८९ हजार ६ सय ४० जनालाई पर्‍याे कालिञ्चोक दर्शनको आईपीओ

A+ A A-

कालिञ्चोक दर्शन लिमिटेडले सर्वसाधारणका लागि निष्कासन गरेको आईपीओ बाँडफाँट गरेको छ । कम्पनीले माघ ३ गतदेखि ६ गतेसम्म सर्वसाधारणबाट ८ लाख ९६ हजार ४ सय कित्ता शेयरमा आवेदन मागेकाे थियाे ।

त्यसमा १४ लाख ७३ हजार ९६९ जना आवेदकहरूबाट १ करोड ६६ लाख ७० हजार ९ सय ९० कित्ता शेयरको लागि आवेदन परेको थियो । त्यसमध्ये ८ हजार २०६ आवेदन रद्द भएकाले १४ लाख ६५ हजार ७ सय ६३ जना योग्य आवेदकमध्ये ८९ हजार ६ सय ४० जनालाई ८ करोड ९६ लाख ४ सय कित्ता शेयर बाँडफाँट गरिएको हो ।

कम्पनीको शेयर निष्काशन तथा बिक्री प्रबन्धक नविल इन्भेस्टमेन्ट बैकिङ्ग लिमिटेडको कार्यलय नारायणचौर, नक्सालमा शेयर बाँडफाँट गरिएकाे छ ।

कम्पनीको आईपीओमा मागभन्दा बढी आवेदन परेकाले धितोपत्र निष्काशन तथा बाँडफाँट निर्देशिकाअनुसार गोलाप्रथा माध्यमबाट न्यूनतम १० कित्ताको दरले शेयर वितरण भएको छ ।

कम्पनीले आफ्नो जारी पुँजी ६० करोड रुपैयाँको १८ प्रतिशतले हुनआउने १० करोड ८० लाख रुपैयाँ बराबरको १० लाख ८० हजार कित्ता शेयर सर्वसाधारणका लागि छुट्याएको थियो । सोमध्ये १० प्रतिशत अर्थात १ लाख ८ हजार कित्ता वैदेशिक रोजगारीमा रहेका नेपालीका लागि निष्काशन गरिएकाे छ भने ५ प्रतिशत अर्थात ५४ हजार कित्ता सामूहिक लगानी कोषहरूमा बाँडफाँट गरिसकेको छ ।

त्यसैगरी, २ प्रतिशतले हुआउने २१ हजार ६०० कित्ता कर्मचारीहरूका लागि छुट्याइ बाँकी रहेको ८ लाख ९६ हजार ४०० कित्ता सर्वसाधारणका लागि निष्काशन गरेर बाँडफाँट गरिएकाे हाे ।

प्रकाशित मिति: बिहीबार, माघ १९, २०७९ १२:२३