खेलकुदमन्त्री श्रेष्ठ भन्छन्- १०औँ राष्ट्रिय खेलकुद तोकिएकै मितिमा हुन्छ

A+ A A-

युवा तथा खेलकुदमन्त्री विराजभक्त श्रेष्ठले १०औँ राष्ट्रिय खेलकुद प्रतियोगिता तोकिएकै मितिमा हुने बताएका छन् ।

बिहीबार कर्णाली प्रदेश खेलकुद विकास परिषद्का सदस्य-सचिव विश्वामित्र संज्याल र मन्त्री श्रेष्ठबीच १०औँ राष्ट्रिय खेलकुद प्रतियोगिता तयारीका विषयमा भएको छलफलमा तोकिएकै मितिमा प्रतियोगिता गर्ने गरी तयारी तीव्र पार्न निर्देशन दिएका हुन् ।

मन्त्री श्रेष्ठले सदस्य सचिव संज्याललाई मन्त्रालयमै बोलाई प्रतियोगिताबारे कर्णाली प्रदेशको पूर्वतयारीका बारेमा जानकारी लिएका थिए । छलफलमा कर्णाली प्रदेश खेलकुद विकास परिषद्का सदस्य सचिव संज्यालले राष्ट्रियस्तरको खेलकुद प्रतियोगिता विभिन्न बहानामा हुन नसकेको बताए । कर्णालीमा आयोजना हुने १०औँ राष्ट्रिय खेलकुद प्रतियोगिताको मिति तय भइसको र आयोजक प्रदेशका रूपमा रहेको कर्णालीले आफ्नो आन्तरिक तयारी बलियो बनाइसकेकाले प्रतियोगिता सार्न नहुने उनले बताए ।

‘हिजो कर्णालीमा खेल पूर्वाधारको अभाव देखाएर धेरै पटक राष्ट्रिय खेलकुद प्रतियोगिता आयोजनाको अवसर आउँदा पनि कर्णालीले यो अवसर लिन सकिरहेको थिएन । अहिले कर्णाली राष्ट्रिय खेलकुद प्रतियोगिता गर्न हरेक हिसाबले सक्षम छ, ' सदस्य सचिव संज्यालले भने, ‘१० औँ राष्ट्रिय खेलकुद प्रतियोगिता तोकिएको मितिमा हुन्छ भन्नेमा हामी त ढुक्क छौँ । तर, केही गरी तोकिएको मिति सरे कर्णालीको कारण नभई त्यो संघीय सरकार र राष्ट्रिय खेलकुद परिषद् वा विभागीय मन्त्रालयले जिम्मेवारी लिनुपर्छ ।’

छलफलमा सदस्य सचिव संज्यालले प्रत्येक पटक राष्ट्रिय खेलकुद प्रतियोगिता आयोजना हुँदा खेल भारी मात्रामा थपिँदै गएको भन्दै यसरी प्रत्येक पटक खेल थप्नु भन्दा खेलको वर्गीकरण गरेर निश्चित मापदण्ड बनाउनुपर्नेमा जोड दिए । उनले राष्ट्रिय खेलमा समावेश हुन कुनै पनि खेलको मापदण्ड बनाएर मात्र उक्त खेल राष्ट्रिय प्रतियोगितामा समेट्नु पर्ने बताए । खेलकुदमन्त्री श्रेष्ठले तोकिएकै मितिमा १० औँ राष्ट्रिय खेलकुद प्रतियोगिता हुने बताए ।

१०औँ राष्ट्रिय खेलकुद प्रतियोगिता आयोजकका रूपमा रहेको कर्णाली प्रदेशको उत्साह र पूर्वतयारी हेर्दा धेरै खुसी लागेको बताउँदै मन्त्री श्रेष्ठले अबको केही दिनमा स्थलगत अध्ययनका लागि मन्त्रालयका तर्फबाट टोली खटाइने बताए ।

प्रकाशित मिति: शुक्रबार, जेठ ४, २०८१ १२:४४