बालेनका १३ महिना- ७ काम, ६ लफडा

A+ A A-

मेयरको शक्ति कति हुन्छ ?

यसको जवाफ काठमाडौं महानगरपालिकाका मेयर बालेन शाहलाई नियाल्दा भेटिन्छ ।

यस कारण मात्रै होइन कि, बालेनले सिंहदरबारमा बस्ने नेता, मन्त्रीलाई ‘चोर’ भन्दै फेसबुक, ट्विटरमार्फत गाली गरे । बरु संघ र प्रदेश सरकारको अपेक्षित साथ नपाउँदासमेत उनले १३ महिनाभित्र थालेका कामले देखाउँछन्- मेयरले आफ्नो क्षेत्राधिकार र शक्तिको उचित प्रयोग गरेर जनतामा आशाको सञ्चार गर्न सक्छ । यो रिपोर्टिङमा हामीले बालेनले थालनी गरेका सात सकारात्मक काम र उनी चुकेका ६ योजनाबारे प्रकाश पार्ने प्रयास गरेका छाैँ ।

बितेका १३ महिनामा बालेन, संघ र प्रदेश सरकारदेखि अदालत अनि महानगरकै वडाध्यक्षहरूसँग समेत जुधे । बालेनकै भाषामा उनलाई राजीनामाका लागि बाध्य पार्नसमेत खोजियो । तर उनी रोकिएका छैनन् । बरु अझै खरो भएर प्रस्तुत भइरहेका छन् ।

स्वास्थ्यमन्त्रीलाई अल्टिमेटम, नि:शुल्क एम्बुलेन्स

स्वास्थ्यमन्त्री माेहनबहादुर बस्नेतकाे ध्यानाकर्षण गराउँदै बालेन । तस्वीर साैजन्यः बालेन शाहकाे फेसबुक ।

हालै मात्र उनले विपन्न नागरिकलाई नियमानुसार छुट र सुविधा नदिने अस्पताललाई कारबाही गर्न स्वास्थ्यमन्त्री मोहनबहादुर बस्नेतको ध्यानाकर्षण मात्र गराएनन्, मन्त्रालयले नगरे महानगरपालिकाले आफ्नो हिसाबले कारबाही गर्ने चेतावनीसमेत दिएका छन् ।

स्वास्थ्य संस्था सञ्चालन मापदण्ड, २०७७ एवं प्रचलित स्वास्थ्यसम्बन्धी कानुनअनुसार विपन्न एवं लक्षित वर्गलाई दिनुपर्ने कुल शय्याको १० प्रतिशत छुट्याई निःशुल्क उपचार गर्नुपर्नेलगायतका सुविधाहरू तय गरिएका छन् । तर, महानगरभित्रका ६८ वटा स्वास्थ्य संस्थाले यस्ता सुविधाहरू नदिएको अनुगमनमा पाइएको छ ।

बालेनले स्वास्थ्यमन्त्रीलाई अल्टिमेटम दिँदै भनेका छन्, ‘कानुनअनुसार नागरिकले पाउने स्वास्थ्यसम्बन्धी छुट सुविधाहरू उपलब्ध नगराइदिने स्वास्थ्य संस्थालाई सुध्रिन भनिदिनुहोला । यदि तपाईंले सात दिनभित्र उहाँहरूलाई कानुनी दायरामा ल्याउनु भएन भने हामी अस्पताल प्रशासन बन्द गर्न बाध्य हुनेछौँ ।’

जनस्वास्थ्यका हकमा कतिपय स्वास्थ्य संस्थासँग सम्झौता गरी बालेनले ज्येष्ठ नागरिकलाई विभिन्न खालका स्वास्थ्य सेवा नि:शुल्क उपलब्ध गराउन थालेका छन् । उनले केही दिनअघि मात्रै काठमाडौं महानगरपालिकाभित्र चाैबीसै घण्टा एम्बुलेन्स सेवा नि:शुल्क गर्ने घोषणा गरेका थिए ।

