मिर्गाैला दिएर बचाएकी प्रेमिकाले किन अस्वीकार गरिन् विवाहकाे प्रस्ताव ?

A+ A A-

भनिन्छ महिलालाई बुझ्न एकदमै गाह्रो हुन्छ । जति नै नजिक भए पनि उनीहरूको मनमा के हुन्छ त्यो कसैले बुझ्न सक्दैन । लण्डनमा भएको एउटा घटनाले यो धारणालाई सावित गर्दछ ।

लण्डनमा एक पुरूषले आफूले माया गर्ने महिलालाई आफ्नो एउटा मिर्गौला नै दिए । ४९ वर्षीय सिमोन लुइसले ४१ वर्षिया मेरी इम्मानुएललाई आफ्नो एउटा मिर्गौला दिएर मृत्युको मुखबाट बचाएका थिए ।

मिर्गौला प्रत्यारोपणको सफल शल्यक्रियापछि उनले ती महिलालाई विवाहको प्रस्ताव राखे । जुन व्यक्तिले आफूलाई बचाउन आफ्नो मिर्गौला नै दिन तयार हुन्छ भने उसको प्रेममा शंका गर्ने ठाउँ हुँदैन ।

यद्यपि, मेरीले सिमोनको विवाहको प्रस्ताव अस्वीकार गरिन् । सिमोनले आफ्नो एउटा मिर्गौला दिएर पनि आफ्नो प्रेम सावित गर्न सकेनन् । वास्तवमै महिलालाई बुझ्न गाह्रै हुने रहेछ ।

सिमोन र मेरी अपरिचित व्यक्ति पनि होइनन् । उनीहरू दुई दशकभन्दा बढी समयदेखि साथी थिए । सन् १९९४–९५ को आसपास पहिलोपटक भेटेका सिमोन र मेरीले पहिलो भेटमै चुम्बन पनि गरेका थिए । त्यसका बाबजुद उनीहरू त्यसयता साथी मात्र रहे । तर, सिमोन भने त्यहीबेलादेखि मेरीलाई मनपराउन थालिसकेका थिए ।

स्टक ब्रोकर सेक्रेटरीका रूपमा कार्यरत मेरी आफ्ना छोरा ड्वेनको हेरचाहमै व्यस्त हुन्थिन् । आफ्ना भाइसँग मिलेर सांगीतिक कार्यक्रमको व्यवस्थापन सम्हाल्ने सिमोनले भने त्यो चुम्बन र मेरीलाई बिर्सिन सकेका थिएनन् । उनी हरेक भ्यालेन्टाइन डेमा मेरीलाई चकलेट र फूल पठाइरहन्थे । मेरीले पनि ती उपहार स्वीकार्थिन् । तर, साथीका रूपमा ।

२०१४ मा मेरी एक्कासी बेहोस भइन् । उनका छोराले उनलाई अस्पताल लगेपछि थाहा भयो कि उनलाई अन्तिम अवस्थाको मिर्गौलाको रोग लागेको छ । मिर्गौला प्रत्यारोपण नै अन्तिम विकल्प थियो । तर, बी नेगेटिभ ब्लड ग्रुप भएकी मेरीलाई मिल्ने मिर्गौला कहीँ पाइएन ।

अस्पतालले उनको डिस्चार्ज गरे पनि उनी थला परिन् । सिमोनले आफ्नो सबै काम छाडेर उनको हेरचाह गर्न थाले । उनका लागि मिर्गौला नभेटिएपछि अस्पतालले उनलाई ‘डेड डोनर’को सूचीमा राख्यो । अर्थात्, अस्पतालले उनको मृत्यु हुने निश्चित गर्‍यो र मिर्गौलाबाहेक अन्य अंगदान गर्न सम्भावित मृत दाताको नाममा उनलाई समावेश गर्‍यो ।

सिमोन विक्षिप्त भए । उनले आफ्नो मिर्गौला पो मिल्छ कि भनेर अस्पतालमा टेस्ट गराए । भाग्यवश सिमोनले मेरीलाई मिर्गौला दान गर्न मिल्ने देखियो । उनले केही नसोची मेरीलाई मिर्गौला दिए । दुवै जनाको शल्यक्रिया सफल भयो । एकअर्कालाई ठीक हुन सहयोग पनि गरे ।

जब दुवै जना ठीक भए सिमोनले मेरीलाई विवाहको प्रस्ताव राखे । तर, मेरीले उनको प्रस्ताव ठाडै अस्वीकार गरिन् । मेरीले सिमोनको मिर्गौला त स्वीकार्य भयो, तर उनको मुटुको माया अस्वीकार गरिन् ।

मेरीलाई प्रस्ताव अस्वीकार गरेकोमा कुनै खेद छैन । आफूले सिमोनको मन दुख्नेगरी प्रस्ताव अस्वीकार नगरेको उनको भनाइ छ । सिमोनसँग आफूले साथी मात्र हुन रूचाएको उनले बताएकी छिन् । विवाहको प्रस्ताव अस्वीकार भए पनि सिमोनलाई मिर्गौला दिएकोमा कुनै ग्लानि छैन ।

‘मेरीलाई मिर्गौला दिने विषयमा मैले दोहोर्‍याएर सोच्नै परेन । म उनलाई असाध्यै माया गर्छु । आफूले माया गर्ने मान्छेलाई मिर्गौला दिँदा पनि कहीँ ग्लानि महसुस हुन्छ त ?’, सिमोनले बताएका छन् ।

प्रकाशित मिति: सोमबार, कात्तिक ४, २०७६ १५:३९