पहिले आफूले विष खाइन्, त्यसपछि दुई छोरीलाई खुवाएर हत्या गरिन् (भिडियो)

घटनास्थलमा प्रहरी ।

मोरङको सुन्दरहरैँचा–७ का अर्जुन कार्की (श्रीमान्) सँगको झगडा भएपछि शुक्रबार दुई काखे छोरीलाई लिएर कोठादेखि निस्किएकी अस्मिता न्यौपानेले पहिले आफूले विष खाएको खुलेको छ ।

त्यसपछि उनले तीन वर्षीया छोरी अर्पणा र एक वर्षीया छोरी आइकालाई विष खुवाएको खुलेको मोरङका प्रहरी उपरीक्षक नवराज कार्कीले शिलापत्रलाई जानकारी दिए । एसपी कार्कीका अनुसार कम विष खाएकाले अस्मिता बाँचे पनि नाबालिका दुई छोरीको भने मृत्यु भएको हो ।

‘सोधपुछका क्रममा अस्मिताले पहिले अलिकति आफूले विष खाएको र त्यसपछि दुई छोरीलाई खुवाएको बताएकी छिन् । विष खुवाएको केहीबेरमै छोरीहरूको मृत्यु भएपछि अस्मिता मोबाइल त्यहीँ छाडेर हिँडेकी रहिछन्,’ एसपी कार्कीले भने ।

अस्मितालाई बुधबार बिहान झापाको विर्तामोडबाट झापा प्रहरीसँगको समन्वयमा मोरङ प्रहरीले पक्राउ गरेको छ । कोशी अञ्चल अस्पताल विराटनगरमा उनको स्वास्थ्य परीक्षण पनि गरिएको छ । एसपी कार्कीका अनुसार केहीबेरमा पत्रकार सम्मेलन गरेर उनलाई सार्वजनिक गरिने छ ।

मोरङको सुन्दरहरैँचा–७ मा बन्दै गरेको नयाँ घरमा पानी नलगाएको विषयलाई लिएर श्रीमान् अर्जुन कार्की र श्रीमती अस्मिताबीच शुक्रबार साँझ झगडा भएको थियो । झगडापछि अस्मिता आफ्नी दुई छोरीलाई लिएर त्यही दिन राति ८ बजेतिर घरबाट निस्किएकी थिइन् ।

प्रहरीमा अर्जुनले दिएको उजुरीमा श्रीमती र दुई छोरीलाई केहीबेर आफूले खोजतलास गरेको तर फेला नपरेको उल्लेख छ । त्यही दिन राति अस्मिताले दुई छोरीलाई मार्ने र आफू पनि मर्ने भन्दै मोबाइलमा म्यासेज पठाएको अर्जुनको उजुरीमा उल्लेख छ । भोलिपल्ट (शनिबार) नजिकैको केरा बारीमा दुई नाबालिका आइका र अर्पणाको शव फेला परेको थियो । प्रहरीले अस्मिताले आत्महत्या गरेकी हुनसक्ने भन्दै खोजतलास सुरु गरे पनि फेला भने पार्न सकेको थिएन । प्रहरीका अनुसार अस्मितामा गम्भीर मानसिक समस्या देखिएको छ ।

अस्मिताको पुर्ख्यौली घर धनकुटाको पाख्रिबास नगरपालिका–४, डिकुरे हो । अर्जुनचाहिँ ट्याक्सी चालक हुन् । उनी श्रीमती अस्मिता र दुई छोरीसहित सुन्दरहरैँचामा रहेको दिदीको घरमा बस्दै आएका थिए । शुक्रबार अर्जुनले घरमा माछा लिएर आएको र आएलगत्तै नयाँ बन्दै गरेको घरमा पानी नहालेको विषयमा श्रीमती अस्मितासँग झगडा भएको पाइएको प्रहरीले जनाएको छ ।