विदेशी मुद्रा सञ्चितिमा साढे ३० खर्बको रेकर्ड, २० महिनाभन्दा बढीको आयात धान्न पुग्ने

शिलापत्र संवाददाता सोमबार, मंसिर २९, २०८२

A+ A A-

विदेशी मुद्रा सञ्चितिमा साढे ३० खर्बको रेकर्ड बनेको छ । सोमबार राष्ट्र बैंकले चालु आर्थिक वर्षको चार महिनाको वित्तीय रिपोर्ट सार्वजनिक गर्दै कात्तिक मसान्तसम्म कुल विदेशी मुद्राको सञ्चितिको आकार ३० खर्ब ५५ अर्ब ५२ करोड रुपैयाँबराबर पुगेको जनाएको हो ।

यो अघिल्लो आर्थिक वर्षको असार मसान्तको भन्दा १४.१ प्रतिशतले बढी हो । २०८२ असार मसान्तमा यस्तो सञ्चिति २६ खर्ब ७७ अर्ब ६८ करोड रुपैयाँ थियो ।

अमेरिकी डलरमा यस्तो सञ्चिति २०८२ असार मसान्तमा १९ अर्ब ५० करोड रहेकोमा २०८२ कात्तिक मसान्तमा १०.३ प्रतिशतले वृद्धि भई २१ अर्ब ५२ करोड पुगेको छ ।

कुल विदेशी विनिमय सञ्चितिमध्ये नेपाल राष्ट्र बैंकमा रहेको सञ्चिति २०८२ असार मसान्तमा २४ खर्ब १४ अर्ब ६४ करोड रुपैयाँ रहेकोमा २०८२ कात्तिक मसान्तमा १२.८ प्रतिशतले वृद्धि भई २७ खर्ब २४ अर्ब ६६ करोड रुपैयाँ पुगेको छ । बैंक तथा वित्तीय संस्था (नेपाल राष्ट्र बैंकबाहेक) सँग रहेको विदेशी विनिमय सञ्चिति २०८२ असार मसान्तमा २६३ अर्ब ४ करोड रहेकोमा २०८२ कात्तिक मसान्तमा २५.८ प्रतिशतले वृद्धि भई ३ खर्ब ३० अर्ब ८५ करोड रुपैयाँ कायम भएको छ ।

२०८२ कात्तिक मसान्तको कुल विदेशी विनिमय सञ्चितिमा भारतीय मुद्राको अंश २१.९ प्रतिशत छ ।

सञ्चिति पर्याप्तता सूचक

आर्थिक वर्ष २०८२/८३ को चौथो महिनासम्मको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चिति २०.८ महिनाको वस्तु आयात र १७.४ महिनाको वस्तु तथा सेवा आयात धान्न पर्याप्त रहने देखिएको राष्ट्र बैंकले जनाएको छ ।

२०८२ कात्तिक मसान्तमा विदेशी विनिमय सञ्चितिको कुल गार्हस्थ्य उत्पादन, कुल आयात र विस्तृत मुद्राप्रदायसँगका अनुपातहरू क्रमशः ५०.० प्रतिशत, १४४.९ प्रतिशत र ३७.८ प्रतिशत छन् । २०८२ असार मसान्तमा उक्त अनुपातहरू क्रमशः ४३.८ प्रतिशत, १२८.१ प्रतिशत र ३४.१ प्रतिशत थिए ।

प्रकाशित मिति: सोमबार, मंसिर २९, २०८२ १६:३१

शिलापत्र संवाददाता

प्रतिक्रिया दिनुहोस्