बेतिथि र ढिलासुस्तीविरुद्ध बालेन स्वास्थ्य मन्त्रालयसँग मात्रै होइन, फोहोर व्यवस्थापनको विषयमा शहरी विकास, सार्वजनिक जग्गा अतिक्रमणको विषयमा परराष्ट्र मन्त्रालय अनि सुकुम्बासी व्यवस्थापनको विषयमा गृह मन्त्रालयसँग समेत भिडेका थिए । एक मेयर आफ्नो कार्य र क्षेत्राधिकारका लागि सिंहदरबारसँग बारम्बार जुधेको दुर्लभ घटना सम्भवतः काठमाडौंमा बालेनको उदयपछि नै देखिएको ललितपुर- १० का ८२ वर्षे नरसिंह व्यञ्जनकार बताउँछन् । उनलाई बालेनले आफ्नो राजनीतिक गुरु मान्छन् ।

'उसको नियतमा खोट देखिएको छैन । सिंहदरबारसँग भिड्दै भए पनि धेरै कामको सुरुवात गरेको छ । आगामी दिनमा अझै काम गर्ने आशा गर्न सकिन्छ', व्यञ्जनकारले भने ।

घोषणापत्र काम, गर्दै धमाधम

मेयर बालेनले आफ्नो चुनावी घोषणापत्रमा उल्लेख गरिएका विषयहरूलाई क्रमशः कार्यान्वयन गर्दै लगेको देखिन्छ । सवारी व्यवस्थापन, शैक्षिक सुधार, स्वास्थ्य सेवामा नागरिक पहुँच, फोहोर व्यवस्थापन उनका प्रमुख चुनावी एजेण्डा थिए । फाेहाेरकाे वैज्ञानिक व्यवस्थापनमा उनले प्रभावकारी काम गर्न सकेका छैनन् तर अन्य क्षेत्रमा उनले सानै भए पनि अनुकरणीय कामहरूकाे थालनी गरेका छन् ।

शिक्षामा सीप, फ्राइडे बुक फ्री

काठमाडौं महानगरका सामुदायिक माविमा पढाइका साथै सीपमूलक तालिम अनिवार्य, सबै सामुदायिक माविलाई नमुना बनाइने, सार्वजनिक विद्यालयको शौचालय स्तरोन्नति गर्ने, बालबालिकालाई किताबको भारी नबोकाउन लकरको व्यवस्था गरिने, इतिहास, योग, आयुर्वेदजस्ता पौराणिक शिक्षाका साथै विश्वस्तरमा जोड्न सकिने प्रविधिसहितको शिक्षामा जोड दिने, निजी विद्यालयको पनि अडिट गरिनेजस्ता याेजना बालेनले ल्याएका छन् ।

महानगरभित्रका ८९ वटा सामुदायिक विद्यालयमा सीपसहितकाे शिक्षाकाे थालनी हुनुलाई धेरैले सकारात्मक मानेका छन् । 'पाइलट प्रोजेक्ट'का रूपमा लिइएकाे याे याेजनाअनुसार कक्षा ९ मा अध्ययनरत विद्यार्थीलाई उनीहरूको छनोटअनुसार ९० घण्टाको सीपमूलक तालिम दिइनेछ ।

मोबाइल एन्ड इलेक्ट्रोनिक्स, प्लम्बिङ, कार्पेन्टर, कृषि, हाउस वाइरिङ, ब्युटिसियन एन्ड हेयर स्टाइलजस्ता दश विधामा विद्यार्थीले रुचिअनुसार तालिम पाउनेछन् । शिवपुरी माध्यमिक विद्यालयमा पाककला र मोबाइल इलेक्ट्रोनिक्स गरी दुईवटा कक्षा सञ्चालनमा छन् । पद्मकन्या विद्याश्रममा विद्यार्थीहरू स्केचिङ र मूर्तिकला, फेसन र कपडा निर्माणजस्ता सीप सिकिरहेका छन् ।

याे पनि..

