क्लस्टरअनुसार दलहरूले बुझाएनन् समानुपातिक सांसदको नाम, अब के हुन्छ ?

A+ A A-

प्रमुख दलहरूले क्लस्टरअनुसार समानुपातिक सांसदको सूची बुझाएनन् । शनिबार निर्वाचन आयोगमा बुझाएको सूचीमा क्लस्टर र क्रम नमिलेको पाइएको हो । राति १ बजे सूची बुझाएको कांग्रेसले मधेस प्रदेशमा क्लस्टरअनुसार मिलाएको छैन ।

एमालेको प्रदेश १ मा अल्पसंख्यकको क्रम मिचेर नाम राखेको छ । मधेस प्रदेशमा पनि एमालेले क्रमअनुसार सूची बुझाएको छैन । बन्दसूचीमा मुस्लिमको क्लस्टरमा १ नम्बरमा जैनब खातुनको नाम छ । तर दोस्रो नम्बरमा रहेको नाजिमा खातुनलाई राखेको हो ।

नाम पेस गर्नुअघि एमालेले जैनब खातुनलाई कारबाही गरेको थियो । उनी प्रभु साह निकट रहेको भन्दै उनको सट्टा नाजिमालाई राखेको हो । आयोगले बन्द सूचीको क्रम अन्नुसार नै नाम हुनुपर्ने बताएको छ ।

‘आयोगले क्रमसंख्याको आधारमा हेर्ने हो । पहिलो नम्बरमा भएको नाम हटाएर पछाडिबाट तान्न मिल्दैन,’ आयोगका एक अधिकारीले भने ।

पछि सांसद निर्वाचित भएपछि पार्टीले कार्बाही गरेमा सभामुखमार्फत आउनुपर्ने आयोगको तर्क छ । अहिले बन्द सूचीमा भएको नाम तलमाथि गर्न नमिल्ने आयोगको भनाइ छ ।

प्रत्यक्षतर्फको मनोनयन गर्नुअघि प्रभु साह निकटका पनि बन्दसूचीमा राखिएको थियो । तर प्रत्यक्षको मनोनयन गर्ने दिन साहले स्वतन्त्र उम्मेदवारी दिएका थिए ।

माओवादीको बागमती प्रदेशको सूची मिलेको छैन । अल्पसंख्यक एक जना चाहिनेमा दुई जनाको नाम पेस गरेको छ । लुम्बिनी प्रदेशमा माओवादीले खस आर्यको क्रम मिचेर नाम पेस गरेको छ ।

लुम्बिनी प्रदेशमा नागरिक उन्मुक्तिले खस आर्यबाट राख्नुपर्नेमा थारुबाट ल्याएको छ । नागरिक उन्मुक्तिको सुदूरपश्चिममा महिलाको संख्या नपुगेको र समावेशी पनि भएको छैन ।

मधेस प्रदेशमा ७ सिट पाएको जसपाले १० जनाको नाम पेस गरेको छ । नाम छनोटमा विवाद भएपछि जसपाले १० जनाको नाम पेस गरेको हो ।

अब आयोगले दलहरूलाई सच्याउन दुई दिनको समय दिइएको सहसचिव यज्ञप्रसाद भट्टराईले बताए । नाम सच्चिएपछि आयोगले निर्वाचित भएको घोषणा गरी प्रमाणपत्र वितरण गर्ने छ ।

प्रकाशित मिति: आइतबार, मंसिर २५, २०७९ ०७:३४