जनकपुरकाे याज्ञवल्क्य स्कुलमा विद्यार्थीकाे आकर्षण, प्रवेश परीक्षा दिने आधाले मात्रै पाए भर्ना

जनकपुरकाे याज्ञवल्क्य स्कुलमा विद्यार्थीकाे आकर्षण, प्रवेश परीक्षा दिने आधाले मात्रै पाए भर्ना

A+ A A-

निजी विद्यालयहरूले मोनोपोली हिसाबले विद्यार्थीसँग रकम असुल गरे पनि गुणस्तरीय शिक्षा दिन नसकिरहेको बेला जनकपुरको एक सामुदायिक विद्यालय विद्यार्थीहरूको आकर्षणको केन्द्र बनेको छ ।

जनकपुरधाम उपमहानगरपालिका– ८ स्थित श्री याज्ञवल्क्य संस्कृत माध्यमिक विद्यालयले मंगलबार कक्षा ४ देखि ९ सम्म विद्यार्थी भर्नाका लागि प्रवेश परीक्षा लिँदा सयाैँ विद्यार्थी सहभागी भए । नेपाली र अंग्रेजी दुवै माध्यमबाट अध्यापन गराउँदै आएको उक्त विद्यालयले नयाँ विद्यार्थी भर्नाका लागि लिएको प्रवेश परीक्षामा धनुषा मात्र नभई महोत्तरी, सर्लाहीसहितका जिल्लाबाट सयौँ विद्यार्थी सहभागी भएको विद्यालयका प्रधानाध्यापक सञ्जय झाले बताए ।

चालु शैक्षिकसत्रका लागि कक्षा ४ देखि ९ सम्मका लागि १ हजार १ सय ७ जना नयाँ विद्यार्थीले भर्नाका लागि आवेदन दिएकोमा ७ सय १६ जना नयाँ विद्यार्थी प्रवेश परीक्षामा सहभागी भएको प्रधानाध्यापक झाले बताए । प्रवेश परीक्षा दिनेमा २ सय ३९ जना छात्रा रहेका छन् ।

त्यसैगरी, कक्षा १ देखि ३ सम्म ३ सय ९१ जना नयाँ विद्यार्थी विद्यालयमा भर्ना भएको झाले बताए ।

पठनपाठनको हिसाबले निजी विद्यालयभन्दा सामुदायिक विद्यालय उत्तम रहेको दाबी गर्दै झाले भने, ‘निजी विद्यालय कम्पनीजस्तो हो । त्यस्ता स्कुलले फाइदाका लागि काम गर्छन् । उनीहरूको तामझाम बढी हुन्छ । हामी गुणस्तरीय शिक्षामा जोड दिन्छौँ । सामुदायिक विद्यालय निजीजस्तो कुनै एक व्यक्तिको निर्देशनमा चल्ने भन्ने हुँदैन । हामीले अभिभावकहरूलाई विश्वासमा लिएर पठनपाठन गराइरहेका छौँ । त्यस कारण हाम्रो विद्यालयप्रति अभिभावक, विद्यार्थीहरूको आकर्षण बढ्दै गएको छ ।’

विगत ६ वर्षदेखि अंग्रेजी माध्यममा पनि पठनपाठन गराउँदै आएको श्री याज्ञवल्क्य संस्कृत माध्यमिक विद्यालयको व्यवस्थापन पक्ष निकै बलियो रहेको र विद्यार्थीहरूको पढ्ने वातावरण राम्रो रहेकाले आफ्नो छोरालाई भर्ना गराउन आएको सर्लाही हरिपुर्वाका उमेश यादवले बताए ।

'भौतिक पूर्वाधार, शिक्षकको हिसाबले सामुदायिक विद्यालय निजीभन्दा कैयौँ गुणा राम्रो हुन्छ,' यादवले भने, ‘कतिपय सामुदायिक विद्यालयमा राजनीति प्रवेश भएका कारण पठनपाठन कमजोर भएको पाइन्छ । तर, त्यसलाई सुधार गर्दै जाने हो भने अझै पनि सामुदायिक विद्यालयप्रति अभिभावहरूको विश्वास बढ्न सक्छ ।’

प्रधानाध्यापक झाका अनुसार, श्री याज्ञवल्क्य संस्कृत माध्यमिक विद्यालयमा झण्डै ३ हजार विद्यार्थी अध्ययन गरिरहेका छन् । तर, आवश्यक भौतिक पूर्वाधारको अभावमा दुई सिफ्टमा कक्षा सञ्चालन गर्नुपर्ने बाध्यता रहेको उनले बताए ।

विद्यालयलाई भौतिक पूर्वाधारमा सम्पन्न बनाउन थप कक्षा कोठा र बसको आवश्यकता रहेको झाले बताए । केही शिक्षक निजी स्रोतमा राखेर पठनपाठन गराइरहेको बताउँदै उनले भने, ‘भौतिक पूर्वाधारमा सरकारले सहयोग गरेको खण्डमा प्रदेशकै नमुना विद्यालय बनाउने हाम्रो लक्ष्य छ ।’

प्रकाशित मिति: बुधबार, वैशाख १९, २०८१ ०७:००