एमाले रुकुम पश्चिम प्रतिनिधिमा पराजित भएपछि सांसद मल्लको असन्तुष्टि

A+ A A-

नेकपा एमाले रुकुमपश्चिमबाट महाधिवेशन प्रतिनिधिमा पराजित भएपछि कर्णाली प्रदेशसभा सदस्य तुलसा मल्लले असन्तुष्टि पोखेकी छन् । प्रदेशसभामा उनी एमालेबाट समानुपातिक सांसद छिन् । शनिबार आसन्न एमालेको ११औँ महाधिवेशनमा सहभागी हुने प्रतिनिधिमा सहमति जुट्न नसकेपछि निर्वाचन भएको थियो । उक्त निर्वाचनमा उनी पराजित भएकी छन् ।

उनले सामाजिक सञ्जाल फेसबुकमा भनेकी छन्, ‘हाम्रो पार्टीको राष्ट्रिय महाधिवेशन प्रतिनिधि छनोट पार्टीको आन्तरिक निर्वाचनमा बाफिकोट गाउँपालिका, मुसिकोट नगरपालिका र चौरजहारी नगरपालिका केही कमरेडहरूले कसैले पाँचपटक, कसैले सातपटक, कसैले दुई/चारपटक मतदानमा उपस्थित नभएका व्यक्तिहरूको मत हाल्नुभयो ।’

मल्लले यसरी मत हालेर जित्ने नेताहरूलाई अगामी निर्वाचन जितेर देखाउन चुनौती दिएकी छन् । उनले भनेकी छन्, ‘यो कला र सीप अब आउने २०८४ को स्थानीय वडा, पालिका, संघ र प्रदेशमा नेकपा एमालेका उम्मेदवारलाई विजय बनाउन प्रयोग गरी विजय प्राप्त गर्नुहुनेछ । हिजोको तपाईंहरूको कला देखेर म विश्वस्त छु ।’

शनिबार सम्पन्न निर्वाचनमा महिलामा प्रतिनिधि रहेकी मल्ल कौशिला केसी र हिमकुमारी केसीसँग पराजित भएकी थिइन । कौशिलाले २ सय चार र हिमकुमारीले दुई सय तीन मत प्राप्त गर्दा मल्लले एक सय ११ मत प्राप्त गरेकी थिइन् ।

एमालेका २ हजार ५४ संगठित सदस्य रहेको रुकुमपश्चिमबाट खुल्लामा एमाले जिल्ला कमिटी अध्यक्ष नन्दाराम देवकोटा, दिनेश चन्द, महिलामा हिमकुमारी केसी र कौशिला केसी, युवा (४० वर्षमुनी) प्रकाश खड्का र दलितमा शशिराम परियार निर्वाचित भएका छन् । रुकुमपश्चिमा निर्वाचनबाट छनोट भएका र पराजित सबै नेता तथा प्रतिनिधिहरू पार्टी अध्यक्ष केपी शर्मा ओलीनिकटका हुन् ।