आयोगका कर्मचारीलाई समानुपातिक उम्मेदवारको फोन– म माननीय बन्छु कि बन्दिनँ ?

आयोगका कर्मचारीलाई समानुपातिक उम्मेदवारको फोन– म माननीय बन्छु कि बन्दिनँ ?

A+ A A-

समानुपातिकतर्फको मतगणना अन्तिम चरणमा पुगेसँगै उम्मेदवारहरू आफू सांसद हुने/नहुने भन्दै निर्वाचन आयोग धाउन थालेका छन् । कोही आयोगमै त कोहीले फोनबाट कर्मचारीहरूलाई सोध्न थालेका छन् । यसरी आयोग धाउने र फोन गर्नेमा राष्ट्रिय दल बन्ने निश्चित भएका पार्टीका उम्मेदवारहरू छन् । कांग्रेसका गुट–गुटका नेताले फोन गरिरहेका छन् ।

‘आफ्नो गुटका को–को पर्ने भए भन्दै कांग्रेस नेताहरूको फोन आइरहेको छ,’ समानुपातिको सिट बाँडफाँटमा खटिएका एक कर्मचारीले भने, ‘कति उम्मेदवार आयोगमै धाउन थालेका छन् ।’ हालसम्म कांग्रेस, एमाले, माओवादी, राष्ट्रिय स्वतन्त्र पार्टी, राप्रपा, जसपा र जनमत पार्टी गरी सातवटा दलले थ्रेसहोल्ड कटाएका छन् ।

‘थ्रेसहोल्ड कटाएका दलका उम्मेदवारहरूले पटकपटक फोन गर्नुहुन्छ,’ ती कर्मचारीले भने, ‘उम्मेदवारहरूले फोन गरेर वाक्कदिक्क लगाइसके ।’ धेरै फोन गर्नेमा कांग्रेस र राप्रपाका उम्मेदवार छन् । राप्रपाले अपेक्षाभन्दा बढी मत पाएपछि उम्मेदवारहरूले चासो दिएर सोधखोज गरिरहेको आयोगका कर्मचारीहरू बताउँछन् ।

एमाले, माओवादीलगायत पार्टीका महिला उम्मेदवारहरूले पनि फोन गरेर आयोगका कर्मचारीहरूलाई आफू सांसद हुने सम्भावना रहे/नरहेको भन्दै फोन गरिरहेका छन् । ३३ प्रतिशत महिला संसद्‌मा अनिवार्य हुनुपर्ने भएपछि उनीहरूले चासो दिएका हुन् ।

चार प्रदेशको गणना सकियो

निर्वाचन आयोगका अनुसार आइतबारसम्म चारवटा प्रदेशको मत गणना सकिएको छ । प्रदेश १, मधेस प्रदेश, लुम्बिनी र कर्णालीको गणना सकिएको हो । बागमती प्रदेशको दोलखा, गण्डकी प्रदेशको स्याङ्जा र सुदूरपश्चिम प्रदेशको बाजुरामा मतगणना जारी छ ।

बुथ कब्जा भएपछि दोलखाका १० वटा केन्द्रमा पुन: मतदान भएपछि नतिजा आउन ढिलाइ भएको हो । स्याङ्जा र बाजुरामा मतगणना गर्ने कि पुनः मतदान गर्ने भन्ने निर्णय गर्न ढिलाइ हुँदा नजिता आउन ढिला भएको हो । आयोगले गणना गर्ने निर्णय गरेपछि मात्र मतगणना सुरु भएको थियो ।

आयोगका अनुसार २० गतेसम्म सबै क्षेत्रको अन्तिम मतपरिणाम आइसक्नेछ । ‘स्याङ्जा बाजुरा र दोलखाको गन्न बाँकी छ । २० गतेभित्र सबै गणना सकिन्छ,’ आयोगका प्रवक्ता शालिग्राम शर्मा पौडेलले भने । हालसम्मको मतपरिणामअनुसार नेकपा एमालेले समानुपातिकतर्फ धेरै मत पाएको छ । उसले २७ लाख ८८ हजार ३५६ मत पाएको छ ।

