भक्तपुरमा फर्च्युन रिसोर्ट एन्ड वेलनेस स्पाको उद्घाटन

A+ A A-

भारतको चर्चित आईटीसी ग्रुप अफ होटेल्सअन्तर्गतको फर्च्युन होटेलले आफ्नो सेवा नेपालबाट पनि सुरु गरेको छ । फर्च्युन रिसोर्ट एन्ड वेलनेस स्पाको बुधबार भक्तपुरमा उद्घाटन गरिएको हो । उक्त होटलको उद्घाटन होटलका प्रबन्ध निर्देशक समिर एमसीले गरेका हुन् ।

सो अवसरमा प्रबन्ध निर्देशक एमसीले नयाँ आर्थिक वर्ष २०८१/८२ को सुरुमै फर्च्युन रिसोर्ट एन्ड वेलनेस स्पाको उद्घाटन गर्न पाउँदा निकै गौरवान्वित भएको बताए । उनले भने, 'भारतबाहिर हाम्रो अन्तर्राष्ट्रिय यात्राको डेब्यूमा पहिलो शाखाको सुरुवात नेपालमा गर्न पाउँदा हामी निकै हर्षित छौँ । हामी दक्षिण एसिया र नजिकका अरु देशमा पनि हाम्रो उपस्थिति बढाउँदै जानेछौँ र आजको यो उद्घाटन हाम्रो यात्राको नयाँ कोसेढुङ्गा हो ।'

सांस्कृतिक सम्पदा, प्राकृतिक सौन्दर्यजस्ता विविध कुराहरूले गर्दा उत्साहपूर्ण अनुभवको खोजीमा हिँड्ने पर्यटकहरूको पहिलो रोजाइमा नेपाल पर्ने भएकाले आफ्नो सञ्जालको प्रयोग गर्दै फर्च्युन होटेलको शाखा नेपालमा ल्याइएको प्रबन्ध निर्देशक एमसीको भनाइ थियो ।

भक्तपुरको शान्त वातावरणमा अवस्थित फर्च्युन रिसोर्ट एन्ड वेलनेस स्पामा प्रशस्त कोठा, कटेज तथा न्यानो र आधुनिक सजावटले सजिएका सुइटहरू छन् । प्रत्येक कोठा अत्यधिक आरामदायी बनाइएको छ ।

रिसोर्टमा स्पा, रिल्याक्सिङ ट्रिटमेन्ट रुम, थेरापी रुम, साउना, स्टिम रुम, जिम, आकर्षक दृश्य देखिने स्विमिङ पुलजस्ता विभिन्न आरामदायी सुविधाहरु उपलब्ध रहेको बताइएको छ ।

Fortune Hotel (2)1714643819.jpeg

त्यस्तै, शाकाहारी खानाका पारखीहरूलाई रिसोर्टमा रहेको रेन्बो रेस्टुरेन्टमा सम्पूर्ण प्रकारका स्वादिष्ट शाकाहारी खानेकुराहरू उपलब्ध हुनुका साथै नेप्ट्यून बार तथा लाउन्जमा विभिन्न प्रकारका मदिराहरू उपलब्ध हुने रिसोर्टले जनाएको छ ।

रिसोर्टमा पार्टी र बैठकका लागि पनि छुट्टै क्षेत्रको व्यवस्था गरिएको छ । ठूला सामाजिक कार्यहरू, सम्मेलनहरू र विशेष जमघटहरू आयोजना गर्नका लागि सुन्दर ढङ्गले बनाइएको र उपयुक्त रूपमा सुसज्जित यो रिसोर्ट सबै उत्सवहरूका लागि उत्कृष्ट गन्तव्य हुन सक्ने दाबी पनि गरिएको छ ।

प्रकाशित मिति: बुधबार, वैशाख १९, २०८१ १८:१०