‘सब–ए–बारात’ पर्व मनाउँदै मुस्लिम समुदाय

A+ A A-

इस्लाम धर्मावलम्बीले आज आइतबार ‘सब–ए–बारात’ पर्व धुमधामका साथ मनाउँदै छन् ।

इस्लाम धर्मावलम्बीहरूले ‘सब–ए–बारात’मा अर्थात् आज रातभर जाग्राम बसेर सामूहिक नमाज पढ्ने, कुरान खानि, फतिह, मिलाद गराउने तथा कब्रिस्तान (चेहानस्थल)मा गएर मृत्यु भएका आफ्ना आफन्त तथा नजिकका लागि दुवा प्रार्थना गर्ने गर्छन् ।

‘सब–ए–बारात’को १० दिनअघिदेखि मुस्लिम सामुदायका व्यक्तिहरूले घरको सरसफाइदेखि कब्रिस्तानको सरसफाइ गर्ने गर्छन् । ‘सब–ए–बारात’को राति चाना, सुचिसहितका बलुवा बनाई फतिहा गराउने चलन छ ।

त्यसैगरी, धार्मिक गुरुहरूलाई घरमा बोलाई कुरान खानि (कुरान पढाउने), मिलाद गर्ने, गरिब विपन्नहरूलाई घरमा बोलाई मीठो परिकार खुवाउने तथा उनीहरूलाई दानदक्षिणा दिने गर्छन् ।

‘सब–ए–बारात’मा रातभरि जाग्राम बसेर धार्मिक क्रियाकलाप गरेको खण्डमा अल्लाह खुसी हुने र व्यक्तिले चिताएको कुरा अल्लाहले पूरा गर्ने तथा विगतमा गरेका पापहरूको अल्लाहले माफी गरिदिने जनविश्वास गरेको इस्लामिक धार्मिक गुरु मोफ्ति उसमान बरकातिले बताए ।

जनकपुरधामका समाजसेवी तथा युवा नेता इदमोहम्मद साफी (जानी खान)ले भने, ‘सब–ए–बारात’ भनेको इबादत (धर्मकर्म) को राति हो, यो राति मान्छेले जति धर्म गर्छन्, त्यसबाट अन्य दिनको तुलनामा ७० गुणा बढी पुण्य पाउँछन् । त्यसैले यसलाई मुस्लिम सामुदायले ‘सब–ए–बारात’लाई धुमधामका साथ मनाउने गर्छन् ।

जनकपुरधामकी फैजाने महिदा मदरसाका मोफ्ती मोतीउल रहमानले भने, ‘यो महिना निकै पुण्यको महिना हो । यो महिनामा हजरत मोहम्मद साहब रोजा बस्नुहुन्थ्यो । यो महिनामै सब–ए–बारात मनाइन्छ । सब–ए–बारातकै राति अल्लाहले वर्षभरिमा कसको कति रिजक (आय) हुन्छ ? कसको जन्म र मृत्यु हुन्छ, सबै अल्लाहले उल्लेख गर्छन् । त्यस कारण यो महिना मुस्लिम समुदायका लागि विशेष महत्त्व राख्छ ।’ सब–ए–बारात सम्पन्न भएको १५ दिनपछि रमजान पर्व सुरु हुने उनले बताए ।

प्रकाशित मिति: आइतबार, फागुन १३, २०८० १३:२७