आमाछोरी हत्या प्रकरणः फेसबुकबाट प्रेमिका बनेकी रेवतीको हत्या गर्न दुबईबाट नेपाल आएका थिए बस्नेत

आमाछोरी हत्या प्रकरणः फेसबुकबाट प्रेमिका बनेकी रेवतीको हत्या गर्न दुबईबाट नेपाल आएका थिए बस्नेत

A+ A A-

सल्यानमा आमाछोरीको जलाएर बीभत्स हत्यामा संलग्न एक जना अभियुक्तलाई प्रहरीले सार्वजनिक गरेको छ । उक्त घटनामा संलग्न सल्यानको सिद्धकुमाख गाउँपालिका–२, खानीगाउँ स्थायी ठेगाना भएका २८ वर्षीय कर्णबहादुर बस्नेतलाई प्रहरीले सार्वजनिक गरेको हो ।

प्रहरीले बुधबार उनलाई सिद्धकुमाख गाउँपालिका–३, ढोरचौरबाट प्रक्राउ गरेको भए पनि बिहीबार मात्रै सार्वजनिक गरेको हो । गत भदौ ३० गते राति जिल्लाको त्रिवेणी गाउँपालिका–२, काँरागिठीमा आमाछोरीको शव जलेको अवस्थामा फेला परेको थियो । जिल्ला त्रिवेणी गाउँपालिका वडा नम्बर–२, झालेढुंगास्थित थापा टोल बस्ने सुकलाल थापाको टिनले छाएको एकतले कच्ची घरमा थापाकी श्रीमती वर्ष २९ की रेवती थापा र उनकी छोरी ९ महिनाकी रितु थापा सुतेका थिए ।

बिहान अबेरसम्म आमाछोरी नउठेपछि छिमेकीले ढोका खोलेर हेर्दा जलेको अवस्थामा मृत भेटिएपछि इलाका प्रहरी कार्यालय लुहाम सल्यानमा खबर गरेका थिए । स्थानीयको खबरपछि इलाका प्रहरी कार्यालय लुहाम र प्रहरी चौकी काभ्राबाट प्रहरी निरीक्षक रेशमलाल पौडेलको कमाण्डमा सात जनाको प्रहरी टोली घटनास्थलमा पुगेको थियो ।

स्थानीयले ग्यास चुहावट हुँदा आगो लागेको हुन सक्ने अनुमान गरे पनि घटनाको प्रकृतिअनुसार प्रहरीले हत्या भएको हुन सक्ने निष्कर्ष निकाल्दै सूक्ष्म अनुसन्धान थालेको थियो । घटनाको थप अनुसन्धानका लागि जिल्ला प्रहरी कार्यालय सल्यानबाट प्रहरी नायब उपरीक्षक नवीन कार्की तथा कर्णाली प्रदेश प्रहरी कार्यालय सुर्खेतबाट प्रहरी वरिष्ठ नायब निरीक्षक नारायणप्रसाद शर्माको कमाण्डमा दुई जनाको विशेष अनुसन्धान टोली घटनास्थलमा खटिएर अनुसन्धान सुरु गरेको थियो ।

प्रहरीले अनुसन्धानका लागि केनाइन शाखाबाट प्रहरी नायब निरीक्षक विष्णु पौडेलको कमाण्डमा तालिमप्राप्त कुकुरसहितको टोलीसमेत घटनास्थलमा खटाएर सूक्ष्म अनुसन्धान गरेको थियो । घटना भएकै दिन प्रहरीले रेवतीको मोबाइलबाट सुराक पत्ता लगाएर बस्नेतमाथि निगरानी सुरु गरेको थियो । निज बस्नेत शंकास्पद देखिएपछि बुधबार उनलाई नियन्त्रणमा लिएर प्रहरीले अनुसन्धान थालेको थियो ।

प्रहरीले उक्त अनुसन्धानपश्चात् घटनास्थलको लास जाँच मुचुल्कासमेतको अनुसन्धान गरी शव परीक्षणका लागि भेरी अञ्चल अस्पताल बाँके पठाई शव परीक्षणपश्चात् सद्‌गदका लागि परिवारको जिम्मा लगाएको थियो ।

पुरानो रिस साँध्न हत्या गरेको स्वीकार

घटना भएलगत्तै प्रहरीले रेवतीले प्रयोग गरेको मोबाइलबाट केही सुराक पत्ता लगाइसकेको थियो । आरोपित कर्णबहादुर बस्नेतले मृतक रेवती थापासँग पुरानो रिस साँध्नलाई बीभत्स हत्या गरेको प्रहरीको अनुसन्धानबाट खुलेको छ ।