दोस्रो स्थानमा रहेको नेपाली कांग्रेसले २६ लाख ६० हजार २ सय ४६ मत, माओवादी केन्द्रले ११ लाख ६२ हजार १ सय २४ मत, राष्ट्रिय स्वतन्त्र पार्टीले ११ लाख २४ हजार ५ सय ४३ मत, राप्रपाले ५ लाख ८६ हजार ६ सय ३८ मत, जसपाले ४ लाख २० हजार ९ सय ४६ मत, जनमत पार्टीले ३ लाख ९४ हजार ५२३ मत पाएका छन् । आयोगका अनुसार हालसम्म १ करोड ४ लाख मत गणना भएको छ । आयोगका अनुसार यसपटक १ करोड ७९ लाख ८८ हजार ५ सय ७० मतदाता रहेकोमा ६१ प्रतिशत मत खसेको थियो ।

हालसम्मको मतपरिणामअनुसार कुन दलको कति सिट ?

अहिलेसम्मको नतिजाअनुसार सातवटा दलले थ्रेसहोल्ड कटाएका छन् । सदर मतको ३ प्रतिशत मत आएमा मात्र राष्ट्रिय दल हुन पाइने प्रावधान छ । ३ प्रतिशत मत ल्याउनेले मात्र समानुपातिकमा सिट पाउनेछन् । अहिलेसम्मको नतिजाअनुसार एमालेले ३४ सिट, कांग्रेसले ३२ सिट, माओवादीले १४ सिट, रास्वपाले १३ सिट, राप्रपाले ७ सिट, जसपाले ५ र जनमतले पनि ५ सिट पाउने देखिन्छ ।

यदि दोलखा, स्याङ्जा र बाजुराको मतबाट ३ प्रतिशत पुर्‍याएमा सिट संख्या घट्नेछ । हालसम्मको नतिजाअनुसार नेकपा एसलाई करिब १६ हजार मत अपुग छ । नेकपा एसले १६ हजार मत ल्याउने सम्भावना न्यून छ । तीन क्षेत्रको मतमा कुनै दललाई धेरै मत गएमा पनि सिट संख्यामा केही फरक पर्न सक्ने आयोगका अधिकारीहरू बताउँछन् ।

सिट बाँडफाँटमा जुट्यो आयोग

चारवटा प्रदेशको गणना सकिएसँगै निर्वाचन आयोग सिट बाँडफाँटको तयारीमा जुटेको छ । आयोगले राष्ट्रियसभामा कुन पार्टीबाट कति संख्यामा महिला प्रतिनिधि छन्, सोको विवरण माग गरेको छ । ‘राष्ट्रियसभामा कुन दलका कति महिला छन्, विवरण माग गर्दैछौँ । पत्र तयार भएको छ । भोलिसम्ममा पठाउँछौ,’ आयोगका एक अधिकारीले भने ।

राष्ट्रियसभा र प्रतिनिधिसभामा गरी ३३ प्रतिशत महिला हुनुपर्ने भएकाले आयोगले राष्ट्रियसभासँग महिला संख्याको विवरण माग गर्न लागेको हो । आयोग प्रमुख आयुक्त दिनेशकुमार थपलियाले यही मंसिर २६ गतेभित्र सबै काम सकाएर राष्ट्रपतिलाई प्रतिवेदन बुझाउने बताएका छन् । तर, समानुपातिकको सिट बाँडफाँटमा समय लाग्ने भएकाले २६ गतेभित्र काम नसकिने कर्मचारीहरू बताउँछन् ।

सम्बन्धित समाचार

प्रकाशित मिति: आइतबार, मंसिर १८, २०७९ १८:४७