'शिक्षा केवल घाेकन्ते र सैद्धान्तिक भइरहेकाे सन्दर्भमा एउटै कक्षाबाटै भए पनि महानगरले सुरु गरेको यो अभियानले शिक्षा र सीपलाई जोड्न मद्दत गर्ने विश्वास रहेकाे काठमाडाैं महानगर शिक्षा विभागका प्रमुख सीताराम काेइराला बताउँछन् । 'सैद्धान्तिक ज्ञानले मात्रै सिकाइ पूर्ण हुँदैन । सीपसहितकाे ज्ञानले सिकाइलाई समृद्ध बनाउँछ । महानगरकाे अर्काे उद्देश्य भनेकाे विद्यार्थीमा श्रमप्रति सम्मान पैदा गर्नु हाे । अहिले ५६ वटा माविमा ८१ वटा समूह बनाएर विभिन्न १० वटा विधामा विद्यार्थीलाई सीपसहितको सिकाइ कार्यान्वयनमा लगेका छौँ,' उनले शिलापत्रसित भने ।

महानगरले हप्ताको एक दिन विद्यार्थीलाई किताबबाहेकका अतिरिक्त गतिविधिमा केन्द्रित गर्ने कार्यक्रम पनि लागू गरेको छ । ‘बुक फ्री फ्राइडे’ कार्यक्रमअन्तर्गत विद्यार्थीहरू पत्रपत्रिका पढ्ने, भाषण गर्ने, कविता लेख्ने अनि वाचन गर्ने, कला तथा खेलकुद, चित्रकला, सर्वेक्षण, विज्ञान प्रयोगशालामा सहभागी भइरहेका छन् । ‘बुक फ्री फ्राइडे’ अन्तर्गत ५६ सामुदायिक विद्यालयमा ‘शिक्षामा सीप’ कार्यक्रमको बालेनले अनुगमनसमेत थालेका छन् ।

स्टार्टअपलाई प्राेत्साहन- आइडिया बैंक

उनले आफ्नो चुनावी घोषणाअनुसार उद्यमशीलता विकास गर्न आइडिया बैंक कार्यक्रम पनि लागू गरेका छन् । लगानीको अभावमा लागू हुन नसकेका आइडियालाई स्टार्टअपमा परिणत गर्न यो कार्यक्रम महत्त्वपूर्ण बन्न सक्छ । कार्यक्रमबाट स्टार्टअपमा योजना बनाइरहेका विद्यार्थीले पनि लाभ लिन सक्ने विश्वास गरिएको छ ।

घरैमा सेवा

सेवा प्रवाहलाई आधुनिक प्रविधिमैत्री बनाउने पहलस्वरुप महानगरले एकीकृत डिजिटल सुशासन प्रणाली केएमसी एप लन्च गरिसकेको छ । यो सेवामार्फत सेवाग्राहीहरूले अनलाइनमार्फत जुनसुकै ठाउँमा बसेर पनि महानगरको सेवा लिन पाउँछन् । विभिन्न बिल भुक्तानीका लागि घण्टौँ लाइन लाग्नुपर्ने बाध्यता काठमाडौं महानगरबाट हट्दै गएको देख्न सकिन्छ ।

चुनावअगाडि उनले काठमाडौंका चोकचोकमा सीसी क्यामेरा जडान गर्ने घोषणा गरेका थिए । सोही घोषणाअनुसार जडान र सञ्चालनका लागि नेपाल प्रहरीलाई ६ करोड रुपैयाँ उपलब्ध गराएका छन् ।