आरोपित बस्नेतको मृतक रेवती थापासँग झण्डै सात वर्षअघि फेसबुकमार्फत चिनजान भएको र कुराकानी हुँदै जाँदा गहिरो प्रेम सम्बन्ध रहेको प्रहरी अनुसन्धानले देखाएको छ । उनीहरूबीचको निरन्तर प्रेम सम्बन्धपछि पटक–पटक शारीरिक सम्बन्धसमेत स्थापित भई दुवैबीच विवाह गर्नेसम्मको कुरा भएको आरोपीले स्वीकारेका छन् । यति मात्रै होइन, सहमतिमा अश्लील तस्वीर र भिडियोसमेत लिएको अनुसन्धानबाट खुलेको छ ।

उनीहरूबीच प्रेम सम्बन्ध चलिरहेकै बखत आरोपित बस्नेत वैदेशिक रोजगारीमा सन् २०१८ मा दुबई उडेका थिए । उनी दुबईमा रहँदा रेवतीले सोही ठाउँका सुकलाल थापासँग विवाह गरेकी थिइन् । सोही विषयलाई बस्नेतले धोका र इगोको रूपमा लिएपछि घटना भएको प्रहरीले बताएको छ ।

आफू विवाहित भए पनि रेवतीसँग दोस्रो विवाह गर्ने सहमति भएको भन्ने बयान बस्नेतले दिएका छन् । रेवतीले विवाह गरे पनि करिब दुई वर्षअगाडि बस्नेतसँग विभिन्न माध्यमबाट सम्बन्ध पुनः स्थापित भएको देखिएको प्रहरीले जनाएको छ । प्रहरीका अनुसार पुरानो इगो र सहमतिमा लिइएका अश्लील तस्वीर र भिडियोको विषयले रेवती र बस्नेतबीच मनमुटाव सुरु भएको देखिन्छ । सो फोटो र भिडियोकै कारण रेवतीको पतिसँग समेत झगडा भई सम्बन्धमा केही समय समस्या आएको अनुसन्धानबाट खुलेको छ ।

पछि सोही विषय बढ्दै जाँदा करिब ८ महिनाअगाडिदेखि बस्नेतले दुबईमै रहेको समयमा नेपाल फर्कनासाथ हत्या गर्ने योजनामुताबिक करिब चार महिनाअघि हत्या गर्नकै लागि बिदासमेत मागेको तर बिदा नपाएको स्वीकारेका छन् । हत्या योजनासहित भदौ २६ गते दुबईबाट नेपाल आएका बस्नेतले भदौ २९ गते राति हत्या गरेको स्वीकारेका छन् । बस्नेत विगत १० वर्षदेखि वैदेशिक रोजगारीका क्रममा मलेसिया, दुवै र भारतमा बस्दै आएका थिए ।

हत्यापछि पेट्रोल छर्केर आगो

हत्याको योजना बनाएर २६ भदौमा काठमाडौंबाट सल्यान सिद्धकुमाख–२, खानीगाउँस्थित आफ्नै घरमा दुई दिन बसेका बस्नेत २९ भदौमा स्थानीय श्रीनगर बजारसम्म गाडीमा आई पेट्रोल र सलाई खरिद गरेर मृतक रेवतीको गाउँ पुगेका थिए ।

साँझमै उक्त गाउँ पुगे पनि केही समय जंगलमा बसेर बस्नेत रातिको करिब १० बजे मृतक रेवतीको घरभित्र पसी सुरुमा घाँटीमा कपडाले कसेर लडाएको स्वीकार गरेका छन् । त्यसपश्चात् बीभत्स तवरबाट शरीरमा पेट्रोल छर्की आगो लगाएपछि रेवती र ओछ्यानमा सुतिरहेकी नौ महिनाकी छोरी रितुको हत्या गरेको बस्नेतले स्वीकार गरेका छन् ।

हत्या गरेपछि नजिकै कसैको घरमा बास बसी बिहान सबेरै ३/४ बजेको समयमा त्यहाँबाट आफ्नो घर सिद्धकुमाख– ३ तर्फ फर्केको प्रहरीको विस्तृत अनुसन्धानले देखाएको छ ।

प्रकाशित मिति: बिहीबार, असोज ४, २०८० १८:३५