२ हजार बढी सीमास्तम्भ नै गायब

A+ A A-

आजको राजधानीले नेपाल–भारत सीमा क्षेत्रका तीन गुणाभन्दा बढी सीमास्तम्भ हराएको बारे प्रमुख समाचार प्रकाशित गरेको छ । ८ हजार ५५४ सीमास्तम्भमध्ये २ हजार ३४४ वटा हराएको नापी विभागले जनाएको छ ।हाल नेपाल–भारत संयुक्त सीमा सर्वेक्षण टोलीले हराएका सीमास्तम्भहरूको खोजतलास जारी राखेको नापी विभागले स्पष्ट पारेको छ ।

कुल सीमास्तम्भमध्ये ४५७ वटा मात्र राम्रा अवस्थामा रहेका छन् । १ हजार ५५६ वटा सीमास्तम्भ पूर्ण क्षतिग्रस्त अवस्थामा रहेका छन् । २ हजार ८८९ वटा भने सामान्य क्षति भएको अवस्थामा पाइएको छ । ६९६ वटा निर्माण हुन बाँकी छ भने ११२ निर्माणाधीन अवस्थामा रहेको समाचारमा छ ।

त्यस्तै राजधानीले घुस प्रकरणमा जोडिएका अख्तियार दुरुपयोग अनुसन्धान आयोगका आयुक्त राजनारायण पाठकविरुद्ध छानविन गर्ने बाटो खुलेको समाचार प्रकाशित गरेको छ । महान्यायाधिवक्ता कार्यालयले अख्तियारालाई कानुनी अप्ठ्यारो नभएको राय दिएपछि पाठकमाथिको अनुसन्धान गर्ने बाटो खुला भएको हो ।

सत्तारूढ दल नेपाल कम्युनिस्ट पार्टी (नेकपा) को एकता टुंगो लाग्न नसक्दा पार्टी कार्यक्रम शून्य भएको समाचार राजधानीमा छ । पार्टी एकता प्रक्रिया लम्बिँदा केन्द्रदेखि स्थानीय तहसम्मकै गतिविधि प्रायः ठप्प हुन पुगेको हो । नेकपा स्रोतका अनुसार नेकपा अध्यक्षद्वय केपी शर्मा ओली र पुष्पकमल दाहाल तथा वरिष्ठ नेता माधवकुमार नेपालबीच भागबन्डा नमिलेपछि एकतासमेत अलमलमा परेको छ ।

न विभाग कसले लिने, जिल्ला नेतृत्व, जनवर्गीय संगठनको प्रमुखलगायतका विषयमा भागबन्डा नमिलेकै कारण एकता टुंगो लाग्नमा समस्या भएको हो । शीर्ष नेताबीचको भागबन्डाको किचलोले पार्टी एकता अलमलमा पर्नुका साथै पार्टी गतिविधि शून्य अवस्थामा पुगेको र यससँगै हजारौं नेता कार्यकर्ता जिम्मेवारीविहीन हुन पुगेको समाचारमा जनाइएको छ ।