मुद्दा लड्दा सुकुम्बासी

A+ A A-

आजको अन्नपूर्ण पोष्टले मुलुकको न्याय प्रणालीमा रहेको ढिलासुस्तीका कारण नागरिकले पाएको पीडालाई प्रमुख समाचार बनाएको छ । सूर्योदय नगरपालिका–११ का ६१ वर्षीय इन्द्रप्रसाद ढकालले जग्गा फिर्ता पाउने आसमा ४० वर्ष अदालतको ढोका ढक्ढक्याए। पछिल्लो पटक अदालतले उनको मुद्दा खारेज गरिदियो। यो अवधिमा न्यायका लागि २ करोड रुपैयाँ हाराहारी सकिएको उनको दाबी छ। ‘सम्पत्तिका नाममा अब नागरिकता मात्र बाँकी छ’, उनले भने।

सर्वोच्च अदालतबाट मुद्दा हारेपछि ढकाल परिवार सरकारले केही गरिदेला कि भन्ने आसमा छ। प्रधानमन्त्री केपी ओली पुस २० मा इलाम आउँदा सुरक्षाकर्मीलाई ठेलठाल पारी उनले एउटा पत्र थमाए। पत्रमा लेखिएको थियो, ‘मुद्दा फिर्ता गरी सुकुम्बासी हुनबाट मुक्त गराइपाऊँ।’

त्यस्तै अन्नपूर्णले सत्तारुढ दल नेकपाले तल्लो तथा जनवर्गीय संगठनको एकता प्रस्ताव तयार पार्न गठन गरेको कार्यदलको म्याद थप गर्नेरनगर्ने विवाद चुलिएको समाचार पहिलो पृष्ठमा प्रकाशित गरेको छ। प्रधानमन्त्री एवं पार्टी अध्यक्ष केपी ओलीले कार्यदल विघटन गरी सचिवालयबाटै एकताको प्रस्ताव तयार पार्नुपर्ने प्रस्ताव राखेका छन्। वरिष्ठ नेता माधवकुमार नेपाल, झलनाथ खनाल, वामदेव गौतम, नारायणकाजी श्रेष्ठ कार्यदललाई एक साता समय दिनुपर्ने पक्षमा उभिए।

अर्का अध्यक्ष पुष्पकमल दाहाल कार्यदल विघटन वा म्याद थपका विषयमा खुलेनन्। वरिष्ठ नेता नेपालसहितका नेताले कार्यदल सदस्य स्वयंले सर्वसम्मत रूपमा ७ दिनको समय मागेको र यसअघि काम गर्नसमेत नपाएको अवस्थाको रिपोर्टिङ गरेकाले स्थायी समिति बैठकले बनाएको कार्यदल सचिवालयले विघटन गर्न नसक्ने तर्क गरेको समाचारमा छ ।

राजदूतलाई रातो ‘बत्ती’, मूल्यांकनमा कमजोर ठहरिए फिर्ता शीर्षकमा अन्नपूर्णमा अर्काे समाचार प्रकाशित छ । एउटा राजदूतका लागि सरकारले वार्षिक दुई करोडभन्दा बढी लगानी गर्छ। राज्यको ठूलो लगानी हुने व्यक्ति निष्क्रिय बनिदिँदा अन्तर्राष्ट्रिय क्षेत्रमा मुलुकको पहिचानमै समस्या हुन्छ। पछिल्लो समय राजदूतलाई सक्रिय बनाउन परराष्ट्र मन्त्रालयले प्रयास थालेको छ।

उनीहरूलाई देशहितमा क्रियाशील बनाउन परराष्ट्रले उनीहरूको मूल्यांकन प्रणाली अपनाएको छ। राजदूतहरूको चौमासिक मूल्यांकन थालिएको छ। यसमा कमजोर ठहरिएका राजदूतलाई सीधै फिर्ता बोलाइनेछ।

अन्नपूर्णले विदेशी मुद्रा सञ्चिति खतराको घण्टी शीर्षकमा सम्पादकीय लेखेको छ भने न्यायिक नेतृत्वको प्रश्न शीर्षकमा डा. सूर्य ढुंगेलको लेख प्रकाशित छ ।

प्रकाशित मिति: शुक्रबार, फागुन १०, २०७५ १७:२८