'बैठकको प्रत्यक्ष प्रसारण गरी मन्त्रीहरूलाई निर्मम प्रश्न गर्छौं'

शिलापत्र संवाददाता बिहीबार, असार १३, २०८१

A+ A A-

सत्तारुढ राष्ट्रिय स्वतन्त्र पार्टी (रास्वपा) ले मिडियामा प्रत्यक्ष प्रसारणसहित आफ्नातर्फका मन्त्रीहरूसँग प्रश्नोत्तर गर्ने भएको छ । महामन्त्री मुकुल ढकालले आगामी साता पार्टी कार्यालयमा राखिने कार्यक्रममा रास्वपाबाट सरकारमा सहभागी चारैजना मन्त्री उपस्थित हुने जानकारी दिए ।

नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्वको सरकारमा रास्वपाबाट सभापति रवि लामिछाने उपप्रधान एवं गृहमन्त्री, सुमना श्रेष्ठ शिक्षा, विज्ञान तथा प्रविधिमन्त्री, डोलप्रसाद अर्याल श्रम, रोजगार तथा सामाजिक सुरक्षामन्त्री र विराजभक्त श्रेष्ठ युवा तथा खेलकुदमन्त्री छन् ।

समीक्षा बैठकमा रास्वपा केन्द्रीय सदस्य र सांसदहरूले यी सबै मन्त्रीलाई निर्ममभन्दा निर्मम प्रश्न सोध्ने महामन्त्री ढकालले बताए । ‘यसको साक्षी मिडियाकर्मीहरू हुनेछन् । प्रश्नोत्तर कार्यक्रमलाई सोसल मिडियामा प्रत्यक्ष प्रसारण पनि गरिनेछ,’ उनले भने ।

सम्बन्धित समाचार

रास्वपा महामन्त्रीले किन उठाए 'जोखिम ?'

सरकारमा सय दिनको समीक्षा गर्नुपर्ने विषयमा रास्वपामा आवाज उठ्दै आएको थियो । स्रोतका अनुसार, केही नेता त सरकारलाई दिएको समर्थनबारे नै छलफल गर्नुपर्ने पक्षमा छन् । दुई साताअघि युवा तथा खेलकुदमन्त्री विराजभक्त श्रेष्ठले सरकार र समर्थनबारे समीक्षा गर्नुपर्ने बेला आएको बताएका थिए । उनले आफूहरू राजीनामा पत्रमा मिति मात्र लेख्न बाँकी राखेर हिँडिरहेको समेत बताएका थिए । अहिले महामन्त्री ढकाललगायतको मागमा सरकारमा रास्वपाको सय दिनको समीक्षासहित पार्टीका नेता र मन्त्रीहरूबीच प्रश्नोत्तर कार्यक्रम राख्न लागिएको हो ।

नेकपा एमाले, माओवादी केन्द्र, नेकपा एकीकृत समाजवादीसहितको गठबन्धनमा सामेल भएर रास्वपा गत फागुन तेस्रो सातादेखि सरकारमा छ । सत्तामा जनअपेक्षाकृत सुरुवात गर्न नसकेको भनेर रास्वपा आलोचित पनि छ । यद्यपि, सभापति लामिछानेलगायतले दशकौँदेखि पुराना दल हाबी रहेको प्रणालीमा रहेर नतिजा निकाल्न समय लाग्ने तर्क गर्दै आएका छन् ।

तत्काल सरकारबाट नबाहिरिने

हालै मात्र विभिन्न जिल्लाका ४ हजारभन्दा बढी पार्टी शुभचिन्तकको राय बुझेर काठमाडौं फर्केका महामन्त्री ढकालका अनुसार, रास्वपाले सत्तामा रहेर गरिरहेको कामप्रति नागरिक सन्तुष्ट छैनन् । योभन्दा ज्यादा जनअसन्तुष्टि एमाले, माओवादीजस्ता पुराना दलसँग मिलेकोमा देखिएको उनको निचोड छ । पार्टी सभापतिलाई बुझाएको समीक्षा प्रतिवेदनमै उनले यो कुरा उल्लेख गरेका छन् । यद्यपि, सरकारमा जानुको औचित्य पुष्टि नगरी बाहिरिए त्यो झन् हानिकारक हुने उनको भनाइ छ । त्यसैले रास्वपा तत्काल सरकारबाट बाहिरिन नहुने सुझाव उनले दिएका छन् । सभापति लामिछाने तत्काल कुनै पनि हालतमा सरकार छोड्ने पक्षमा छैनन् ।

महामन्त्री ढकालको बुझाइमा रास्वपाले चाहेर पनि अहिले सरकारबाट बाहिरिन मुस्किल र जोखिमपूर्ण छ । किनकि, स्वयम् सभापति लामिछाने आक्षेपको कडीमा यसरी घेरिएका छन्, जहाँबाट उम्केर फरक कित्तामा उभिन रास्वपालाई तत्काल सजिलो छैन ।

बरु अहिले कार्यदिशा र राजनीतिक समन्वयमा पार्टीले पुनर्विचार गर्नुपर्ने उनको राय छ । जस्तो कि, शासकीय स्वरुप र प्रदेश संरचनाको विषयमा पार्टीले आफ्नो धार बदल्नुपर्ने उनले बताए । ‘जनता चाहन्छन्, रास्वपा प्रदेश खारेजीको पक्षमा उभियोस्, प्रत्यक्ष निर्वाचित कार्यकारीको पक्षमा उभियोस्,’ उनले भने ।

पुराना दलभन्दा काठमाडौं महानगरपालिकाका मेयर बालेन्द्र शाह, धनगढी उपमहानगरपालिकाका मेयर गोपाल हमाललगायतसँग मिल्नुपर्ने राय जनताले दिएको उनले बताएका छन् । धरान उपमहानगरपालिकाका मेयर हर्क साम्पाङसँग भने रास्वपाको दूरी निकै बढेको छ । महामन्त्री ढकालले पनि साम्पाङको नाम भने लिएनन् । किनकि, उनी पहिचानको पक्षमा उभिएका छन्, जसले प्रदेश खारेजीको मागमा समर्थन जनाउने छैनन् ।

प्रकाशित मिति: बिहीबार, असार १३, २०८१ १०:४४

शिलापत्र संवाददाता

प्रतिक्रिया दिनुहोस्