चावहिल–जोरपाटी–साँखु सडकखण्ड, क्षतविक्षत सडकले सास्ती

A+ A A-

आजको राजधानी दैनिकले चावहिल–जोरपाटी–साँखु सडकखण्डको विजोग अवस्थाका बारेमा गरिएको स्थलगत रिपोर्टिङको समाचारलाई प्रमुख समाचार बनाएको छ । २०७२ सालबाट विस्तारको प्रक्रिया सुरु गरिएको चावहिल–जोरपाटी–साँखु सडकखण्ड अझै अलपत्र अवस्थामा छ ।

सडक विस्तारका क्रममा अधिकांश फुटपाथ भत्काइएको छ । जसले गर्दा पैदलयात्रीलाई सडक बीचबाट हिँड्नुपर्ने अवस्था देखिएको छ । सडकको दुरवस्थाका कारण असन्तुलित हुँदै चलाउनुपर्दा सवारी चालकसमेत अप्ठ्यारोमा पर्ने गरेका छन् ।

पछिल्लो समय बन्दै गरेका फुटपाथसमेतको अवस्था दयनीय छ । साँघुरा र मुस्किलले एक जना मात्र हिँड्न मिल्नेदेखि पाइलासमेत अट्न नसक्नेसम्मका पाइएको छ । ठेकेदारको चरम लापरबाही छ तर सरकारी निकायले प्रभावकारी अनुगमन गर्न नसक्दा ठेकेदारले सरकारलाई नै चुनौती दिइरहेको पाइएको समाचारमा छ ।

वैदेशिक रोजगारीको पीडा, एउटाको शव नआउँदै अर्को बिदेसिन तयारबारे पहिलो पृष्ठमा समाचार प्रकाशित गरेको छ । वैदेशिक रोजगारीका लागि कुवेत गएका झापा शिव सताक्षी नगरपालिका माईधारका विष्णु घिमिरेको लास बाकसमा बेरिएर आएको घटना सेलाउन नपाउँदै उनकै भाइ गोकुल घिमिरे रोजगारीका लागि कतार गए ।

घिमिरेको घरनजिकै राजेश बजगाईंको घर छ । उनको घरमा पनि कुवेतको रोजगारीबाट प्राप्त रकमले घरपरिवारको खर्च टर्दै आएको थियो । त्यहाँ कार्यरत ठूलो बुबा यज्ञप्रसाद बजगाईंको लास आएको केही साता बित्न नपाउँदै राजेश पनि रुँदै वैदेशिक रोजागारीका लागि दुबईतर्फ लागेको समाचार छ ।

स्वास्थ्य र शिक्षामा एनजीओको चार अर्ब लगानीबारे राजधानीले प्रमुख समाचार प्रकाशित गरेको छ भने इजलासम कानुन व्यवसायीलाई कडाइ गरिँदै शीर्षकमा समाचार प्रकाशित छ ।

समयमै पुस्तक पठाउ शीर्षकमा राजधानीले सम्पादकीय लेखेको छ भने तीन धर्मको संगम स्थल हलेसीका बारेमा श्यामप्रसाद मैनालीेको लेख प्रकाशित छ ।

प्रकाशित मिति: सोमबार, फागुन ६, २०७५ १८:२८