेर्पाको स्मृतिमा विगत दुई वर्षदेखि यो प्रतियोगिता आयोजना हुँदै आएको छ । नेपाल राष्ट्रिय पर्वतारोहण पथ प्रदर्शक संघ र एस नेपाल क्लाइम्बर एसोसिएसन इन्कले संयुक्त रूपमा साहसिक खेलअन्तर्गत आरोहण प्रतियोगिता आयोजना गर्दै नेपालमा विकासोन्मुख खेल आरोहण संस्कृतिको प्रवर्द्धन गर्दै आएका छन् ।

आयोजकका अनुसार स्वर्गीय तेन्जिङ नोर्गे शेर्पाले सगरमाथा विजय गरेको ऐतिहासिक दिन सन् १९५३ मे २९ को सम्मानस्वरूप यस वर्ष प्रतियोगिता २९ मेमा आयोजना गर्ने निर्णय गरिएको हो । आगामी वर्षहरूदेखि भने प्रतियोगिता पूर्वनिर्धारित मिति जनवरी २९ मै आयोजना गरिनेछ । उनको अतुलनीय साहस, योगदान र ऐतिहासिक उपलब्धिको सम्मानस्वरूप सोही दिन प्रतियोगिता आयोजना गर्नु सबै दृष्टिले अर्थपूर्ण र उपयुक्त हुने आयोजक समितिले जनाएको छ ।

स्वर्गीय तेन्जिङ नोर्गे स्मृति खुला आरोहण प्रतियोगिता नेपाली साहसिक खेल, खेल आरोहण संस्कृतिको विकास तथा युवापुस्तालाई पर्वतारोहणतर्फ प्रेरित गर्ने उद्देश्यका साथ सञ्चालन हुँदै आएको महत्त्वपूर्ण कार्यक्रम हो । कार्यक्रमलाई सफलतापूर्वक सम्पन्न गर्न सम्बन्धित सरकारी निकाय, सरोकारवाला संघ–संस्था, प्रायोजक, सञ्चारमाध्यम तथा व्यक्तिगत तहबाट समेत आवश्यक सहयोग, सहकार्य र सकारात्मक प्रतिक्रिया प्राप्त हुने आयाेजकले जनाएका छन् ।