टाढिएका वडाध्यक्षहरूसँग समदूरी

चुनावअघि धेरैको अनुमान के थियो भने, स्वतन्त्रले चुनाव जितिहाल्यो भने पार्टीका वडाअध्यक्षले काम गर्न दिँदैनन् । मेयर निर्वाचित भएको केही समयसम्म वडाध्यक्षहरूसित बालेनको कुरा खासै मिलेको देखिएन । कालान्तरमा बालेन वडाध्यक्षहरूसँगको समन्वय प्रभावकारी बनाउन सफल रहे । महानगरको बैठकलाई प्रत्यक्ष प्रसारण गरेकाले पनि कसैले नियतवश अड्चन खडा गर्न सकेन ।

बालेनले पछि वडाध्यक्षहरूको साथ लिएर काठमाडौंभित्र सवारी व्यवस्थापनको काम अघि बढाए । नक्सामा ‘बेसमेन्ट पार्किङ’ देखाएका तर यथार्थमा पसल चलाउन भाडामा दिएका थुप्रै घरहरू थिए । पार्किङ गर्ने ठाउँमा पसल भएपछि सवारी साधनजति सबै सडक किनारमा रोकिन्थ्यो । यसले शहरलाई कुरुप मात्रै बनाएको थिएन, पैदलयात्रीलाई दुर्घटनाको जोखिम पनि बढाएको थियो ।

त्यसैले ‘पहुँचवाला’ घरबेटीदेखि नाम चलेका व्यवसायीसम्मका घरमा उनले डोजर चलाए । महानगरको यो पहलको परिणाम अहिले नयाँ बानेश्वर, अनामनगर, बागबजार, दरबारमार्गलगायत क्षेत्रका सडकपेटीमा देखिन्छ । पहिलापहिला सडक किनारसँगै मान्छे हिँड्ने गल्लीसमेत सवारी पार्किङले अस्तव्यस्त हुन्थे । अहिले ती क्षेत्रमा जताततै सवारी पार्किङ गरेको देखिँदैन ।

सिसडोलवासीलाई मनाए, सिंहदरबारलाई सजाय

मेयर बालेनले काठमाडौंमा फोहोर व्यवस्थापनलाई आफ्नो पहिलो प्राथमिकता बनाएका थिए । त्यसैले निर्वाचित भएपछि उनले यही मुद्दामा काम सुरु गरे । तर, अनेकौँ अड्चनहरू आइपरेकाे देखियाे, ती कुनै कानुनी थिए, कुनै व्यावहारिक ।

याे पनि..

काठमाडौं उपत्यकाको फोहोर नुवाकोटको सिसडोल र बञ्चरेडाँडामा रहेको डम्पिङ साइटमा फालिन्छ । एकातिर त्यहाँसम्म पुग्ने सडकको अवस्था दयनीय छ । अर्कातिर, फोहोरका कारण स्थानीयवासी नराम्ररी प्रभावित भएका छन् । यसबारे स्थानीयवासीले बारम्बार तालुकदार निकायको ध्यानाकर्षण गराउँदै आएका छन् ।

मेयर बालेन निर्वाचित भएपछि फेरि उनीहरूले फोहोर फाल्न बाधा गरे । सिसडोल र बञ्चरेडाँडा पुगेर स्थानीयसँग बालेनले भनेका थिए, ‘२० वर्षदेखि पार्टीहरूले गर्न नसकेको काम मैले अहिलेको अहिल्यै कसरी गरौँ ? म स्वतन्त्र व्यक्ति हो, कसैको आदेश कुर्दिनँ । केही दिन पर्खिदिनुस्, समस्याको समाधान गर्छु ।’ आफूले अल्पकालीन र दीर्घकालीन योजना बनाएर काम गर्न चाहेको बालेनको भनाइ थियो ।

