संवैधानिक परिषद्का सिफारिस बारम्बार विवादित

A+ A A-

आजको कान्तिपुर दैनिकले संर्वधानिक परिषद्का सिफारिस बारम्बार विवादित शीर्षकमा प्रमुख समाचार प्रकाशित गरेको छ । संवैधानिक परिषद्ले बारम्बार संवैधानिक र कानुनी मापदण्ड पूरा नगरेका व्यक्तिलाई सिफारिस गरेको पाइएको समाचार छ । मुस्लिम आयोग अध्यक्षमा समिम मियाँ अन्सारीलाई पठाउने निर्णयले परिषद्को सिफारिसलाई थप विवादित बनाएको समाचारमा छ ।

मुस्लिम आयोगसम्बन्धी ऐनमा आयोगको अध्यक्षको योग्यता १० वर्ष मुस्लिम समुदायको हकहितमा काम गरेको, स्नातक उपाधि हासिल गरेको, राजनीतिक दलको सदस्य नरहेको, ४५ वर्ष उमेर पूरा गरेको र उच्च नैतिक चरित्र भएको हुनुपर्ने व्यवस्था छ ।

प्रधानमन्त्री अध्यक्ष रहने परिषदको माघ ६ को बैठकले मुस्लिम आयोगको अध्यक्षमा सिफारिस गरेका अन्सारीको नागरिकता र शैक्षिक प्रमाणपत्र नक्कली भएको, पार्टीको सदस्यता कायम रहेको भन्दै संसदको सुनुवाइ समितिमा उजुरी परेपछि छानबिन भइरहेको कान्तिपुरले लेखेको छ ।

त्यस्तै प्रतिनिधिसभाका समानुपातिक सांसदले स्थानीय पूर्वाधार विकास साझेदारी कार्यक्रममा आफूलाई भूमिका नदिइएको भन्दै संसद्मै नियमावली च्यातेर विरोध जनाएको समाचार कान्तिपुरमा प्रकाशित छ ।
निर्वाचन क्षेत्रमा योजना छनोटदेखि बजेट बाँडफाँटमा भूमिकाविहीन बनाइएपछि उनीहरूले बुधबारको बैठकमा आक्रोश पोखेका हुन् ।

सरकारले एक निर्वाचन क्षेत्रमा ४ करोड रुपैयाँ विकास निर्माणमा खर्चने गरी बजेट छुट्याएको छ । कांग्रेस सांसद उमा रेग्मीले स्थानीय पूर्वाधार विकास कार्यक्रमको नियमावली नै च्यातिन् । ‘विभेदकारी नियमावली कसैलाई पाच्य छैन । यस्तो नियमावलीको औचित्य पनि छैन,’ उनले भनिन्, ‘एउटै हाउसमा बस्ने सांसदबीच किन मानमर्दन रु समान हैसियत होस् ।’

टोलपिच्छे कृषक पाठशाला शीर्षकमा डडेल्धुराबाट पठाइएको समाचारलाई कान्तिपुरले पहिलो पृष्ठमा प्रकाशित गरेको छ । गाउँमा कृषि ज्ञान आदानप्रदान गर्न र समस्या सुल्झाउन कहाँ जाने ? कुनै समय कृषि सेवा केन्द्रबाहेक विकल्प थिएन । सामूहिक खेती र उत्पादनबारे त छलफलै हुँदैनथ्यो । परम्परागत कृषि प्रणालीमा आधारित कृषकलाई वर्षभरि मिहिनेत गरेर ३ महिना पनि खान पुग्दैनथ्यो ।

अहिले अवस्था फेरिएको छ । डडेल्धुराका किसानले गाउँमै कृषक पाठशाला बनाएर आफ्ना समस्या समाधानका साथै नयाँ–नयाँ कृषि प्रविधि सिकेर उत्पादन प्रवर्द्धन गरिरहेको कान्तिपुरले लेखेको छ ।
बालिका सुरक्षाका प्रश्न शीर्षकमा कान्तिपुरले सम्पादकीय लेखेको छ भने निर्जनद्वीप होइन प्रदेश २ शीर्षकमा चन्द्रकिशोरको लेख प्रकाशित छ ।

प्रकाशित मिति: बिहीबार, फागुन ९, २०७५ १८:३६