चिसोबाट कसरी बच्ने ? यस्ता छन् डा. प्रज्वल श्रेष्ठका १० सुझाव

तस्वीर : सुशील श्रेष्ठ/शिलापत्र

चिसो मौसममा विशेष गरी श्वासप्रश्वासका समस्याहरू बढी देखिन्छ । चिसो मौसममा वायुमण्डलमा भएको हावा चिसो र सुक्खा हुने हुँदा यसले प्रत्यक्ष रूपमा श्वासप्रश्वासमा असर गर्ने गर्छ । सुक्खा हावाले गर्दा घाँटी दुख्ने, खसखस हुने, खोकी बढ्ने, स्याँस्याँ हुनेजस्ता समस्या निम्तिन सक्छ ।

दम रोग लागेका बिरामीहरू चिसो मौससमा बढी प्रभावित हुन्छन् । दीर्घरोगीसँगसँगै चिसोमा सामान्य व्यक्तिलाई समेत श्वासप्रश्वासमा समस्या देखिन सक्ने श्वासप्रश्वासविज्ञ डा. प्रज्वल श्रेष्ठले बताए ।

चिसो मौसममा विभिन्न भाइरसहरू सक्रिय हुने हुँदा रुघाखोकी, नाकबाट पानी बग्ने, जोर्नी दुख्ने समस्यासमेत देखिने गरेको उनले बताए ।

चिसो मौसममा यी समस्याबाट बच्न डा. प्रज्वल श्रेष्ठका सुझाव यस्ता छन् ।

– चिसो मौसममा बिहान र बेलुका अत्यावश्यक कामबाहेक घरबाट ननिस्किने ।
– शरीरमा तातो, न्यानो हुनेगरी कपडा लगाउने र व्यक्तिगत हेरचाह गर्ने ।
– पोषणमा ध्यान दिने । झोलिला कुराहरू बढी खाने ।
– ध्यान दिएर धुवाँ र धुलो नभएको स्थानमा वा घरमै शारीरिक व्यायाम गर्ने ।
– चिसो मौसममा वायु प्रदूषण बढी हुने हुँदा मर्निङ वाक र इभिनिङ वाकमा नजाने ।
– कोठाभित्र बस्दा झ्यालढोका थुनेर होइन, खुला गरेर बस्ने ।
– घाँटी खसखसाएको छ भने सफा पानीको बाफ लिने ।
– ब्लड प्रेसर, कोलेस्टेरोलको बिरामीले हरेक बिहान प्रेसर र कोलेस्टेरोलको मात्रा मापन गर्ने ।
– जाडो महिनामा दीर्घरोगीहरूको समस्या बढेर जान सक्ने जोखिम भएकाले निरन्तर फलोअपमा जाने ।
– चिसो खानेकुरा र जंकफुड नखाने ।

प्रकाशित मिति: शुक्रबार, पुस १३, २०८० ०६:४६