उनको खास योजना काठमाडौंमै फोहोर व्यवस्थापन गर्ने थियो । यति मात्र होइन, खोला कोरिडोर, खोला सरसफाइ, खोलामा फोहोर प्रशोधन प्लान्ट, अन्डर पास, बञ्चरेडाँडामा लिच्चडको व्यवस्थापन, माटो क्यापिङको व्यवस्थापन अनि साइटको ग्यास पाइपको व्यवस्थापन, वैकल्पिक बाटोको व्यवस्थापन, काठमाडौंमै फोहोर व्यवस्थापन गर्न कानुन र जग्गालगायतका विषयमा उनले मन्त्रालयको सहयोग खोजिरहेका छन् । तर, शहरी विकास मन्त्रालयमा चार मन्त्री फेरिँदासम्म अपेक्षित साथ नपाउनु, अन्य कुनै पनि मन्त्रालयले आफूलाई सहयोग नगरेको महसुस गरेका बालेनले गत २५ चैतमा सिंहदरबारको फोहोर नउठाउने घोषणा गरिदिए । महानगरले फोहोर उठाउन छोडेपछि सिंहदरबार प्रशासनले वैकल्पिक उपाय लगाएर फोहोर उठाउनुपरेको थियो । पछि सर्वोच्च अदालतले समेत फोहोर उठाउन आदेश दिएपछि महानगरले सिंहदरबारको फोहोर उठाउन थालेको छ ।

कहाँ-कहाँ चुके बालेन ?

फोहोर व्यवस्थापनको पाटोमा आफ्नो घोषणाअनुसार काम गर्न बालेन अझै सफल भएका छैनन् । फोहोरलाई काठमाडौंमै व्यवस्थापन गर्ने भनी कुहिने र नकुहिने फोहोरलाई नमिसाउने अभियान चलाएका बालेनले त्यसको सदुपयोग गर्न सकेका छैनन् ।

सम्बन्धित समाचार

दुई दशकदेखि समाधान हुन नसकेको फोहोर व्यवस्थापनलाई वर्ष दिनमै गर्न कठिन हुने भन्दै उनले अबको चार वर्षभित्र परिणाम देखिने गरी काम गर्ने बताउँदै आएका छन् ।

सुकुम्बासी बस्तीमा डाेजर, अपर्याप्त तयारी

सुकुम्बासी व्यवस्थापनको पाटो सर्वथाको चुनौतीजस्तै बनेको छ । राजनीतिक दलहरूले सुकुम्बासी भोटर भड्किने डरले यसमा गम्भीर भएर काम गरेका छैनन् । अध्ययन आयोगका प्रतिवेदन र सुझावहरू थन्क्याइएका छन् । खासगरी काठमाडौंमा खोला किनारमा बसेका सुकुम्बासीको व्यवस्थापनमा सरकारले सिन्को भाँचेको छैन भन्दा अतिशयोक्ति हुँदैन । यस्तोमा बालेन सुकुम्बासी बस्तीमा डाेजर लिएर पसे ।

याे पनि..

पर्याप्त तयारीबिनै नागरिकको उठिबास लाउन खोजेको भन्दै उनको आलोचना मात्र भएन, सुकुम्बासीहरूले महानगर प्रहरीमाथि आक्रमण नै गरे । सुकुम्बासी व्यवस्थापनकाे अभियानमा बालेन पूर्णतः चुके । रवि लामिछाने गृहमन्त्री हुँदासमेत सहयोग नपाएकोमा बालेन आक्रोशित भएका थिए । सुकुम्बासीको व्यवस्थापनका लागि बालेनले गरेकाे प्रयास गलत थिएन । यसलाई अझै परिपक्व तरिकाले गर्न सकिन्थ्यो । संघीय सरकारले साथ दिएको भए परिणाम सकारात्मक हुन सक्थ्यो ।

