अनैतिक सम्बन्धले अपराधमा खेलेको भूमिका, अजितमाथि सुजितले गरे गोली प्रहार

A+ A A-

बाराको पचरौता नगरपालिका ६ लक्ष्मीनियामा भएकाे अजितकुमार सिंहको हत्या प्रकरणको प्रहरीले रहस्योद्घाटन गरेको छ । ९ असोजको साँझ २२ वर्षीय सिंहमाथि गोली प्रहार भएको थियो । उनको घटनास्थलमै मृत्यु भएको थियो । भारतकाे माेतिहारीका अजितमाथि भारतीय आपराधिक समूहले नै गाेली हानेकाे खुलेकाे छ ।

घटनास्थल पुगेको प्रहरी हत्याराको खोजीमा लाग्यो । तर घटनास्थल नेपाल र भारतको सीमानजिक भएकाले अनुसन्धानमा प्रहरीलाई सजिलो थिएन । यो प्रकरणमा भारतीय आपराधिक समूहको संलग्नता रहेको प्रहरीलाई शंका लाग्यो । तर, यसको मोटिभको खोजीमा प्रहरी लाग्यो । प्रहरीको अनुसन्धानको सुई मृतक सिंहकी श्रीमती सोनम सिंहतर्फ घुम्यो ।

प्रहरीले सोनमलाई नियन्त्रणमा लिएर अनुसन्धान थालेपछि घटनाको रहस्योद्घाटन भयो । सोनम र सुजितकुमार सिंहको समूह मिलेर अजितको हत्या गरेको खुल्यो । सोनमले नै प्रहरीसमक्ष अपराध स्वीकारिन् ।

प्रहरीका अनुसार सोनम र सुजितबीच अनैतिक सम्बन्ध थियो । त्यसैले सोनम अजितलाई आफ्नो बाटोबाट हटाउन चाहन्थिन् । उता सुजित र अजितबीच पुरानो रिसइबी थियो । अजित र सुजितले केही वर्षपहिला भारतमा सुन लुटपाट गरेका थिए । सो लुटपाटको पैसामा उनीहरूबीच विवाद थियो । त्यसैले उनी पनि अजितलाई पाखा लगाउन चाहन्थे । भारतीय नागरिक सुजित र अजित ९ असोजमा एउटै मोटरसाइकलमा घटनास्थल लक्ष्मीनियामा पुगेका थिए । त्यहीँ सुजितले अजितमाथि गोली प्रहार गरेका थिए ।

घटनास्थलको छनोटका लागि सुजितको समूहका अन्य व्यक्तिहरू पनि संलग्न रहेको प्रहरीले जनाएको छ । प्रहरीले साेनमलाई हिरासतमा लिएकाे छ भने सुजितसहित चार जना फरार छन् ।