आउनोस् छानौँ, वर्षव्यक्ति २०८१ (गुगल फारमसहित)

A+ A A-

प्रिय पाठक,

जसरी २०८१ सालले हामीलाई नयाँ चुनौतीहरू सुम्पेर जाँदै छ, उसैगरी कठिन परीक्षा लिएर २०८२ साल हामीतिर आइरहेको छ । सालभरका यस्ता उतार–चढाव अनि आशा–निराशापूर्ण घटनाक्रमको समीक्षा हामी तपाईंसँगै मिलेर गर्न गइरहेका छौँ । यसले देशलाई आगामी वर्षका लागि सुझबुझपूर्ण कदम चाल्न सघाउ पुर्‍याउँछ भन्ने हाम्रो विश्वास छ । यो समाचारसँगै तपाईंका लागि एउटा गुगल फारम राखिएको छ । वर्ष २०८१ का वर्षव्यक्ति, समाचार निर्मातादेखि उत्कृष्ट पुस्तक, कलाकार, सिनेमा र खेलाडी छान्ने काममा तपाईंहरूको पनि सहभागिता रहोस् भनेर हामीले फारम राखेका हौँ ।

यो वर्षलाई सकारात्मक, नकारात्मक प्रभाव पार्ने, आशा जगाउने वा कुनै पनि रचनात्मक काममार्फत आफ्नो सक्रिय भूमिका स्थापित गरेका पात्रहरू हामीले विभिन्न क्षेत्रका विशेषज्ञ, पत्रकार र विचारविमर्शकर्ताहरूसँग छलफल गरी तयार गरेका छौँ । विगतमा जस्तै यसपल्ट पनि तपाईंहरूको सक्रिय सहभागिताको अपेक्षा छ ।

२०७७ सालयता हरेक वर्षान्तमा शिलापत्रले बितेको वर्षको समीक्षासँगै त्यस वर्षका सर्वाधिक प्रभावशाली पात्रलाई ‘वर्षव्यक्ति’ घोषित गर्दै आएकाे छ । २०७७ सालमा सर्वोच्च अदालतका न्यायाधीशद्वय बमकुमार श्रेष्ठ र कुमार रेग्मी, २०७८ सालमा शिक्षक नारायण सिग्देल, २०७९ मा वरिष्ठ आँखा रोग विशेषज्ञ डा. सन्दुक रुइत र २०८० सालमा फुटबलर सावित्रा भण्डारी साम्बा वर्षव्यक्ति घोषित भएका थिए ।

यसपल्ट हामीले जनताको भावना जितेका कर्मचारी कुलमान घिसिङ, एनपीएलमार्फत आशाको सञ्चार गराएका क्यानका सचिव पारस खड्का, नमुना बाल अस्पताल बनाइरहेका मुटु डाक्टर डा. भगवान कोइराला, हिंसात्मक विद्राेहकाे बाटाे छोडेर पार्टीलाई उत्पादनसँग जोडिरहेका नेता नेत्रविक्रम चन्द ‘विप्लव’ र स्थानीय सरकारको नयाँ मानक बनाएकी भरतपुरकी मेयर रेनु दाहालमध्ये एक जनालाई वर्षव्यक्ति चुन्न पाठक/दर्शकको जिम्मा लगाउँदै छौँ । यीमध्ये सर्वाधिक मत पाउने एक जना आगामी वैशाखको पहिलो साता ‘शिलापत्र वर्षव्यक्ति २०८१’ घोषित हुनेछन् ।

यसैगरी समाचार निर्माताका लागि प्रस्तावित सूचीबाट तपाईंले १० जनालाई छान्न सक्नुहुनेछ ।

विगतका वर्षमा यसरी छानिएको थियोः

वर्षकलाकारको सूचीमा रहेका १० जनामध्ये सबैभन्दा बढी मत पाउने एक जना वर्षकलाकार, त्यसपछि बढी मतका आधारमा चार जना उत्कृष्ट कलाकार घोषित गरिनेछ । वर्षखेलाडी र वर्षसिनेमा पनि यसैगरी नामहरू घोषणा गरिनेछ ।

यसैको साथमा ‘शिलापत्र वर्षपुस्तक’अन्तर्गत तीन विधाका पुस्तकहरूमा तपाईंले भोट दिन सक्नुहुन्छ । आख्यान, गैरआख्यान र कविता/गजल/हाइकु विधामा ५/५ पुस्तकका लागि फारममा आफ्नो अभिमत दिनुहोस् । १५ चैतभन्दा अगाडि सार्वजनिक पुस्तक मात्रै यसमा सामेल गरिएको छ ।

कृपया, तलको गुगल फारम भरी वर्ष २०८१ का वर्षव्यक्ति, समाचार निर्माता, वर्षकलाकार, वर्षखेलाडी र वर्षसिनेमा र वर्षपुस्तक छान्नुहोस् ।

फारम भर्न सजिलो बनाइएको छ– तपाईंले सोचेका नाम यदि प्रस्तावित सूचीमा छन् भने मात्र टिक लगाउनुहोला । काेही त्यस्ता पात्र छुटे भने तिनकाे नाम पनि थप्न सक्नुहुनेछ । 'समाचार निर्माता’को खण्डमा बढीमा १० र अन्य विधामा पाँच जनासम्मलाई मत दिन सक्नुहुन्छ । गुगल फारममा चैत २५ गते राति १२ बजेसम्म मत दिन पाइनेछ । त्यसपछिको मत मान्य हुने छैन

वर्षव्यक्ति छनोटमा सहभागी हुन याे फारम भर्नुहाेस् ।

Loading…

प्रकाशित मिति: मंगलबार, चैत १२, २०८१ १६:५३