२५ कात्तिकमा अधिकारसम्पन्न बागमती सभ्यता एकीकृत विकास समितिले काठमाडौं उपत्यका नदी किनारमा रहेको सुकुम्बासी बस्ती हटाउने भन्दै जारी गरेको सूचना देखाउँदै महानगर प्रहरीहरू १२ मंसिरमा डोजरसहित थापाथलीस्थित सुकुम्बासी बस्तीमा पसेपछि तनाव भएको थियो । यस क्रममा सुकुम्बासी र महानगर प्रहरीबीच झडपसमेत भयो, ३६ प्रहरी घाइते भए ।

थापाथलीमा प्रयास असफल भएपछि बालेन गैरीगाउँका सुकुम्बासीतिर सोझिए । तर, उच्च अदालतले बिनाकुनै विकल्प सुकुम्बासी नहटाउन आदेश दिएपछि महानगर रोकिनुपर्‍यो । 'थापाथलीस्थित सुकुम्बासी बस्ती व्यवस्थापन हुन नसक्नुमा सोही क्षेत्र (कामपा- ११) का वडाध्यक्ष हीरालाल तण्डुकार र काठमाडौं- १ का प्रतिनिधिसभा सांसद प्रकाशमान सिंह बढी जिम्मेवार छन्, भोट जोगाउन उनीहरूले बालेनलाई साथ दिएनन् । न त सरकारले नै साथ दियो,' सीमावर्ती ललितपुर- १० का पूर्ववडाध्यक्षसमेत रहेका ८२ वर्षे व्यञ्जनकार भन्छन् । बालेन टिमका एक सदस्यका अनुसार, सुकुम्बासी बस्ती व्यवस्थापनको अधुरो कामलाई फेरि निरन्तरता दिने तयारी छ ।

फुटपाथ वर्गप्रति निर्मम

बालेनले फुटपाथ खाली गराउने अभियान चलाए । यस क्रममा फुटपाथमा मकैको ठेलादेखि साइकलमा फलफूल बेचेर गुजारा गर्ने सबैको बिल्लीबाठ भयो । विपन्नमाथि क्रूर भएको भन्दै बालेनले चर्काे आलोचना खेपे । उनी भन्छन्, 'आफूले पाएको अभिभारा पूरा गर्न भावनात्मक मात्रै भएर हुन्न । फुटपाथको आधारभूत निर्माण नै पैदलयात्रुहरूका लागि हो । शहरको वास्तविक व्यवस्थापनका लागि फुटपाथ खुल्ला हुन पनि जरुरी हुन्छ । महानगरले पहिले फुटपाथका व्यापारीहरूलाई अन्यत्र राखेर खुल्ला गर्ने कोसिस गरेको थियो, जुन पूर्ण असफल भयाे । दिएको ठाउँ पनि भरिने र फेरि फुटपाथमा नयाँ व्यापारीहरू आइपुग्ने क्रम देश समृद्ध नहुञ्जेल भइरहने कुरा हो । यो चक्र तोड्न महानगरको कार्यक्षेत्र र क्षमताले भ्याउने जे थियो, त्यही गरियो र गरिँदैछ ।'

पूर्वाधार एम्बुलेन्स निकाले, ६ महिनामै थन्क्याए

वर्षौंदेखि थन्किएका पूर्वाधार एम्बुलेन्स बालेनले आफू निर्वाचित भएलगत्तै सञ्चालनमा ल्याए । सडकका खाल्डाखुल्डी पुर्न र भत्केको कालोपत्रे तत्काल मर्मत गर्ने गरी सञ्चालनमा ल्याइएकाे पूर्वाधार एम्बुलेन्स ६ महिनामै बन्द भयाे । बालेनले थालेर बीचमै छोडेकामध्ये पूर्वाधार एम्बुलेन्सकाे काम पनि एक हो ।

यमबुद्धको सालिक विवाद

आफू निर्वाचित भएको केही महिनापछि बालेनले र्‍यापर स्व. यमबुद्ध (अनिल अधिकारी) को सालिक बनाउने घोषणा गरे । युवापुस्ताका प्रिय र्‍यापरको प्रतिमा बनाउने उनको योजनाको चौतर्फी विरोध भयो । अनि बालेनले आफ्नै खर्चबाट बनाउने उद्घाेष गरे । अपरिपक्व मेयर भन्दै फेरि आलोचना भयो । पछि उनी सालिक बनाउने अडानबाट पछि हटे । इ-स्पोर्ट्सलाई १ करोड छुट्याएकोमा पनि मेयर बालेनको आलोचना भएको थियो ।

अध्ययन नगरेरै टुकुचामा भ्वाङ

बिनाकुनै औपचारिक निर्णय उनले जय नेपाल हलदेखि काठमाडौं प्लाजासम्म टुकुचा खोलाको भूमिगत सुरुङ खोतल्न लगाए । यस क्रममा अन्य संरचनासमेत भत्काइयो । टुकुचा सुरुङमार्ग करिब १३० वर्षअघि नै वीरशमशेरको पहलमा बनेको कागजी प्रमाणहरू पुरातत्त्व विभागले सार्वजनिक गरेको थियो । पछि उच्च अदालत पाटनले काठमाडौं महानगरपालिकाले टुकुचा खोला उत्खनन गर्न नपाउने आदेश दियो ।

यसबाहेक बालेनले निर्णय गराएर वा आफ्नै पहलमा थालेका कतिपय कामहरू बीचमै रोकिएका छन् । कतिपय योजनाको प्रभावकारी कार्यान्वयन वा नतिजा देखिएको छैन । जस्तो कि, विभिन्न होटल तथा रेस्टुरेन्टका शौचालयलाई सार्वजनिक शौचालयका रूपमा प्रयोग गर्ने याेजना लागू गराए पनि त्यसकाे प्रभावकारी कार्यान्वयन भएकाे देखिँदैन ।

'तर उहाँले यो १३ महिना जेजस्ता काम गरेर जनतामा आशा जगाउनुभएको छ, याे नै यसअघिका मेयरले गर्न नसकेको काम हो । उहाँको कार्यकाल झण्डै चार वर्ष बाँकी नै छ, यस अवधिमा धेरै काम हुने अपेक्षा गर्न सकिन्छ', काठमाडाैं महानगरपालिका- ५ की बासिन्दा डा. अनिता आचार्य भन्छिन् ।

सामाजिक सञ्जालमा लफडा

काठमाडौं महानगरपालिकाको मेयर भइसक्दा पनि सामाजिक सञ्जालमा घृणा र निराशाकै प्रतिनिधित्व झल्किने गरी पोस्टहरू गर्ने गरेकोमा बालेन आलोचित हुँदै आएका छन् । फेसबुक, ट्विटरमा उनको भनाभन धरान उपमहानगरपालिकाका मेयर हर्क साम्पाङ, एमाले नेता महेश बस्नेत, कमेडी च्याम्पियनका निर्देशक विशाल भण्डारीसम्म भएको थियो ।

सम्बन्धित समाचार

यति मात्र होइन, नेतालाई ‘चोर’ भन्नेदेखि ‘फोहोर फाल्ने ठाउँमा लगेर मिल्काउनुपर्छ’ भन्नेसम्मका उनका अभिव्यक्तिलाई पनि धेरैले गैरजिम्मेवार भनेका छन् । तर, बालेनका समर्थकहरू भने यस्तो अभिव्यक्तिलाई जनताप्रति बेइमानी गर्नेहरूका लागि सम्बोधन भएको तर्क गर्छन् । जसले जे तर्क गरे पनि बालेन जनताका लागि आशाको केन्द्र हुन् । उनका गतिविधि र अभिव्यक्तिले आगामी पुस्तालाई समेत प्रभावित पार्छ । त्यसैले उनले खासगरी सामाजिक सञ्जालमा संयमित हुनुपर्ने धेरैको सुझाव छ ।

याे पनि..

प्रकाशित मिति: शनिबार, जेठ २०, २०८० ०९:०३